دورتي بعد اسبوع وهويتي منتهية

وعليكم السلام
خل وضعك طبيعي وكانك ماتدري انها منتهية
اهم شي تباشر وتمشي امورك
ولا طلعت من عندهم بعد شهرين ولا ثلاثة
ضبط امورك
انا سئلت عسكري في التدريب
وقال ابد لايقول شي وما بيردونه عشان بطاقه منتهية
واذا اسئلوك قولهم مادريت وباذن الله بجددها

بيدخلونك للدوره وبتحصل ناس معك الي بطاقته ضايعه والي منتهيه بيخلونكم تخشون الدوره وثاني اسبوع بيشلونكم بيشيلونكم بباص للاحوال المدنيه عشان تطلعون جديده والي منتهيه يجددونها له

حاول تتسلف وتضبط امورك الاسبوع هذا عشان ماتطير عليك الوظيفه  عشان لو شالوك عالاحوال بعد اسبوعين مايلقون عليك ايقاف خدمات 

مادام الوظيفة مضمونة ياغالي سدد الدين وفك الخدمات ضروري عشان لاتنحسب عليك سابقة وتروح الوظيفة

الدين ما اقدر اسدد الا بعد ٥ - ٤ أشهر للأسف على ما تكمل المبلغ
يعني فاتتني الوظيفة؟
طيب اذا فاتتني وش اسوي عشان ارجع مرة ثانية ؟

اذا انت بالرياض تخلص هويتك في خلال اسبوع اذا انت في اي منطقه اسبوعين

اذا تقول بتسدد بعد ٥ شهور تسلف من اي احد وقوله بعد ٥ شهور ارجعهم لك وضبط امورك عشان تكون في السليم ومرتاح البال

من قال يا سكودر تخلص باسبوع!!
بطاقتي منتهيه قبل 7شهور
واقرب موعد كان بعد 3اسابيع
والبطاقه الجديده استلامها بعد
اسبوع او اسبوعين الناسي
يعني يبيلك 3اسابيع الى شهر وتكون البطاقه الجديده بيدك

هذا اذا البطاقه منتهيه قريب
اما اذا من زمان لازم تراجع مرور الوشم

السلام عليكم ..
اخوي راجع محكمة التنفيذ يرفعو عنك ايقاف الخدمات لتجديد البطاقة ويرجعوها

والله يوفقك ويسهل امرك

ما أتوقع راح يدققون في صلاحية الهوية هل هي منتهية أو لا ولا راح يرجعونك عشان البطاقة منتهية وبالنسبة إذا قصدك بتعطيهم حساب في أي بنك عشان تنزل المكافآت أو الرواتب راح تنزل رواتبك لكن ماتقدر تسحبها وفي حال مانزلت رواتبك راح يخاطبون مكان الدورة بإبلاغ المذكور لمراجعة كذا وإنهاء موضوعه ومن هذا الكلام
لكن أنت أهم شيء ادخل الدورة وداقش مع خوياك والله يعينك ويسهل دربك وبإذن الله تتسهل أمورك وتزين

معقولة بطاقة الهوية تتأخر ٣اسابيع حنا في سلطنة عمان خلال ٥دقايق تطلع البطاقة 

للتوضيح
١- ما اقدر اسدد الا بعد ٥ شهور من ناحية تسديد ما في نقاش فيها
٢- ما اعرف احد يرفع إيقاف الخدمات وانا من سكان الرياض

يا اخوان اسألوا إخوانكم أو زملائكم عساكر ابي العلم الأكيد

واللي ماله علم لا ينساني من دعائه .. دعواتكم

نفس كلام الاخوان لاكن ماطلبو مني يومي فالدوره الا بس حق البنك

 ي صاحبي بالنسبه للدوره دخلت سنه كامله والى احد سالني عنها
والى قالو وينها 
الى يوم البنك يجون ياخذون  يطلعون لك صرافه 
وبعدين متى ذا الكلام بعد الدوره بخمس شهور يمكن 
وبعدين اسحب عليهم لقالو لك عطنا اثباتك علشان صرافه 
قلهم ناسيها وخلاص بعدين اطلع لي لطلعت وبس

اولاً الله يرزقك وييسر لك امرك ويفرج همك. 

