طريق الرين

لا مافي ساهر على الطريق ومانصحك تسرع لان الطريق غير
مزدوج

في لوحات موجوده بالطريق مكتوب عليها الطريق مراقب بالكاميرات بس ما بعرف لوحات فقط ولا معها ساهر؟؟

الوفيات على طريق الرين كثيرة 

والسبب الابل تقطع الشارع وهي على لون الأرض ماهي واضحه 

والسبب الثاني لو فيك نزيف بسيط جراء حادث بسيط 
ما فيه اسعاف قريب ولا مستوصف ولا شي 
تنزف لين تموت لا قدر الله 

(فامش على هونك امر الله من سعه وكل شي ملحوق عليه)
٣ ساعات تأخير احسن من انك تتاخر للابد خلاص تموت

انتبه مافيه خدمات ولا امن طرق اقرب محطه داخل قريه وبعض الاوقات مافيها بنزين
وعلى طول الخط بعارين يطلعون في الطرق ولاتمشي في الليل
وماتشوف شر وتوصل بسلامه

الطريق سيئ السمعه وكله ابل رتب نفسك لسفر ونام زين 
واخذ الطريق وناسه و ع مهلك 
توصل بالسلامه 

الطريق حول 685 كيلو تقريبا
ما فيه ساهر
لكن اول ما تتعدا الرين بتجيك حول محطتين كذا 
من بعدها ما فيه محطات حول 350 الى 400 كيلو تقريبا 
ما راح تحصل الا وايتات يعبون بنزين فقط 

يعني جهز نفسك واصقع فل وتوكل على الله.

بيض الله وجيه الشباب فادوك 


لكن سمعت ناس من اخوياي جو م طريق الرين قبل شهر
يقولون انهم فتحو محطات ع الطريق نفسه ومركز للهلال الاحمر وم ادري عن 
صحة هذة المقوله  لان اخر مره جيت منه قبل سنه 
وتوبت م عاد اجي منه تمشي وانت ع اعصابك 

يارجال انا مسافر على طريق الرين قبل شهرين
لاتخاف كله محطات الحين ماتنقطع
وطول الخط تقريبا ٦٥٥ كيلو من بيشة الى الرياض

للمعلوميه يحطون ساهر على خط الرين
السرعه مدري 110 او 90 انتبهوا
الكلام متأكد منه 100%
لكن غالبا تلاقي جنب الكاميره سيارة امن الطرق
اذا شفت امن الطرق هد يعني عنده ساهر

ساهر لايوجد ابدا

شوف اخوي طريق الرين دائم اجي منه الوضع مايطمن بصراحه
اخر شي جيت منه قبل 3 اسابيع

طبعا الرياض جيزان والعكس والفرق عن جيزان 2 ساعه

الميزه فيه 600 كيلو تقريبا بدون اشارات بدون توقف
عكس الرياض الدواسر الجنوب كل مطبات اشارات تاخير
نصيحه اذا كنت من سكان ابها جيزان تعال طريق الدواسر آآمن لك
اما من سكان بيشه تعال الرين بس لازم تكون منتبه
لانو بعض الاحيان تكون ماشي مثلا 160 وبعضهم يمشي 200
يجيك شايب من اهل الحلال ماشي 20 بنص الطريق ومايفتح
لك طريق وتخاف تتجاوز لانه مايمشي كفرين ع الخدمه

المحطات اذا طالع من الرياض عبي في برودان تجيك محطتين
كبيره ع اليمين واليسار وتوصلك بيشه وفي قبل محطه بنص الطريق ع اليسار

ونصيحه لاهل جيزان اذا مشيت لاتدخل مخرج بيشه ماله لزوم
خلك مع خطك الين يجيك مطب والطريق مقطوع 20 متر تقريبا
يجيك يمين بيشه ويسار خيبر والخميس الخ
في محطه ع اليمين تشوفها عبي منها لاتنسى

دايم اسافر معه وخط زين مافيه اي عيب والمحطات كثرت على الخط بس اهم شي تكون منتبه سواء مسرع او مهدي لان فيه ناس يهدون بس ماهم منتبهين وعب في الرياض والمره الثانيه في برودان محطتين كبار متقابله وبعد برودان بيجيك مجمع الهضب عب منه والين بيشه يوصلك واذا جمس او جيب بيوصلك بيشه من برودان لكن انتبه من البل الله يوصلك بالسلامه 

توني مسافر منه من 3 ايام
بالنسبة لساهر موجود لوحات تحذيرية فقط بس مافيه ساهر
فيه ساهر بس طايح في الارض ومصبوغ بوية ههههه
هو الوحيد اللي لقيته

بالنسبة للمحطات اذا انت مسافر من الرياض للجنوب
عندك عدة محطات في الرين 190 كيلو عن الرياض
ومحطتين في برودان 310 كيلو عن الرياض
وعدة محطات في النميص وعسيلة حول 500 كيلو عن الرياض

خلك على طريق الدواسر أفضل لك  
عيوب طريق الرين  
1-مشترك 
2-المحطات قليله
3- ما فيه خدمات مثل استراحات و بنشر و ورش 
4- كثرة الإبل 
5- كثرة الحوادث
6- لا يوجد مركز إسعاف 
7- لو انقطعت انسى واحد يوقف لك 
و مثل ما تعرف ما تضمن السياره و لا تضمن مفاجأت الطريق  

امشي بالنهار فقط

اذا سافر احدكم فليقول كم قال الرسول .عليه الصلاة والسلام .
 [ بسم الله .. توكلنا على الله .. ولا حول ولا قوة الا بالله ] 
          "الله أكبر ... الله أكبر ... الله أكبر .
{ سُبْحانَ الَّذِي سَخَّرَ لَنَا هَذَا * وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ *
 اللهم إنا نسألُكَ في سفرنا هذا البرَّ والتقوى
* ومن العمل ما ترضى * اللهم هون علينا سفرنا هذا واطو عنا بعده
* اللهم أنت الصاحب في السفر والخليفة في الأهل ،
 اللهم إني أعوذ بك من وعْثاءِ السفر* وكآبة المنظر
 * وسوء المنقلب في المال والأهل
" وإذا رجع قالهن وزاد فيهن
 " آيبون  .. تائبون .. عابدون .. لربنا حامدون"

وفيه دُعاء انا شخصياً ادعي به
ولاحظت ان له فضل كبير ويحميك بعد الله سبحانه  من كل شيء .

ادعوه في سفركم وبتلاحظ فضله وحمايته بعد الله . 
 [ اللهم إني استودعتك - نفسي - وسيارتي - وكل من هو راكب معي 
       .{ فإحفظنا بحفظك ، واسترنا بسترك .. يارب العالمين } .

ي حبي لكم .. الله مكلمكم من عام ١٤٤٠ و بدأت ١٤٤١هجريه 

الطريق ملغم ساهر والله مايمديك توصل ١٤٠ الا ساهر اما على يمين او يسارك ويصور من ورا وقدام