يا اخوان لما اشوف بائع يعرض سلعة بأكثرمن ضعفي قيمتها

اذا سئلت شيخ بالله نزل الفتوى في في الموضوع
لاني كمان ابغى اعرف ايش الحكم

انتبه تعترض ارزاق الناس

أرسل النبي عليه الصلاة والسلام احد الصحابة الى السوق وأعطاه دينار وامره ان يشتري به شاه فاشترى الصحابي شاتين بالدينار فباع احداهما بدينار واتى الرسول بالدينار والشاه فلم ينكر عليه الرسول صل الله عليه وسلم

ودعا له بالبركة

فيه ناس الله يهديهم لو الواحد يعلن عن شي تافه يخرب اعلانه ياخي هاذي تجارة ان شاء الله يشتري بريال ويبيع بمية خل الناس تشتري ولاتقطع رزق اخوك المسلم وممكن يدعي عليك دعوة مستجابة

انت تدري ان بعض البضائع تباع بعشر اضعاف رأس مالها مثل بعض المطاعم والصيدليات ومحلات الاثاث والاواني المنزلية وغيرها يعني جات على هالادمي اللي دخله باليوم ممكن 100 ريال او اقل

وفيه ناس ماتخاف الله ولا عندها عدل ولا انصاف والاحظ هالشي بكثرة بإعلانات السيارات 

مثلا واحد يعلن افالون 2014 ويحده ب70 او 75 ويجي واحد يرد عليه ويقول حصلت مثل سيارت ب 60 الف!!! طيب ما سألت نفسك يمكن سيارة الرجال نظيفة والسيارة اللي انت حصلت ب 60 مسمكرة وزبالة ولا تسوى 40 الف وتجي تخرب اعلان الرجال وبيعته بسبب جهلك وضيق نفسك فقط

المهم طولت عليك وابي اقولك نصيحة للجميع لا تتدخل برزق الناس وكلن يشتري باللي يناسبه اذا ماعجبك الاعلان قفله وشوف غيره وانتهى 

دع الخلق للخالق

فعلآ كلامك جميل جدآ
وبالذات الي يقول عرض خاص :: وبنفس الموقع تلقى اقل من سعره؟؟ وين العرض خاص
شف الجنسيس عند معرض السحاب بي 110 : موديل 2015 ... فيه معرض ثاني كاتب عرض خاص : والسعر 113؟؟؟

موقع حراج ان جيت تبي تبيع سيارتك تلقوك الشريطية : وان جيت تشتري تلقيت الشريطية باسعارهم الفلكية
اليوم يراسلني واحد عنده لكزس 2012 es ماشيه 150 الف يقول مسيومه بي 70 ولابعت : معني لاقي 2013 اسود داخلية زعفراني :بيعت بي 76 في معارض النسيم اليوم الموتر نظيف والممشى 120

ياغالي هذه تجارة مافيها نصب وانت عندك الخيار 

هي سعرها مثلا  في الخارج ٣٠ ريال.  على حسب الموقع. بعضها مايشحن الا لامريكا 
وطبعا لازم يكون عندك صندوق واشتراك هناك 
والفيزا 
ورسوم الشحن 
ووقت الانتظار 

وفي الاخير الشخص مو مجبور ولايحتاج تنفعل وتزعل
تقدر تجيبها من برى 


انا مرة احتجت قطعه. وهي حقت فحص السيارة واشتريتها من واحد ب ٩٠ تقريبا
وانا عارف سعرها برى ارخص بكثير  بس كنت مستعجل
لكل شي قيمه حتى الوقت 

البائع هذا اللي في الخارج مايبع بسعر التكلفة.  بايع بمكسب

كل شي موجود بالسوق 
ماقولك بالخارج
حتى هنا القطاعي له سعر والجملة له سعر وفي بلد المنشأ له سعر
ارجو ان نرتقي   