بالنسبه للوظيفه روح لهم. وادخل معهم بالدوره 

من ناحيه الهويه منتهيه مااتوقع يدققون فيها 

اما رقم حسابك الايبان. هذا لاتشيل همه ابد

عادي تعطيهم  رقم الحساب. وهم ينزلون لك المكافئات 

عليه. بس ماتقدر تسحبها. الين تخلص موضوع المحكمه 

شوف. انا توي كلمت اخوي. سئلته. عن موضوع الهويه 

وعن الحساب. 

طبعاً هو متخرج من الدفاع الجوي. قبل سنتين تقريباً 

قالي. اول ماحظرو للدوره. ماطلبو منهم اثباتهم. ولا شي 

العسكري عنده كشف فيه اسماء الطلاب. يحظر كل الموجودين 

وبس. بعد ماطلعو من ال ٤٥يوم. الاولى.  ورجعو بعدها بااسبوع 

جاهم موظفين من البنك الاهلي. وطلبو منهم البيانات 

الي هي. بيناتك الشخصيه. صوره من الهويه. 

مع انهم عندهم صرافات وحسابات لبنوك ثانيه. 

بس. الدفاع الجوي.  رفض. وقال المكافئات اثناء الدوره 

تنزل على حساب بنك الاهلي.  وفتحو لهم. حسابات. 

وبعد الدوره. الي يبغى يحول لبنك ثاني عادي. 

----------------------------------------------------

هذا بالنسبه للدفاع الجوي. طالبين حساب بنك الاهلي 


اما القطاعات الثانيه. ماعندي علم. هم يقبلون اي. حساب 

في اي بنك. ثاني. او لااء 

من ناحيه بطاقه الاحوال. عادي. جداً.  ماراح يدققون فيها. 

لاكن اذا. بعد فتره. سئلوك ليش منتهيه وماجددها. 

قول لهم حجزت موعد. بس جا موعد الدوره قبل موعد الاحوال 

انت اهم شي. تدخل الدوره معهم. وتكمل. ال٤٥ يوم الاولى 

علشان تكون بئذن الله. تمكنت من الوظيفه.  والباقى سهالات ان شاءالله 


وايقاف الخدمات. ولد عمي. كان عليه ايقاف خدمات 

قبل سته شهور.  وماقدر يجدد بطاقه احواله. 

وحسابه بالبنك. مايقدر يسحب من راتبه الا ٢٠ فالميه من الراتب 

كان. ينزل له راتب ٣٨٠٠ وكان يروح البنك ويسحبون له

٢٤٥٠ريال تقريباً. 

والحمدلله قبل اسبوع. سدد الدين الي عليه. بالمحكمه 

وعطوه خطاب لمؤسسه النقد. عشان يفكون حساباته 

وبعد يومين فكو الحسابات. والحمدلله. انحلت مشاكله

فاانت. لاتشيل هم ولاتتردد بالوظيفه روح وحظر معهم. 

ويئذن الله امورك تتسهل. ان شاء الله. توكل على الله. وماراح تلاقي الا كل خير

واسف جداً جداً على الاطاله.  بس الموضوع شدني. 
وحبيت افيد هالرجال. والله ييسر له مافيه الخير 

جزاك الله خير جواب كافي و شافي
وان شاء الله تتيسر الأمور

اذا عليك ايقاف خدمات وما تقدر تسحب راتبك من البنك.
تمر البنك وتسحبه كاش يعطونك 67% من اجمالي راتبك كل شهر وهذي سالت فيها واحد شغال في بنك الاهلي.

وش صار على دورتك

حسام اسأله بآخر موضوع له