فتك ربع او ربع تويوتا

نصيحتي لا هذا ولا هذا...

شف الرُبع له هيبته...وله استخداماته..ما اختلفنا

لكن سجل عندك:-
1-شفط بنزين...اكثر سيارة في تويوتا تستهلك بنزين..اللتر يمشيك 7 كم فقط!!!!
وانت عارف ان البنزين بيرتفع...بعدها بتتوهق بالبيعه...واذا خليته بتتوهق بصرفيته

2-صغر الحجم...يالله يشيل عزبة الشاهي وخوي واحد...يمكن اكون مبالغ لكن المقصد مايشيل ولا ينفع للعايله

3-القير عادي...مافيه منه تماتيك...لاتقولي القير العادي فيه وفيه
التماتيك الان اثبت جدارته وقوته

4-سريع الانقلاب....موقع حراج والتشاليح تشهد بذلك.

......الخ

انا اقول اذا مقرقش وماتهمك الفلوس خذه ولاتخلي شي بخاطرك

اما اذا اقساط وغربله...فلا.....تستانس اول شهر...بعدها تسوقه وانت تبكي خخخخخخخ

البدائل.....الفورتشنر...البرادو...الاند الهدد.

والله اعلم...

وعليكم السلام

انا لو احترت بين تويوتا وسيارة ثانية باخذ تويوتا الا الربع يانيسان ولا بلاش صحيح صرفية بنزين وماتقدر تعتمد عليه كسيارة أساسية ولكن مابتدور جيب شبابي بعده خصوصا فتك رفارف سود تماتيك تبترونيك

كان عندي 2013 ربع تويوتا ابرز عيوبه

يحن من نمرة لنمرة وماتحس ان فيه بينهم لابد تعشق كل شوي عشان ماتسمع صوت الحنة

سيارة قاسية والمقاعد تحسها بتنفك مع البطناج

فراغ بالطارة يعني مو مسطرة تحتاج توزن وانت تسوق ولا بيقلبك

هذي تجربتي معاه اقل من سنة مع العلم الجيب جديد يعني الي ذكرتها ليس سوء استخدام

وكل شخص له نظرة فيه ناس يتغاضو عن هالملاحظات وفيه ناس يخلص نفسه مثل حالتي

واسعارهم اصبحت قريب جدا من بعض 40 الف تجيب لك ربع سواءا نيسان او تويوتا 13 وفوق يكون وردة مامشى شئ

وبالتوفيق ان شاء الله

اخونا صالح
و يارب توفيقك افادوك

مانزيد عليهم شي
نصيحه لوجه الله
انحش عن الربع ومن على شاكلته
بالسوق الان الشاص الربع الجيوب عامه ماحد يلتفت لها
البنزين جعل الناس تتتجه لسيارات اللي ماتصرف
صغيره او غيرها واذا تبي جيب ولابد
على الاقل برادو ولا اعلم عن صرفيته
لاكن على الاقل افضل من الربع بانواعه
نصيحه اعرف كثير تخوبرو بالشاص والربع نيسان تويوتا
يطبون السوق مايفتح بابه ولا بهل له
لا وتبي تاجير وربع بتروح ملح
نصيحه نصيحه

لا وتبي فتك مكينته 4800 يعني بلع بنزين
السكويا وقفه ابو جميل مكينته 5.7 يصرف
الاف جي وقفته تويوتا لصرفه و سوء شكله
بعدين الربع بشكل عام ماياخذ عائله صح اليوم شباب وحدك بكره عندك عائله
ايش تعمل تبيعه بخساره وتشتري غيره
اعد التفكير البنزين ........

ذكرتني اول كان معي باجيرو 3500
جديد 2015 مطلعه كنت اقساط
قسطه ١٦٠٠ و اداوم يومي ٤٠٠ كل يوم افلله ب٦٠
غير نهاية الاسبوع يعني بنزين اكثر من ١٢٠٠
يعني تقريبا" ٣٠٠٠ ريال شهري مع تغيير الزيت !!!

