أضف سؤال أو موضوع جديد          

مهم جدا .. قبل ماتشتري بطارية تعال شيك على الموضوع

up 20 down 3
ابو هيثم 7 2253
قبل 3 سنه و 5 شهر



السلام عليكم ورحمه الله


كتبت هذا الموضوع يوم شفت الغش والضحك عند البناشر ومحلات البطاريات على الشعب

اول حاجه اغلب الناس اذا سألته وش بطاريتك قال راعي البنشر يقول 80 امبير ؟؟؟ هل تعلم انه لا توجد 80 امبير نهائيا بالسوق ولا عمري شفتها تباع مع اني حريص وطاردت ورى وكلاء بطاريات السيارات مثل ابن شيهون وباقادر قالولي لا تتعب نفسك ؟؟ او يقولون موجوده واذا تحققت من الارقام عرفت ان ماعندهم سالفه

1/ رمز البطاريه يجي ارقام مختلفه أشهرها على الاطلاق هو 80D26L وتشوفه بأعلى البطاريه مكتوب بالخط العريض .. وراعي البنشر مستعد يحلف ويقسم ان هذي البطارية 80 امبير وبالحقيقه هو ترميز ياباني مخصص لمعرفه ابعاد وزوايا البطاريه ومعرفه اتجاه القطب السالب طبعا يجيك يسار (( Left )) ومن هنا جاك حرف L

بعبارة اخرى هالرمز 80D26L كأنك تقول مقاس هالكفر هو 16 وتسكت ؟ طيب وش اسم الشركه + اسم الدعسه + مواصفات الكفر ..... الخ هذي تحتاج شرح اكثر ومستحيل مستححححيل تعرفها من ذا الرمز فقطط

2/ تأكد من طاقه التشغيل البارد لازم تكون فوق 600 اذا موترك 6 سلندر ويرمز لها بالرمز (( CCA ))

3/ اهم حاجه من وجهة نظري هي معرفه حجم الامبير ؟ بتحصل رقم وبعده مكتوب AH بمعنى (( امبير بالساعه )) هنا لا تستغرب ان اللي حلف لك واقسم لك انها 80 امبير تطلع 65 فقطططط !!!

4/ اذا شافك فاهم النقطه الاخيره قالك لا لا هي اصلا 80 امبير بس تطلع 65 ههههههههههههههه ويحاول يسوقها عليك ان هذا الحد الاعلى والحد الادنى وللاسف بعض الناس تصدق .. هذا امبير دايم مضبوط مهوب فولت علشان يطلع وينزل

5/ طاقه التشغيل او التدوير البارد مهمه جدا بوقت الشتاء خصوصا لان الموتر يحتاج كهرب اكثر بالاوقات الباردة .. خذها قاعده كل مازادت هالطاقه ذي ب يزود الامبير

6/ اغلب البطاريات ام ضمان سنه تراها معدومه ؟ الممتازة فقط هي ضمان سنه ونص وسنتين وهي تعد على اصابع اليد الواحده ؟

طبعا أسوأ الانواع من تجربه هي اي سي ديلكو .. اول شي عمرها الافتراضي قصير ثاني شي تجمع كربون حوالين الاصباع ولاتستغرب لو طفى الموتر عليك فجأة وانت تمشي لضعف توصيل الكهرب بسبب الكربون المتراكم

البطاريه الثانيه سيئه برضه لكن افضل السيئين على قولتهم وهي هانكوك وعيبها تختم فجأة وملعونه جدف سببت لي ضعف بدائرة الكهرب وانا ماأدري ؟؟؟ تصدقون بأيامها الاخيرة اضعفت الليد وطفى مثبت السرعه واحرقت علي كتاوت المروحه طبعا كلا البطاريتين ضمان سنه

المعذره حاولت اضيف صور شرح كامل لانه باعتقادي الموضوع مايكتمل بدونها لكن فيه مشكله بالموقع وهي عدم تحميل الصور .. بحاول اضيف روابط او احدث الموضوع بعد فترة اذا انحلت المشكله







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


الله يوفقك موضوع رائع وانا مريت بنفس التجربة بالضبط ، شرح وافي وكافي


up 0 down 0
a11a66a11
قبل 2 سنه و 4 شهر



الله يوفقك موضوع رائع وانا مريت بنفس التجربة بالضبط ، شرح وافي وكافي


up 0 down 0
a11a66a11
قبل 2 سنه و 4 شهر