امر غريب في الموقع

دندشة هذا الاسبوع :
يقول لك سوناتا 2011 ماشية 110.000 الف كيلو نص فل ==> طبعا فتحة بانوراما ومفتاح تشغيل عادي 
( تم تغيير رقم العداد منعا للمحاورات مع شخص معين ) ولكن الرقم قد يزود 10 وقد ينقص 10

الدندشة الي حصلت :
يقول لك السيارة عليها سوم 43 الف 
(( حلو .. سعر خقق ==> تستاهل اوصلها الى 46 الف ريال ))
العيوب :
-- رش رفرف امامي
-- رش رفرف خلفي 
-- رش صدام
-- تم تغيير باب الراكب بسبب بعض الخدوش
-- تم تعديل الرفرف الخلفي بالجهة المقابلة بسبب ولد الجيران متكي وانخفس الرفرف بدون قصد
-- تم تغيير الصدام الامامي مع انوار الضباب عشان لونها باهت  ===> الحبيب نسى يغير اللوحة باهته من الخطوط 
-- تم تغيير باب الشنطة بسبب ريوس على برميل الزبالة


نشوف موديل 2012  .. لاني تعبت من الوراعين حقين 2011 .. يمكن نلقا ناس افهم :

موديل 2012 بانوراما نص فل 
العداد 110 ... مثل الكلام السابق
السوم وصل 51 من شريطي ... والبعض يقول من صاحب معرض  ===> يعني راعي المعرض او الشريطي دلخ بيشتري بهالقيمة ويبيعها بخسارة

العيوب :
مرشوشة بالكامل لتطابق لون الباب الي صار له حادث مع باقي البدي

النقاش معه :
ياخي سيارتك ماشيه كثير وانت رافع سعرها ؟
قال الممشى ما يهم على نظافة


السوق بشكل عام  (( دندشة x دندشة ))
اعتقد احد مسوي دنبوشي في هالموقع  !! اسعاره خيال بينما في الواقع نجد اسعار زي العسل

كامري 2013  فل كامل  ماشيه 26 الف كيلو .. اقسم بالله انه في معارض النسيم عطانياها بـ 60 الف صافي
وجا شخص الله يرزقه .. تحسه دلخ مدري افدغ  ههههههه ولكن لف لف لف حول السيارة قال ابي افحص وبعطيك 64 الف
قال راعي الكامري اوكي توكلنا على الله
راح فحص ولقا السيارة لقطة مافيها ولا مخش 
تبايعو واتصل علي صاحب السيارة قال المعذرة ياخوي ترا بعت الرجال وانا اتصلت عليك قلت لا يكون نفسك فيها لانك ما تكلمت غير اتفاقنا اذا ماشرى الرجال اني اتصل عليك
والان الرجال شرى ودفع عربونه في كارتك بعد ما فحصها
قلت الله يرزقك ويوفقك انت وياه .. رزقه وجاه عزالله مانيب راده وانا الله يرزقني بغيرها

الزبدة يا شباب .. كامري 2013 ستاندر في هالموقع يقول مسيومة 61 الف والرجال لعن ابو خامسها ومشت حوالي 60 الف كيلو ما مداها تتنفس ويبي فيها الظاهر 70 .. استهبال لأبعد حد

والغريب برضه الي قاعد يعطي تقييم سلبي على مثل هذه المواضيع
الله المستعان بس