اسعار السيارات بالموقع جنونيه وكثرة المعرفات لنفس العضو

نعم اسعار الموقع غير معقوله
وزد ع ذالك
تجده يقلد على سومه قديمه او شخص غير صامل
والبعض يسوم وهو يبعد عن السياره 870 كيلو
واذا قلت بعتمك قال ارسلها لي
ليه طقم ساعه وكبك ارسله لك

يارجال شوف عيني معرض المهرجان باع بورش كيين جي تي اس فللل كامل ب٢٨٠ جديد

وهنا يقولك يسام ب٣٠٠!! وحاده ب٣٢٠ وماشي ٥٠ الف ليه الاستهبال ذا

معروف ان 90% من الشريطيه من قطاع واحد سيئ السمعه ويتساعدون مع بعض حتى لو رفعت دعوى عليه ما تستفيد يطلعون لك من كل مكان ويشهدون مع بعض

ولا حول ولا قوه الا بالله
+1 لايك للجميع للموضوع الجيد

اختلاف الاسعار بالموقع لانه موقع اكتروني ينزل الاعلان وهو منسدح عاد انباعت خير وبركه ما انباعت خلها عندي
مو مثل الصامل ب البيع يروح للمعارض ويعرضها ويتصرفد

حياك
كلام سليم
بس اللي بيشتري يشاور اول شي ع سعر السيارة
ثاني شي لاتنظر اللي يسومون باالردود 
اتصل وسم بخراجك اللي انت تشوف
فعلا هالسيارة تسوا هالسعر
وباالتوفيق

انا مايقهرني الى الي سيارته بالوكاله سعرها مثل الصني 28500
وسيارته ماشيه فوق 30 الف وفيها حكه ويقول مسيومه 25
جلططططه

ومثلا اكسنت 2014 ماشيه فوق 100 يقول سيمت من جاد 23
والوكاله 2017 محصلها ب 33 تقريبا


هم هذول الشريطيه الي سعارهم تفرق عن الوكاله 8 الف بالكثير
ومديلاتهم اقدم

طريقتي في شراء سيارة من حراج : 
اول شيء مثلا ابغى كرايزلر او تورس 
افتج جممممميع الاعلانات لموديل مثلا ٢٠١٤ 

ثم ابدا اشوفها وحده وحده 
واستبعد استبعد لين اوصل لثنتين او ثلاث 

ثم ابدا اقرا الكلام زززين 
ثم ادقق ف الصور 
اعجبتني تمام 

اروح اشوف اخر ردود العضو 
لين الحين تمام 

اروح اشوف وش اسمه في النمبر بوك لا يكون شريطي 
تجي له اسماء ( صالون - كامري - شبح - جمس ) 
هذي اسماء الشريطية في النمبر بوك ههههه 

المهم بعدها 
اكلمه واتس واشوف اسلوبه وسعره هل هو سمح او لا
هل هو مستعجل او لا 
هل هو واثق من نظافة سيارته او لا ؟
ثم اتصال ومكاسرة خفيفة على السعر وليست مكاسرة نهائية 

ثم مقابلة واذا عجبتني بعد التجربة والنظر
ادخلها الفحص 
ثم اذا طلعت تمام 

عاااد هينا تاكدنا من كل شيء وطلعت للسياررة بطططلة وعلى الرغبة
خلاص 
انشب في نحره لازم ينقص لين السعر اللي براسي او قريب منه 
اذا هو من النوع اللي ما يعطيك وجه ولا ينقص لك ريال وواحد
هذا عنااد وعزة نفس والله ما اشتريها ولو كنت ابغاها

لكن اذا نقص لي الف الفين ثلاثة بعضهم لين خمسة الاف فرق عن السوق ينقص لك اذا عرف انك 
صادق ومستخدم ما تضحك عليه وتتكسب من وراه 
فهذا طوالي باشتريها 