اشوف كثير زي كذا ما اتدخل خصوصا جهاز غسيل السيارات ناس ٨٠ ناس ١٥٠ الله يرزقهم اساسا المكسب تعبان لذلك الواحد مايتدخل ويقطع برزق احد 

استفتي قلبك ولو افتوك وافتوك
انت لاتجيبها بطريقة تخريب
انت اسئله سؤال عابر .. مثال :
قول له ايش الفرق بين بضاعتك وبضاعة فلان ؟
لانه شايف فرق السعر بينكم رهيب !!
بكذا ما بتكون ظلمت احد ان شاء الله
لانه هذي المواقف حصلت لي
البضاعه عندي يوم اشتريتها كانت مرتفعة الثمن
وانا مجرد فرد
ويجيك تاجر زي سوق دوت كوم ويشتري اضعاف الكمية اللي انا شريتها
فيبيعها بسعر اقل مني لدرجة انه يبيعها باقل من سعر التكلفة اللي انا شريتها فيه
وطبعا عندي مرونة مع الزباين ..
يعني لما يسالني يقول حصلتها عند فلان بكذا ..
اقوم على طول ادور لها عند فلان ..
فأحصل اختلاف بسيط جدا في المواصفات يكاد لا يرى
ولكن هذا الفرق يستاهل فرق السعر
واحيانا تكلف علي شحن وجمارك ف طبيعي يزيد السعر
مثل جوال تشتريه ب ٥٠٠ ويوصلك مع البريد والجمارك ب ٧٠٠
بينما انا ابيعه ب ٨٠٠ وفرت عليك الطلب والانتظار ..
وتراك ماتقطع رزقه .. ليش ؟
لانه صارت لي لما يكلموني انهم حصلوا المنتج ارخص
واقارن المنتج بمنتجي ويطلع مافي فرق
اقوم اوقف استيراد اي دفعه جديدة
واتخلص من اللي عندي براس ماله عشان ما اخسر

فتراك لعلك تخدمه دون ان تعلم ودون ان يعلم
وفي النهاية انما الاعمال بالنيات
انا اكلمك كتاجر .. ترى وجود شخص مثلك
ينفعني كثير
بس اهم شي لاتجيبها بطريقة ( غيرك يبيعها ارخص )
صياغة الاسلوب حلوة ايضا لما تجيبها بصيغة
( ايش الفرق بينك وبين جارك ؟ )

ولكم تحياتي .

يا أخي إذا شفت الرجال غلطان ومبالغ في سعر سلعته فارسل له نصيحة على الخاص وبين له سعر سلعته في السوق وانه الربح يكون بالمعقول حتى ما يعرف الزبون بالسعر الحقيقي للسلعة بعد ما يشتري منه ويدعي عليه وادعي له بالبركة في ماله وفي تجارته وإن شاء الله تجد منه تجاوب وحتى لو ما تجاوب تكون نصحته بدون قطع أرزاق وبدون ما يكون في نفسه شيء عليك

واحتمال أنه يرد عليك بتوضيح الفرق بين سلعته والسلع الأخرى الرخيصة الموجودة في السوق فصاحب السلعة أعرف بالفرق وصدقني رح يتجاوب معك بالكلمة الطيبة وتكسبه فأغلب الناس فيه خير ويستجيب للنصيحة

لا توستفز ولا تضيق خلقك وانا اخوك احتمال البايع مشتري البضاعة بسعر عالي غير عن الي انت حصلته معروض وبكلامك الي بتوجهه له على العام انت قطعت رزقه

قطع اعناق ولا قطع أرزاق ولكل امرئ مانوى

السلام عليكم
يعني بالله شلون تيجي رجل بيغش الناس نقول اتركوه هذا رزقه
لو الفرق بسيط ممكن نقول طيب وش ذنب المسكين الي بيشتري
وتقريبا اعلاب الاعلانات الي شفتها يدور غشيم وخاصه الي يقلك
حول لي وارسل البضاغه

من قالك ان يغش الناس؟!
كذا صنفته غش على كيفك بس
هاذي ربح ماهو غش وصح ان البائع يرضى بالربح اليسير شي مطلوب

لكن ماتقدر تقول عنه غش او حرام

وشي مافيه استغلال لحاجة الناس يعني يايبيع ساعات او العاب او من هذا القبيل

اللي يسمعكم يقول انه يبيع اكل او علاج ولافيه غيره!!

