أضف سؤال أو موضوع جديد          

مهم جدا .. خبره 5 سنوات في استخدام الازيرا والكادينزا

up 30 down 5
ابو هيثم 7 2065
قبل سنه و 4 شهر



بسم الله الرحمن الرحيم

السلام عليكم ورحمة الله وبركاته

الموضوع ذا كتبه الاخ محمد الجهني بقروب الكادينزا واستأذنت منه ونسخته للفائده فقط

من خبرتي البسيطه والمتواضعه بعد استخدام لخمس سنوات لكيا كادينزا هذي بعض خطوات الصيانه لها (( طبعا الكادينزا من 2011 وفوق والازيرا 2012 وفوق نفس بعض بكل شي عدا الشكل الخارجي + الديكورات وبرضه سعه المكينه اللي اختلفت لكن توحدت للسيارتين بالشكل الجديد ))

1/ اهم شيء زيت المحرك :
لزوجته 5w30 وتاكد يكون التصنيف يكون (SN ) لو كان الزيت تخليقي بالكامل (صناعي) افضل .. فلتر الزيت ضروري يغير مع كل تغييره زيت لانه ضعيف ولا يتحمل [[ سواء غيرته على 5 الاف او 10 الاف بس تأكد انه اصلي ]] كيف تعرف الاصلي يوجد عليه ثلاث اختام للجوده ورقم الفلتر مسجل عليه وهو 26330 3CAA0 وسعره 25 ريال

طبعا كميه الزيت للمحركات كالتالي :
موديل 11 للكادينزا وموديل 12 للازيرا حتى 13 الكميه 5.2 لتر

موديل 14 حتى 16 للكادينزا و 17 للازيرا الكميه 5.7 لتر

موديل 17 للكادينزا و 18 للازيرا الاول محرك 3.3 ام بي اي اللى يجي على الاستاندر والنص فل الكميه 5.7 لتر ومحرك 3.5 جي دي آي اللى يجي على الفل كامل 6.5 لتر

2/ فلتر الهواء كل 15 الف او 6 شهور :
هذا حسب كلام الكتالوج في الاستخدام العادي .. وفي الاستخدام الشاق يقول غير عند مرات اقل .. تأكد انه اصلي وهذا رقمه 28113 3S100 او اللى يجي نهايته P100 كمان نفسه ويركب طبعا سعره رخيص 40 ريال

3/ فلتر المكيف كل 15 الف او 6 شهور :
برضه نفس الشئ هذا كلام الكتلوج في الاستخدام العادي.. وفي الاستخدام الشاق يقول غير عند مرات اقل .. الاصلي بالرقم التالي 97133 3SAA0 وسعره 50 ريال عند منيف النهدي هونداي

4/ اضافات الوقود كل 40 الف
اما مانسميه منظف البخاخات الكتالوج يوصي في اضافات للوقود وطبعاا الجبر موجود عنده منظف هذا رقمه 080C7 20015 وسعره 75 ريال لكن للاسف لايوجد عند وكلاء هونداي !!!

اللى مايحصله بالامكان استخدام منظف ثاني لكن ركز على شركه معروفه او منتج امريكي او الماني .. وتأكد كمية العلبه كم تكفي ويجي مكتوب على العلبه .. الموترين التانكي حقها 70 لتر بس خل التانكي يفضي وصب المنظف وفلل السياره طبعاا لاتعبي حتى يفضي التانكي عشان كل المنظف يستهلك تقريباا ويفضل انه مايطول كثير .. يوم يومين وانت مخلص البنزين

5/ زيت الفرامل يتغير كل سنتين :
زيت الفرامل لو نقص ولا يوجد اي تهريب او مشكله في نظام الفرامل فهذا يدل ان الاقمشه (فحمات/بريكات) بدات تنتهي ولا يزود نهائي لانه لاغيرت فحمات جديده راح يرجع لمستواه الطبيعي طبعاا انا غيرته بنظام الشفط عن طريق تنسيم الكفرات الاربع والنوع اللي استخدمته DOT4 من قطع غيار مرسيدس الجفالي وسعره 60 ريال والعلبه 1 لتر وليست مثل العاديه اللي تجيك ثلث لتر بحجم علبه البيبسي

6/ زيت الطاره (الدركسون)
طبعاا لو نقص يتاكد انه لايوجد تهريب ويزود بزيت اصلي .. ينصح بتغيره بالفترات الطويله ولم اجد ممشى معين ينصح فيه الكتلوج .. على العموم تأكد انه الجيل الرابع ويجي مكتوب Ultra ASF_4 شبيه بعلبه زيت القير الزرقاء لكن انتبه تلخبط بينه وبين ASF+4 هذا مخصص للدوج تشارجر والكرايسلر وليس الازيرا والكادينزا

