اركب حماية وجهيه على السياره ولا لا؟

بما ان صدامك مرشوش.. لا تركب حمايه لأن سعرها غالي عند الشركات المحترمه
سعر الحمايه 1500 الى 2000 ريال.. ناخذ المتوسط 1700 ريال. وبعد 6 شهور تشهب عليك وتحتاج تسوي لها تلميع ومابتستفيد
الافضل انك ماتركب شي وخلي الصدام ينعدم عليك وكل سنه رشه مره ثانيه ب200 ريال انت كذا كسبان وبعد خمس سنوات تكون وفرت 700 ريال ههههههههههههههههههههههه

بس من جد.. نصيحتي لك اذا راعي خطوط وخايف تنعدم الوجهيه عليك.. ركب برقع وثبته زين مستحيل ينفك عليك.. انا مجربه على سرعات عاليه ولا انفك

واذا وصلت المدينه فكه ماياخذ دقيقتين وصدامك يكون بلمعته.. واذا تبي تسافر او تمسك خط ارجع ركبه.. افضل من الحمايه الشفافه تبان انك مركب حماية بالاضافه يتغير اللون عليك بعد ماتفكها وماتحمي من ضربات الحصى المتطاير مثل البرقع

بالتوفيق..

ادري مافي امريكي 200 لن معروف شغل الغرابي 
والسفريات ب الصيفيه اسافر يعني هه وهه

انا مجرب لشغل الغرابي
دمر لي الكبوت ودمر لي الصدام الأمامي
شف وانا اخوك
تبي تركب حماية ركب عند شركة تسوى ويعطونك ضمانات
غير كذا لا تتعب حالك وتدور الرخيص
صدقوني لو جينا للواقع مافي افضل من الوكيل
اعطي الخبز لخبازه لو اكل نصه

واتوقع حسب ما سمعت ان هو كل سنة لازم يتغير وعند الوكلاء يغيرونه لك كل سنه بس تدفع المره الجايه نص السعر او خصم قوي
موفق خير

واذا انت مو راعي سفريات وخطوط ترابية لا تركب وانا اخوك
منت ملزوم
واذا نويت تسافر حط من الترميل او الفيري وصلى الله وبارك
انا حاليا ماني راعي سفر واجد
بس إذا دعا الأمر أحط فيري او الترميل هذي على اطراف الرفارف والامامي والخلفي وكل شي
وب 50 ريال
وسافر لو تبي للهنلولو

الله يعطيكم العافيه جميع 

اخ الاحترافي الفيري بيعدم البوية بيسبب خدوش خفيفة  على شكل دوائر ما تروح الا بتلميع ساطع  

أحسن شي  يركب برقع و يثبته عدل 

والله الحماية الأصلية من الشركات المعروفة مثل 3M و لومار وجونسون وغيرهم تحمي السيارة بعد الله
شفت مقطع اتوقع مرسيدس او بي ام محكوك زاوية الصدام الأمامي سخنوا الصدام وشالوا الحماية وطلع الصدام ما فيه ولا شي وكالة وركبوا جديدة

جربت كل الحلول مثل فيلم الحماية الأصلي لايوجد أبداً لاتتعب روحك

قبل أسبوعين رحت مع أخوي من جدة للرياض للدمام ومركب برقع تفصيل وخامة ممتازة
لكن ترك نتوءات زي الطريق المعروج على الأسفلت أخس من النقرات على الكبوت مع الأسف

وشفت كذا واحد ركب فلم حماية أصلي وبعد مايفكه يرجع الكبوت جديد ماشاء الله
بس لازم يكون فلم أصلي أصلي إذا قال لك ألماني اتركه لأنه مو مخصص لحماية البوية

أفلام حماية البوية تكون مرنة وشبه مطاطية واختصار تسميتها (فلمPPF)

PAINT PROTECTION FILM >>> فلم حماية الطلاء

إذا صدامك مرشوش بورشة محترمة إن شاء الله مايقشع البوية

وأفضل أفلام الحماية تكون بتقنية المعالجة الذاتية Self-healing
ميزته الشفافية العالية إضافة إلى لمعان عالي وقابليته للتلميع اكثر من افلام الحماية بدون هذي الميزة

تلقى هذا الفلم عند لومار او جيوشيلد او عند عضو زميل لنا هنا في المنتدى (الفارس المميز) ابو عبد الرحمن وعنده محل
لكن يبيع فقط مايركب وعنده فلم حماية من شركة ريتك الامريكية وهذا رابط لموقع الشركة الأم :

http://raytechfilms.com.my/paint-protection-film.html

واتوقع هو اقل تكلفة لفلم حماية بهالميزة
وبالتوفيق

ي شيخ الله يسعدك