مدري كيف كنت متحمل الخساير بس عزوبي ما عندي مصاريف
و جت من الله سبحانه و راح تالف الحمدلله ما تضررت
و افتكيت من اقساطه و اشتريت صغيره ب٢٠ الف مستعمله و مرتاح

المهم توازنها صح هذي ارتياط ٥ سنوات غير الدفعة الاخيرة
و بتحتاج قيمة القسط و البنزين و الزيت احسبها زين موفق اخوي

و سالفة اتنازل عنه ترا التنازل صعب زميل لي مبتلش بجيب لاندكروزر
قسطه ٣٥٠٠ ما حصل احد يتقبله و على الراجحي
لازم اللي بيتقبل راتبه على نفس البنك

السؤال المهم الحين قبل تحدد تبي ربع تويوتا ولا ربع نيسان ، وش هدفك من مشرى احد هالسيارتين ؟ هل بتشتريها للبر وطعوس ؟ وثانيا وشي سيارتك الحالية ؟ وليش بتغيرها ؟


لا تعتبر اسألتي من باب لقافه انما للأمانه خوفاً عليك واعتبرك اخ لذلك ابي مصلحتك ، يعني هل فيه حاجة فعلية لتطليع موتر اقساط وتحمل اقساطه وغرابيله 5 سنين بالاضافة الى دفعة اخيرة غير الدفعة الاولى

حياك
يقال ان الحب اعمى 
اذا انت تحب هالنوع من السيارات لاتسال عن عيوب 
لاكن نصيحة الوضع راح كل شي يرتفع
اعتقد انك شاب بمقتبل العمر مايهمك التفكير باالجانب الااقتصادي
والشباب كلهم انصحوك 
وباالتوفيق

ماجربت ربع التويوتا لذلك ما اقدر افيدك عنه بشيء
لكن ربع الفتك جربته ستاندر قير عادي , لو استخرت وصملت على الفتك انصحك ماتاخذ الا تماتيك القير العادي حاشر مزعج مع الخط فقط هذا اللي لاحظته عليه لاني جربته خط , ممكن ملاكه يفيدونك اكثر اذا فيه عيوب ثانيه

مدري عن الربعين لكن بتكلم عن الفئه اذا انك مشتريه لهدف من استخدامه بر وغيره خذه اما مشتريه عشان انها سياره توصلك وتجيبك ما انصحك
واذا انك تحب هالنوعيه شوف لك مستعمل رخيص لك
وشي اخير ابعد عن الاقصاد ابعد عن الاقصاد ابعد عن الاقصاد...

وعليكم السلام

الباترول والربع التويوتا كلها سيارات تعيشش فتره طويله وتتحمل
لكن التويوتا عمومآ يتفوق بالجودة للديكورات وتماسكها افضل

والنيسان يتفوق بالمحركات قير دفرنس مكينه اقوووى بكثير من التويوتا

لكن انت بتشتري سيارة او صندقه؟ النيسان لو ماعجبك بتكون على الاقل راكب سيارة الربع التويوتا لاراحه ولارساوه ولاعزل
يعني حرام عليه كلمه سيارة لكن نصيحه فك نفسك من الاقساط واذا مجبور على الاقساط خذلك قرض وشوف لك مستعمل
نظيف لكن جرب الموترين قبل تشتري وشوف وش يناسبك