7/ زيت القير كل 100 الف للاستخدام الشاق :
الزيت من الجيل الرابع ويعتبر من افضل الزيوت وبسببه حصلت هونداي على برائه اختراع ويتغير بدون فلتر .. الفلتر داخلي ولايتغير الا في حاله التوظيب لاسمح الله .. الكميه 4 علب العلبه الزرقاء فقططط واسمه ATF SP-IV وانتبه لاتخلط بينه وبين الجيل الثالث ATF SP-III

8/ ماء الاديتر :
حسب كلام الكتالوج اول مره 200 الف وبعدها كل 40 الف .. تحتاج جالون واحد فقط .. ونرجع نقول ضروري وضروري تستخدم ماء رديتر كيا او هونداي الاصلي فقطط ولايحتاج لتخفيف لانه مخفف وجاهز ..طيب بعدين متى اغيره انا اقول قبل كل صيف غيره بعد اول تغيره تراه رخيص الجالون ب 40 ريال

ملاحظه مهمه // يفضل لو تغير غطاء الاديتر بشرط يكون الغطاء الاصلي وتأكد ان ضغطه 1.1 وليس 0.9 التجاري .. اللى موتره موديل قديم يغيره بأسرع وقت بس نرجع ونقول لازم نفس اللى على السياره ولونه برتقالي سعره 25 ريال [[ تحت غطاء الاديتر فيه جلده مضغوطه باحكام لسنوات طويله ف لاتستغرب لو انفكت ماعاد ترجع مثل اول ويبدأ التهريب علشان كذا انصح بتغييره ]]

9/ البواجي كل 160 الف :
الاصليه بكرتون كيا او هونداي نوعها ليزر ماهي العادية من شركه NGK وهذا رقمها 18846 11707 سعر الطقم 160 ريال 6 حبات

10/ فلتر الوقود (صفايه البزين) كل 50 الف
اي صفايه تجي في تانكي البنزين عمرها الافتراضي طويل ولاتتغير .. انا غيرتها للحرص فقط على ممشى 150 الف وكانت سليمه وسعرها 45 ريال

هذا تقريبااا الاشياء الاستهلاكية اللى لها عمر محدد ولا بد تغير بعد فتره معينه
_____________________________________

طيب القطع الاستهلاكية زي الفحمات والمساعدات والجلد والكفرات وغيرها هذي مالها عمر محدد تغيير اذا استهلكت او تعطلت

بعض الصيانات اللى يسويها المستخدم بسيارته
تربيط ووزن السيارة بين كل فتره وفتره يعني كل 6 شهور او سنه بالكثير

بوابه الهواء( الثروتل )
بوابه الهواء تتنظف كل فتره يعني كل 50 الف او 6 شهور مثلا (( هذا للي بيمسك خطوط ويواجه سافي بشكل يومي مثل خط الساحل وخط الشرقيه )) طبعاا اللى يغير فلتر الهواء بنتظام بيلاقيها نظيفه مجرد شغل بسيط فقط

طريقه تنظيفها بطريقتين
الاول فتح هوز او لي الهواء وبخ منظف عليها او على قماش وتمسيحها وتنظيفها وتنظيف المنظف تنظيف جيد .. اما الثانيه وهي الافضل : تفك البوابه كامله وتنظفها برا وتخليها تنشف وترجع تركبها بنفسك ماراح تاخذ منك نص ساعه

طبعا كل الطريقتين لاتنسى تفصل اصباع البطارية السالب قبل كل شي .. بعدين لما ترجعه لاتشغل السياره لا افتح السويتش شغل اللمبات خل السياره تفحص وحبذا تكرر مره ثانيه بعدها شغل .. برضه فيه حساسات ثانيه مثل الحساس اللي قبل البوابه جهت قربه الهواء واثنين بعد البوابه يفضل تفكهم وتنظفهم ببخاخ خاص بالالكترونيات

فتحه السقف (البانوراما)
هذي من الاشياء الضرورية اللى يجيب عمل لها تنظيف دوري .. من مشاكلها بعد فتره تصير ثقيله في التقفيل والسبب يكون من مجرى البانوراما الخارجي اللى فوق السقف ف ضروري يتنظف كل فتره ويتزيت ببخاخ خاص

