أضف سؤال أو موضوع جديد          

رجة بالموتر جننتي .. ولقيت الحل اخيرا

up 25 down 3
ابو هيثم 7 2168
قبل سنه و 11 شهر



السلام عليكم ورحمه الله وبركاته

اللي حصل عندي رجه تبدأ من سرعه 100 الى 140 وجربت 10 حلول ولا فادت .. وراح اذكرها بالتفصيل علشان محد يتخسر مثل اللي خسرته

1/ بدلت مكان الكفرات الاماميه مكان الخلفيه بحركه X المعروفه

2/ شيكت على الكفرات والجنوط مرتين مره بالنظر ومرة باللمس وطلعت سليمه من الضربات والعفطات والتحبيل .. ثم بعدها رصصت ليزر للمرة الأولى

3/ رصصت للمره الثانيه ولكن ترصيص ارضي ب 100 ريال ضمان شهر

4/ اعدت الترصيص الارضي بعده بيوم عند نفس المحل

5/ رحت لمحل ترصيص أرضي ثاني ورصصها من جديد

6/ رجعت مره أخرى للمحل الثاني ورصصها (( وهذي خامس مره ترصص الكفرات خلال اسبوعين )) وبرضه مازلت المشكله مستمره

7/ شيكت على كراسي المكينه فحص بالنظر وادوس بنزين مع فرامل والقير معشق للامام والخلف والموتر واقف وطلعت سليمه

8/ شيكت على بطن الموتر مساعدات اذرعه عكوس وطلع سليم ولله الحمد .. واللي سويته اني امشي 120 واترك الدعسه واشوف ؟ اذا وقفت الرجه معناته من العكس وبرضه شيكت عليه بالنظر ونزلت بحفره بنشري وحركت العكس لقيته مشدود واساسا الموتر موديل 2015 صعبه يخرب بذا السرعه خصوصا اني محافظ على الموتر

9/طبعا سالفه طنجره القير جربت اغير زيت القير اولا .. ثم احطه بالفاضي والموتر ماشي ومازلت الرجه مستمره !!!

10/ طبعا قالولي خرط هوبات ؟ قلت الرجه مب مع الفرامل ؟؟؟ الرجه والموتر ماشي وتسارعه يزيد هذا أولا

ثاني شي انا ضدد الخرررط نهائيا لانه يضعف الهوب ويقلل عمره الافتراضي وبرضه يقلل قوة كبح الفرامل هذا اذا كان حظك زين وكانت مكينه الخرط ماخرطت هوب واحد اكثر من الثاني وانكسر عليك وانت على سرعه عاليه او احرق نظام ABS عندك بسبب اختلاف قوة الفرمله بين الهوبين

*(( عطوني حل لكني استبعدته مباشرة بسبب ان الموتر دفع امامي .. وهو اني اشيك على عمود الكردان او الصليب ))*
_______________________________________________________________________________

واخيرا حصلنا الحل .. نصحني الاخ (( ماجد المطلق )) اني اشيك على الهوبات واحتمال ان فيها ميلان خفيف يبدأ من اول مايحرك الموتر لكن ماتحس فيه الا على السرعات العاليه .. سبب الميلان يافرامل قوي علشان ساهر او مويه بارده بالشارع جت على الهوب وهو بقمه حرارته

طبعا زي ماذكرت انا ضد الخرط نهائيا وفيه طريقه ثانيه تغنيك عنه الا وهي مسح او صنفره الهوب بورق الصنفره المعروفه مع صنفره الفحمات .. طبعا هذا اللي سويته بالضبططط وراحت المشكله مع تغيير فحمات اصليه

ولله الحمد انتهت معاناة دامت شهر كامل مع هالرجه .. الموتر أزيرا وحبيت اذكر تجربتي يمكن أحد يستفيد منها .. وبالتوفيق







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


بيض الله وجهك عالافاده لاخوانك
فعلا سبب رجة السيارات كثير والواخد يحتار معها
والاخ ماجد المطلق رجل ثقه بالموقع الله يعطيه العافيه
ودمتم


up 3 down 0
ابو عبدالله احمد 3396
قبل سنه و 11 شهر



بيض الله وجهك ورحم الله والديك .. ووسع لك في رزقك ومن يقراء تعليقي .. يارجال والله ياما ناس بتدعي لك على هالتقرير لأن مشكلة الرجة هالأيام في السيارات صايرة بكثرة ... شكرا لك


up 3 down 0
الـقـنـاص 1213
قبل سنه و 11 شهر



حياك
ومشكور وموضوع طيب من رجال طيب
الكل يستفيد 
وياليت اي عضو يكتشف حل ينزل موضوع
وبارك الله فيك


up 1 down 0
باترول 2020 2513
قبل سنه و 11 شهر



السؤال عزيزي 
الرجه اللي سببها الهوبات 
خفيفه او قويه...ولك الشكر  


up 0 down 0
لا للغلاء 608
قبل سنه و 11 شهر



انا معي رجه على 110 الظاهر يبي لها ترصيص
لكن مع السرعات العاليه 120 وفوق
اذا رصيت الفرامل يرج الموتر والطاره
ما ادري هي طبيعيه ولا لا ؟ 


up 0 down 0
ابوناصر 454 652
قبل سنه و 11 شهر



تقرير مميز من عضو مميز


رفع الله قدرك بالدنيا والاخره انت ومن يقرأ


up 0 down 0
حكيم المعاني 10324
قبل سنه و 11 شهر



الله يعطيك العافيه ابو هيثم 7


up 0 down 0
جبل ثور 100 83
قبل سنه و 11 شهر



الله يعطيك العافية
الرجه اسبابها كثيره و احيانا يكون عيب مصنعي بالكفرات
غالبية بناشر ابو يمن ماعندهم سالفهم و مكينة الترصيص فاشلة
الي بيرصص يروح لوكالة الكفر


up 0 down 1
white_heart2 -46
قبل سنه و 11 شهر



جزاك الله خير ويعطيك العافيه


up 0 down 0
الحر ملك 213
قبل سنه و 11 شهر