والان ياخي البنزين بيرتفع يعني جيب بدون سيارة سيدان اقتصاديه نكبه

أتكلم أنا بصفتي أن جربت الربع وهو معي إلى الآن عندي سيارة ثانية أستخدمها بدله ، لكن بعض الاخوان يفتي من راسه ولا
عمره جربه ويدعون انه يستهلك بنزين بقوة ، لأنه ضد هذه السيارة بالذات وهذا غير منطقي ، وأقول لهم من هذه النقطة السيارة اعتبرها متوسطة في استهلاك البنزين إلى حد
ما ويعتمد على دعستك فإذا كان مشيك متوسط إلى 100 وطريق مستوي وتبديلات للنمر قليلة يمشيك الفل 560 وتولع اللمبة
أما إذا طلوع ونزول وتبديلات كثيرة يمشيك 500 وتولع اللمبة وهذا عن تجربة شخصية وأنا مسؤول عن كلامي هذا ، بالنسبة
للسيارة كخدمة اعتقد غني عن التعريف يخدم معك سنوات طويلة وتورثها لمن بعدك بعد حفظ الله ولا أبالغ إذا قلت انه في
الخدمة ما تقارنه بأي سيارة أخرى سواء كانت تويوتا أو أي نوعية سيارات أخرى ، أنظر سيارات الحكومية والأمن والجيش
بالنسبة للاستخدام اليومي ممتاز جداً للبر والجبال أما استخدام داخل المدينة اعتقد يؤدي الغرض وميزته تركنه في
أقل المواقف بدون صعوبات وجيد للزحمات والشوارع الضيقة ، أما خطوط طويلة لا أنصح به لانه بيتعب والسرعات العالية
ما ينفع ، الجيب تسارعه جيد جداً عندما تقارنه بأي سيارة أربعة سلندر فزة ما شاء الله ، بالنسبة للرساوة لك عليها لكن مع
الكفرات العريضة يكون أرسى ، العزل الأرضي جيد جداً بحكم الارتفاع عن الأرض يعني أفضل من سيارات السيدان الصغيرة
وسيارات الونيت في العزل الأرضي أما العزل الجانبي من سرعة 80 وفق تسمع أصوات الهواء يعني العزل ما هو إلى تلك
الدرجة ، إنشاء الله أكون أفدتك .

هدفي من السياره الي بأخذها اولا ابيها تكون سياره العمر تمشيني من ٨ الى ١٠ سنوات قدام او اكثر و جيب وشبابي وللبر والطلعات والسفريات
ثانيا معي كورولا ماشالله٢٠١١ وكارف ام امها ٦ سنوات من يوم ماطلعتها من الوكاله ماشاللله تقولي بس ذا الي عندك خخخخخ
وابيهاتكون بديله لاني من اول ودي بجيب جربت الهلي موتر موتر صراحه لاكن ماحاز اعجابي مره لاكن الشي الي خوفتوني منه ارتفاع سعر البنزين والي يقولي بتخسر والي يقول مدري وش والله كذا يمكن ما اطلع

بعدين انا عمري ٢٣ وتخرجت ذي السنه لله الحمد ولقيت دوام مناسب لاكن حسبتها مع قسط السياره والزيت والبنزين اتكلم على سعره هالحين بيصفالي من راتبي٨٠٠ ريال
وتكفيني والله ٨٠٠ ريال الحمدللله ماني متزوج ولاشي تكفيني وتزيد بعد

800 تكفي وتزيد ههههههههههههه هههههههههههههههههههههههههههههههههههههههههههههههههههه

المهم بعد ماتتورط راح تنزله لحراج للتنازل مثلك مثل غيرك كثير قالوا كلامك ويبقى لهم مو 800 يبقى لهم 2000
لكن اقساط وتجيك مصاريف تخليك تدور الزود على راتبك لو 100 ريال

على العموم انت اعرف بمصلحتك ونفسسسك بس لاتجي تتشكى عن الغلاء وارتفاع الاسعار والاجانب اكلونا

والله مهو مخوفني الاكلامكم ارتفاع اسعار البنزين وارتفاع الاسعار وتنازل ومدري وش

يارجل 800 الحين مكفيتك لاكن ماتدري بعد كم سنة وش يصير
انا اقول استخر وشف وش الله يكتبلك