شكلكم ماتدرون ان ارباح الشركات الفلكية ولا ما ناحرتم هالضعيف اللي بالموقع!!!

تاركين كل شي وكل انواع الاحتكار والغش وتناقشون الاسعار بموقع حراج

يا ساتر خليتوه غشاش عشان رافع سعره
اول شيء في نسبه1% وفوقها ربح بسيط له الناتج مبلغ فلكي
الحل شفها بالصور وشف التقييمات وبعدها اشترها من مواقع
النت مثل اكسبرس شحن مجاني وارخص من حراج بس تطول
على ماتوصل الشحنه يبيلها شهر ونص الى شهرين وبعض المرات
تضيع من خوينا البريد
مثل بروجكتر السرعه شاريه170وينباع هنا300 وبعضهم400ريال
وقطعة الفحص شاري ثنتين50ريال وهنا الحبه 100الى150ريال
ولكن حاليا اشوفهم صاروا يبيعونها50ريال

للعلم ي أخوان فيه صاحب محل شاورما صغير يقول بالعامية فيه ناس ماتشوف الا الزحمة وكثرة المبيعات وربحنا من الشاورما آخر قضمة الباقي يروح رواتب واجار ورخص وغيرها الكثير

هذا اللي تشوف رافع السعر عنده تكاليف عمولة وشحن ومشاوير وبالاخير يبي ربح جيد حتى يستمر

نعم بعض الباعة هنا عندهم جشع تعدى حده مثلا بائع يبيع شماغ ب 160 ريال حصلته في السوق ب 130 ريال مع ان صاحب المحل مستأجر ب 30-40 الف وهناك من يشتري من المواقع الخارجية ويبيع السلعة بأضعاف قيمتها ولايكتفي ب عشرة أو عشرين بل بدبل سعر الشراء أو اكثر!

ابو ياسر صاحب المحل مستأجر صح لكن كم مبيعاته يوميا؟

و30 ريال فرق جدا بسيط وترى التجارة الالكترونية عندنا جدا متعبة فيه اللي ماهو صامل وفيه اللي يشغلك ويطفشك وبالاخير يسحب وفيها مشاوير شحن وغيرها 

وترى الشمغ موجودة بكل مكان يعني اللي يبي يشتري يشتري واللي مايبي ياخذ من السوق

صح فيه بالموقع ناس طماعين لكن الحل قفل الاعلان وشوف غيره الموضوع جدا بسيط

انا مع تعليق الأخ - مفقود - إن رأيت لك سلعة " تحتاجها ولست ماراً لمجرد الفضول " وسعرها مختلف بشكل مهول
عن اللي شفته ف السوق ! بإمكانك التواصل معه عبر الخاص وإستبيان الفروقات بين البضائع أو السلعة المعروضة
فإن هو تجاوب وكان مرناً في الحوار كان بها ، وإن لم يكن فغض عنه الطرف وابحث عن سلعتك بمكان
آخر فالسوق مليء والباعة كثر .. اعتذر لكم عن الإطالة .

اذا الفرق كبير علق ونبه الناس قبل يوم قريت خبر لصيدليه تبيع علاج فوق 300 وسعره مايتجاوز 30 ريال

التجارة شطارة وكذا

ابو ياسر فرق 30 ريال سمتيه طمع وجشع وزاد عن حده هههههههههههههههههههههههههههههههههه
خاف الله يامسلم 30 ريال فرق بسيط جدآ جدآ

اللي صار بالصيدلية غش وجشع ونصب واحتيال واكل لأموال الناس بالباطل لأن العلاج مسعر من هيئة الغذا والدواء ب 28 ريال والصيدلية يبيعونه ب 380 ريال