لكن اللي يرد البيعه اشياء كثير منها: 
-الوصف المبهم عن السيارة الغامض
-الصور وخاصة اذا عليها تجاليد وحركات بزران وجنوط سود بخاخ
-السومات العالية الغير صاملة 
-ما يكتب رقم جواله عام يبغى لك تنتظر لين يرد عليك خاص وقد لا يرد
-مثلا ردوده السيئة على الاعلانات الاخرى بالنسبة لي تعتبر اكبر كبرر لرفض السيارة 
-بعض العبارات مثلا ( افحص ومثلما تشوف عينك ) هذي اكرهها ، انا انسان ما اشوف شيء ما عندي سالفة علمني اش في سيارتك 
-الحلف الكثيرررر هذا شيء  يصرفني عن الشراء 
-اللي ما ينقص ولا ريال من السعر مهما طلبته هذا يخليني اتركه 
- اذا قال رش تجميلي 
- واذا قال رش خارجي فقط بقدر كف اليد 
هذي اللي اتذكرها فقط 


اشياء تحمسني اشتري :
- التفاصيل المملة عن السيارة تعجبني 
- الصور في النهار من كل الزوايا وداخل خارج والسيارة مغسلة
- اذا قال مرشوش باب او بابين وحط صور للسيارة قبل التصليح وتشوف ان الصدمة خفيفة ما تاثر
- اذا قال صدمة معدلة بدون رش ( بسيط بالنسبة لي )
- اذا اخلاقه زينه وتعامله صادق
- اذا سيارته بشد الوكالة بدون تعديل او اضافة جنوط او زي كذا
- اذا قال كلمة ( اذا طلع شي فالفحص انا اتحمل قيمة الفحص )
- اذا نقص السعر عن السوق ٣ الاف او خمسة الاف او بعضهم الى عشرة الاف 
- اذا قال دق سلف وتوكل مسوي لها صيانة من الصدام للصدام 
زي كذا 

هذي اشياء تخصني انا شخصيا ووجهة نظري 
حبيت اشاركم فيها 

والله ياخوي مدري وش اقولك لاكن انت لاتشتري الا الشيء الي 

يناسبك سعره ونظافته ولاعليك من راعيه كانه شريطي ولا غيره 

الي اخس من كذا الي يسوم ويرفع السعر ولا هو شاري البايع يتمسك بالسومة والشرايه يتركونه تخريب للموقع

مهيب اسعار جنونية إلا اسعار حرامية مع مرتبة الشرف
الا سيارة موديل 2014 ماشية 100 ألف تفرق عن سعر وكالة 2016 حوالي ألفين ريال
ياخي الشريطي الحرامي معذور يلقاله ناس ينصب عليهم

و الله الذي لا إله إلا هو اني شاري قطعة مستعملة أغلى من سعر الوكالة و رجعتها و اخذت فلوسي

حرف الألف حسستني الي يبيعك سيارة لازم ينقلها بإسمك اول وبعدين تتفاهمون على السعر هههههههههه
لكن عجبني ردك اغلبه صح واغلبهم كله اعلانات مبهمة على اساس ان الصامل لازم يتصل عليه هذا نظامهم كذا

انا طريقتي في الشراء مريحة اذا عجبني الشكل وكل شي و جربتها بنفسي اروح افحصها وانتهى الموضوع و لا استناه يعلمني وش مشاكل السيارة

بعضهم سيارته معروضة من 9 أشهر وجابت سعر ممتاز وما باع وتسأله عن السيارة يقول لك موجودة وينتظر سومة أعلى

الغالبية في الموقع شريطي نصاب أو شخص غير جاد في البيع أو بزر يسوم كل السيارات

الله المستعان

اغلب الموقع شريطيه وبعضهم مايخاف الله ولايفكر في حلال او حرام فيه معرض سيارات حاط اعلان لمازدا 6 مستخدمه وحادها ب51 الف بالله من اللي بيشتريها بالسعر ذا

الله يهديهم ويفك المسلمين من شرهم.

مانت سالم منهم هنا ولا بالمعارض.

اذكر مرة بمعارض النسيم اول ماخشيت ساموا سيارتي بمبلغ 42 الف وانا كنت متوقع 40 او 44 كحد اقصى ولما سمعت سومتهم صراحة طمعت قلت ممكن تجيب اكثر والله الذي لااله الا هو انه يومين ورا بعض كل من قلت له السومه قال الله يرزقك.
واخذت فرة عالمعارض وشفت سيارات انظف من سيارتي واقل ممشى معروضة ب 38 حسبي الله عليهم واخر شي بعتها بشق الانفس 34 صافي لي.