برنامج كريم او اوبر

ناس كثير يمدحوها الاثنين عموما تقدر تشترك ك سائق ومتى ماحبيت تشتغل شغل البرنامج طبعا هم كوسيط بينك وبين الراكب ولهم نسبة اعتقد من كل مشوار 25‎%‎ او اقل 

فيه تطبيقات كثيرة الان 
فيه كريم
اوبر
مرسول
تمت
مرني
الدخل حسب جهدك ونقطة لازم تعرفها التعامل مع الناس يبي له صبر وطولة بال بعض الناس يعجبك بتعامله وسماحته وبعض الناس الله يعين يجيب لك المرض وعلى باله انه اذا دفع فلوس خلاص صار ملك ونسي انه دفع فلوس مقابل خدمة وليست صدقة او منحة منه

وكلامي من تجربة

وبالنسبة للدخل انا اوصل طلبات عن طريق مرسول دخلها اذا تشتغل وتتعب جيد واذا انت مثلي اوصل ثلاث او اربع طلبات باليوم لتغطية المصاريف الجانبية

طبعا تمت لتوصيل الطلبات 

ومرني يطلبه اللي تتعطل سيارته ويبي اشتراك او بنزين او تغيير كفر وقس على ذلك

ميزة مرسول وتمت ومرني شروطهم ميسرة ولافيها تعقيد ويقبلون اي سيارة

وبالتوفيق

طيب لا هنتم وش الفروقات بالنسبة للي بيشتغلون بين كل واحد منهم؟

الفرق ان كريم عندهم غرامات ومخالفات على السائق مثل انك ما تحط اكياس على الوطايات وما تلبس بدل رياضيه ولو اشتكى عليك عميل ممكن توصل الغرامه الى 300 او يحذفونك من البرنامج حتى لو كنت مظلوم طبعاً فيه مشكلة بكريم وهي ان بعض الناس يدفع بالفيزه والشركه تماطلك ولا تعطيك حقك وناس كثير تشتكي منهم
لكن بعضهم يمدحون اوبر والصراحه ما جربته لكن نصيحه اذا كنت تخاف على موترك وعصبي ابعد عن هالشغله لانها بتتعبك

بالنسبه للمدخول انا اقدر اقولك انه يفك ازمه يعني ممكن يضبط حق يومك عشاك وفطورك واشياء زي كذا لكن انه دخل تقدر تعتمد عليه وتجمع منه صعبه جداً الا اذا كنت راعي فره وفااااااااضي

انا اشتغل في اوبر وياخذون ٢٥% من قيمة المشوار ويكون دين عندك 
تحط رقم الفيزا ويسحبونه مثلا قيمة المشوار ٨ ريال ياخذون ٢ ريال 

انا شغال ف اوبر ف مكه المكرمة بصراحه في شغل اذا انت صبور يعني احيانا يجيني مشوار ف اخر الدنيا واروح له ف الاخير يكون يبي البقاله ولا شي قريب منه ويطلع حسابه 8 وابر ياخذون ريالين يبقى 6 ريال ولا حق المشوار واغلب اللي ف مكه كذا يعني ساعات فيها خير وساعات لا انت ورزقك بس مافي ضرر تسجل انا اللي اطلعه ف اليوم يروح بنزين ومصروفي اليومي بس

انا اشوف ان نسبت اوبر كبيرة جدا ٢٥ في الميئة من قيمّت المشوار اصلا المشوار مخفض لجذب العملاء مثال تأخذ راكب من الصالة الشمالية بجدة الى الحرم ب ١٥٠ ريال نسبة اوبر ٣٨ ريال يعني اللي لك ١١٢ ريال يعني تعبي بنزين ب ٣٥ ريال حق المطار يبقى معاك ٧٧ ريال طيب عندك زيت عندك كفرات وتعبك هل هذا عدل انا كنت اشتغل في الاثنين كريم وأوبرا وسحبت عليهم اشتغل برا بسيارتي افضل لي احمل من المطار الى الحرم ب٣٠٠ ريال هذا سعر السوق طبعا كلها في جيبي بدون نسبة ولله الحمد ولكن سمعت ان في تطبيق اسمه كابتن جديد وهو لشباب سعوديين ونسبتهم جدا ممتاز فا ابن بلدي يستحق الدعم ،،،،