طريقة التنظيف تكون كتالي
المسار الخارجي الذي فوق سقف السياره اول تبخ فيه منظف ومزيت خاص مثل Q20 بعدها تحاول تنظيفها لكن بشيء لايقطع الربل اللى فيها وبعدها تتشحم .. المسار الخارجي يتنظف ويتزيت كل فتره لانه هو سبب عدم تقفيل البانوراما وكذلك الثقل فيها .. برضه المسارات الداخليه ومسار الستاره الخاصه بالسقف كلها تتنظف اولا بالمنظف او البخاخ وبعدها تمسح وتنظف وتشحمها ويفضل الشحم الابيض وكلها موجوده في ساكو

انتبه تنظف البنوراما في بخاخ الاسي ديلكو !!! لانه ينشف الجلد وبعد فتره طويله تيبس الجلد وتتقطع !!! لابد البخاخ يكون منظف ومزيت ومشحم بنفس الوقت مثل Q20 او اي بديل له نفس عمله

طبعاا هذه اغلب الصيانات اللى يسويها المستخدم بسيارته

_____________________________________

الان نجي لبعض المشاكل البسيطه وطريقه حلها
 
طقه القير هذه طبيعه ولا منها خوف ولا فيها اي مشكله طبعاا هو يرجع مسمار الامان مكانه فقط

نتعه القير اولا فصل اصابع البطاريه ثانيا البرمجه ثالثا تغيير قطعه حساس القير موجوده فوق القير وسعرها 90 ريال

خروج بطانه الكفر خصوصا في موديل 14 الى 16 حلها اثنين او ثلاث مسامير وتثبتها بطرف الصدام من داخل

احياننا الابواب اذا فكيتها تسمع صوت طقه هذا ذراع وبعض الناس يسميها الفصالات .. الحل تبخ عليها بخاخ وتنظفها جيدا وتسوي الطريقه مع كل مفصلات الباب وكذلك قفل الباب واللقمه حقته

اللي يسأل عن الكمبروسر ومشاكله انا مخصص له موضوع كااامل اسمه [[ مهم جدا .. عدة حلول لمشاكل التكييف بالسيارات الكوريه ]] اضغط على اسمي وتحصله ثاني موضوع وان شاء الله يفيدك

الموضوع من اجتهادي وخبرتي البسيطة وان شاء الله اني غطيت فيه كل شيء والموضوع من باب رأيي الشخصي ولا اجبر احد انه يسوي نفس الشئ .. طبعاا ذكرت بعض الصيانات ماذكرها الكتالوج لان هذا اللي اشوفه مناسب من خلال استخدامي الطويل للسياره .. والسلام عليكم ورحمة الله وبركاته
















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


معلومات دقيقه .. واحب اضيف عندي كادينزا 2014 وكانت لما توقف المكيف مايبرد تمام وتم تغير 3 حساسات عالضمان وماشاء الله المكيف رجع تمام لمن كل يشتكي من هالحاله


up 5 down 1
camaro28 752
قبل سنه و 4 شهر



الله يعطيك العافيه موضوع حلو من شخص مبدع
ماشاءالله عليك كل مواضيعك حلوه كل ماشفت موضوعك
كأني اشوف مواضيع الرفاعي مواضيعكم تفتح النفس

بالنسبه للموضوع الي يعجبني فيه انه دقيق جدا جدا
بكل شئ وهذا شئ مهم بالنسبه ولغيري
واحب المواضيع الي مفصله تفصيل بالارقام ودقيقه


بس اشوف اغلب الصيانات الي يسويها خويك بدري عليها
واشوفها وسوسه كل 10الاف فلتر هواء ومكيف
ومنظف تانكي هذي وسوسه
انا يالله يالله ادفع قيمة الزيت عشان ادفع على ذي الاشياء
لكن هو سيارته وحر فيها

وبوابة الواء اشوف تنظيفها كل 6شهور قليله مر مره
وش الفايده يغير الفلتر كل 10الاف وبالاخير ينظف
البوابه كل 6شهور او50الف كم هذي وسوسه
وخساره على الفاضي

والبواجي كل 80الى100قليله البواجي افضل شئ
انه يغيرها اذا صار تقطيع بالسياره ﻻنها ماتضر اذا مشى عليها
اذا شاف تقطيع يغيرها على طووووول
بواجي سيارتي مغيرهم فوق ال200الف وماشاء الله ﻻتقطيع وﻻشئ

الزيت اشوف تغييره مناسب على80الف

اما موية الرديتر لو كل سنتين افضل من كل سنه
طبعا اذا كان يمشي كثير بالسنه هذا شئ ثاني

