ايش احتاج عشان أشتري سيارة جديدة؟

شوفلك يارس ولا اكسنت
وفية كثير من المعارض متعاملة مع البنوك
انت اول شي شوف الي تبية يارس اكسنت صني ريو سيراتو
يروح اخوك للمعرض ويخلص اوراقه او شوف البنك الي ينزل علية راتب اخوك
يمكن عندهم عروض
بعد مايخلص الاوراق وكل شي وتجي الموافقه
تستلمون الموتر ويسويلك تفويض عن طريق ابشر
وبكذا مبروك
او يطلع اخوك قرض 35 الف وتشتريها كاش وتسجلها باسمك
واشوف الافضل يطلع قرض وتسجلها باسمك
يمكن تحتاج وتبيعها او بعد سنه الى سنتين يجيك فلوس
وتبيعها وتشتري فئة اعلى

تحتاج رخصة قيادة .. مراجعة المرور عشان مدرسة القيادة .. صور . فحص طبي ... امرها بسيط

الاستمارة تطلع بعد شراء السيارة و على حسب . لو كانت باسمك الاستمارة تمام و اذا كانت باسم اخوك او البنك بيعملو لك اضافة مستخدم بالاستمارة

تأمين السيارة و هذه تطلع مع الاستمارة و خلاص الله يسر امرك

تحتاج الدراهم  هذا اهم شي 
وبعدها تروح المعارض أو الوكالة وهم يخدمونك 

١- اذا بتشتري خذ من المعارض اوفر لك اسعار المعرض ارخص وطبعا 
وتاكد من الضمان وكل شيء ٢- خذ القرض من البنك ويفضل يكون القرض (تمويل شخصي) حتى يكون القسط والفوائد اقل واذا قدرت تدبر دفعة اولى بيكون افضل وافضل 

يا ولودي ههههههه اسمك يدل انك لازم تسأل اخوك اللي بتدبس السياره بأسمه

اذا تقدرون تشترونها كاش مثلاً ياخذ اخوك قرض شخصي من البنك بسيط 35 الى 40 الف يكون احسن تصير باسمكم والتأمين باسمكم وضد الغير اوفر

طبعاً المفروض معك رخصة واذا السيارة بأسم اخوك لاتنسى يضيفك في التأمين عشان لاقدر الله الحوادث تغطيك

السيارات (ريو ، يارس ، اكسنت )

موفق

القرض نهائيا ما انصح تاخذه عشان تشتري سيارة


انت كذا والا كذا بتقسط 

خذ ايجار منتهي بالتمليك افضل

اقلك ليش

القرض اذا طلعته واخذت سيارة ولاسمح الله راحت تالف

ماعاد تقدر تطلع سياره لان عليك قرض لابد من تسديده بالكامل

واذا تبي تطلع ايجار تمليك وعليك قرض راح يكون السعر اعلى والفايده اعلى لانك مجبور 


لكن لو طلعت ايجار بالتمليك وتركت القرض ولاسمح الله صار بالسياره شي وتلفت 

راح يوقف القسط وتطلع غيرها عادي 

والقرض تحتاجه وقت الطوارئ 

والله يوفقنا واياكم لما يحبه ويرضاه

^^ ماعدم نص الشعب الا كذا يا كوكو 13 مدري من قايلكم ان القرض جوكر والمفروض ما تستعمله في أي شي

طيب انا بقولك شغله وفي الاخير بتكتشف ان كلامك خطأ والقرض افضل


السيارة لو راحت تالف وهي بأسمك يعني ماخذ قرض وشاريها كاش ماراح يعوضك التأمين ؟؟؟ ماراح تستفيد من السيارة وتبيعها تشليح وتاخذ فلوسها ؟؟؟


الايجار المنتهي بالتمليك يابابا تقصد ويدك على قلبك لو راحت تالف وقفت على قولتك اقصاد لكن وين الدراهم اللي دفعتها راحت هباءً منثورا


خوينا قصد في مكسيما حوالي 87500 خلال ثلاث سنوات ونص باقي بس سنة ونص وصار له حادث ولاحظ الخطأ هل هذاك 100% عاكس في وجهه واخرتها قالوا خسارة كلية والموتر لهم لأنه باسمهم وقالوا تبي موتر تقصد من جديد لازم نقفل العقد هذا ونبدا عقد جديد والتعويض لهم عن الخسارة اخرتها نطلوا عليه 4800 مدري 4500 وقالوا توكل على الله طيب وين راحت 87500 اللي دفعها ؟؟؟ هذا غير التأمين الشامل في الخمس سنوات مايقل عن 20 الف لاغلب السيارات الفئات الوسط وفوق وغيره فايدتهم



القرض لو تاخذ لك 30 الف ولا 35 الف كم فايدتهم كم الف زيادة بس والتأمين انت حر بتأمن ضد الغير ارخص لك تأمن شامل ولو لاقدر الله احد صدمك وهو مخطي الموتر لك بعه تشليح ويجيك شيك من شركة التأمين بمبلغ التعويض كامل وتقدر تستوفي منه القرض فهمت ؟؟؟


موفق

ابراهيم
فرضا اخذت قرض واخذ سيارة وراحت تالف

طبعا انا اتكلم عن اسوأ الاحتمالات 

لان الاغلب ياخذ سياره كاش ويسوي تامين ضد الغير مو شامل

اذا نسبة الخطا على صاحب السيارة 100 ‎%‎ ماله شي طبعا

حيبيعها تشليح

كم بتجيب ربع القيمة ؟
وش يسوي بها



ومثل ماقلت لك كلامي عن اسوأ الاحتمالات ياغالي

وماتدري وش كاتب لك ربي بكرة 

اذا تبي جديد خذ سيارة صني او اكسنت تلاقيها موديل 2016 بحدود 35الف الي 38الف
واذا تبي موديل قديم تحصل سيارات نظيفه بحدود 18الف فما فوق
عالعموم انت قول لاخوك يخليها باسمه علشان يطمن

القروض اتكلم عن اللي يطلع فوق 100 الف وياخذ بها سيارة 

اللي تحتاجه فلوس عشان تشتري سياره جديده

شكراً لكم جميعاً على ردودكم.