هذا الي عندي وكل واحد حر بسيارته ان شاءالله يطقم
لها مكينه وقير كل سنه هو حر بحلاله
بس بالنسبه لي هذي وسوسه

حلاوة السياره الجديده ماتحط عليها صيانات وﻻشئ
مجرد زيت وبنزين


up 7 down 2
d7ooom777 426
قبل سنه و 4 شهر



الله يعطيك العافية يا أبو هيثم
بس حبيت استفسر منك انا عندي سيراتو 2012 مكينة 1600cc بغير ماء الرديتر هل رح تكفي علبة وحدة ؟؟


up 2 down 0
ahmad akk 554
قبل سنه و 4 شهر



+1 لرد كومارو .،، تم تغيير حساس المكيف ع الضمان لموتري سوناتا 2014 ويارب لك الحمد رجع ممتاز ما شاء الله تبارك الله. 


up 2 down 0
alshehri-507 98
قبل سنه و 4 شهر



ويعطيك العافيه اخوي ابو هيثم على المعلومات المفيده  +1.


up 2 down 0
alshehri-507 98
قبل سنه و 4 شهر



اخوي camaro28 مشكور على الاضافه .. وحياك الله

اخوي d7ooom777 انا اعتبرها زياده حرص ولا اعتبرها وسوسه ي بعدي لكن المشكله هل ممكن تطبق على جميع السيارات !!

يعني مثلا اذا هو يغير الفلاتر كل 10 الاف انت احسبها الممشى الطبيعي للسيارات من 40 الى 60 الف سنويا .. والفلتر الواحد ب 40 ريال يعني اذا غير 4 فلاتر معناته خسر 160 ريال فقطط

تجي تقارن السعر مع شركه اخرى متوفره بكل مكان حتى بالبقالات ونقول فلتر الكورلا ب 250 عند ابو جميل !!! هل صاحب الكورلا فاضي يخسر 1000 ريال سنويا على فلاتر هواء ومثلها لفلاتر المكيف اكيد الجواب لا

هذا وهي كورلا فما بالك بالافالون بحكم انها نفس مستوى الكادينزا والازيرا .. للعلم الاسعار اللي ذكرتها بالموضوع اسعار موزعين معتمدين يعني اصلي 100% واللي عندهم ب 40 عند الوكاله ب 80 .. نفس الشي الكورلا عند ابو جميل ب 250 وممكن تحصل عند الموزعين بنصف السعر




up 2 down 0
ابو هيثم 7 2065
قبل سنه و 4 شهر




اخوي ahmad akk نعم يكفي لانه جالون مقداره 3.75 لتر

اخوي alshehri-507 مشكور على التعليق والاضافه وبرضه ع الايك ولك مثله



up 1 down 0
ابو هيثم 7 2065
قبل سنه و 4 شهر



و عليكم السلام ورحمه الله و بركاته
ما شاء الله موضوع وافي وواضح عن خبرة طويله شكرا على المعلومات


up 0 down 0
ابو تركي1401 -195
قبل سنه و 4 شهر



ابو تركي انت إبراهيم التركي مسوي عضو جديد؟؟؟؟


up 0 down 0
نواف الحربي4 334
قبل سنه و 4 شهر



ابوهيثم الله يعطيك العافية ويوفقك شكرا على الموضوع الاجمل من حكايه 


up 0 down 0
نواف الحربي4 334
قبل سنه و 4 شهر



موضوع جميل
اخ نواف شكله هو هههههههه


up 1 down 0
fowad 127
قبل سنه و 4 شهر



يعطيك العافيه علي الموضوع المفيد و المعلومات القيمة
لكن بخصوص زيت الدركسيون للاسف غير متوفر لا بالوكالة او بمحلات قطع الغيار
وكالة الكيا بالصيانة يستخدمون زيت كاسترول ديكسرون 3 (CASTROL ATF DEX III)
و هو مخصص للقير و الدركسيون معا للسيارات الأخري





up 0 down 0
neo ksa
قبل سنه و 3 شهر



السلام عليكم اخ ابو هيثم ايش الفرق بين الزيوت يلي عليها اعتماد ديكسوس والزيوت ما عليها اعتماد ديكسوس ؟


up 0 down 0
ahmad akk 554
قبل 11 شهر



الله يرضى عليك يا أبو هيثم ويجزاك الجنة والله أني استفدت جداً من طرحك للموضوع


up 0 down 0
البنا33
قبل 6 شهر و 2 أسبوع