سؤال اطلع قرض واشتري كاش ولا اجار ؟

الشيء الثاني اخذ سيارة على قدي واقصدها 3 سنوات ولا اخذ سيارة متوسطة الحجم v6 واقصدها 5 سنوات ؟

من رأيي لو كنت مكانك بشوف السيارة المناسبة وأشوف كم سعرها وآخذ قرض من البنك وأشتريها كاش
منها تكون باسمي ومنها الفائدة أقل بكثير ومنها أنفك من شبهة الإيجار المنتهي بالتمليك

والأهم من هذا كله إذا عندك زواج قريب تاخذ سيارة سعرها معقول وتشوف وضع راتبك يسمح تاخذ قرض ويتبقى لك مبلغ تقدر تصرف فيه نفسك إلى نهاية الشهر

مرينا بمرحلة توك موظف ويجيك حماس تاخذ سيارة بمبلغ وقدره وبالنهاية تندم تقول ليتني ماتهورت بذاك المبلغ وسلامتك

اذا راتبك من 5 الاف فأقل
طلع تأجير والقسط بالكثير مايتجاوز 1200 ريال

واذا راتبك من 7 الاف وحولها
كذلك تأجير ويكون القسط من 1500 فأقل


واترك لك مجال للتمويل الشخصي للضرورة والاحتياج
البنوك تعطي تمويل + تاجير مايتجاوز 60% من الراتب
يعني اذا راتبك 6 الاف
تعطيك قسط سياره وتمويل حول 3 الاف واكثر قليلا

انتبه تطلع قرض شخصي ثم.تحتاج سيوله وتتورط
وترجع تبيع الموتر بخساره وتطلع عقبها تاجير والخ

من رأيي الشخصي اهرب من التأجير هروبك من النمر لأنه اشرس من الاسد

نجي نحسبها بعقل
نفرض اخذت سيارة قيمتها كاش ب 70 الف وحسبوها لك ب 100 الف على خمس سنوات بدون دفعة اولى وقسط شهر حول 1200 ودفعة اخيرة حول 28 الف وهذا اقل سعر وافائدة لسيارة مناسبة 
بعد خمس سنوات قيمة سيارتك تقريبا مساوية للدفعة الاخيرة يعني تدفع خمس سنوات وبالاخير السيارة تطلع عليك بخسارة حول 70 الف

من رأيي خذلك قرض شخص مايتجاوز 50 الف وخذلك سيارة مستخدمة موديل حديث وتقدر تاخذ بأقل من المبلغ هذا يعني عندك الكامري 14 و 15 حاليا على 32 الى 40 الف

وعندك الفكتوريا والماركيز تاخذ موديل 11 من 30 الف وجاي وسيارات نظيفة جدا وتخدم بشكل مو طبيعي 

وتفك عمرك من الدين ومن الهم وتجمع لك قرشين تخدمك في الزواج والاجار والاثاث وغيرها

نصيحه يا خوي خذ قرض وطلع السياره كاش. اقلها لو ما عجبتك السياره او صارت لك ظروف واضطريت تبيعها ما تبلش بسالفة التنازل 

حياك
رايي تاخذ قرض 
والقرض مايتجاوز ثلاثين الف 
وبتحصل سيارة اخت الجديدة افحص زين مازين
السيارة وسيله ماهي غايه تمشي امورك 
والباقي من راتبك ادخر منه 
طلبت الشور وباالتوفيق

اخوي سوي مثلي
اول ما توظف اشتري سيارة ازيرا ب 25 الف ( جمعت من راتبي لمدة 5 اشهر )
بعدها ب سنه
اخذت قرض كامل 150 الف ( اشتريت ارض وتزوجت منها )
الحين باقي لقرضي اقل من سنة
زبدة
حرام تسحب قرض وتحطة في سيارة وتقصد 5 سنوات ... سيارة وسيلة نقل لا اكثر ولا اقل
اشتر سيارة اهم شي مكينتها وقيرها كويس

تبغى نصحيه مجرب إن كان الدوام قريب من البيت اشتري لك سياره مستعمله نظيفه تمشي امورك أما توك متوظف وتتورط في الديون ترا بتندم انا تورط وتزوجت وسياره جديده مع بعض وكرهت نفسي خمس سنوات اقصد 3500 إذا ما عندك سياره الحين خذلك إيجار اكسنت وخش جمعيه ولا جمع من راتبك واشتر موتر بحدود 30000 يجبلك 2011 و12 اكورد كامري تورس خيارات كثيرة والله يسهل أمرك

الافضل تشوف لك سيارة مستعمله مناسبة

سعرها مايتجاوز 40 الف الى 50 الف

بتلاقى خيارات كثيرة

منها تورس صالة جمركيه مضمونة نظيفة او كامري
او مازدا زوم 6
اكورد 

اذا تبي جديد خط ومدينة ورخيصة وممتازة

النترا نص فل مكينة 2.0 بتلاقي بالستينات بس فر المعارض

بالنسبة للقرض اذا انت عزابي وماعليك التزامات كثيرة 

طلعه وسدده خلال سنة وتفتك منه

والله يوفق الجميع لما يحبه ويرضاه

انا مريت بتجربة مثلك بالضبط
المهم
عن نفسي 
هربت هووب تام تام من الاجار ( ياخوي انت ما تملك السيارة .. البنك يتحكم فيك )
ما فيني اكتب كلام كثير 
لكن اذا تبغى نصيحة اهرب من الاجار
شف لك سيارة ب ٣٠ الف او ٣٥ الف 
وطلع قرض 
الفورد ٢٠١١ طيب لو تحصل نظيف 

والله الاخوان فوق ماقصرو صراحة وواضح ان الاغلب يؤيد القرض وانا معهم وعندي نقطة بسيطة حبيت اضيفها لكم

هي ان التأجير بالتمليك بإسم البنك ويغثك اذا بغيت تسافر بر السعودية وكل شوي تفويض داخلي ومرمطة 

وضف عليها اعرف لك واحد موتره تأجير بالتمليك سوناتا دفع قسطها لمدة اكثر من 4 سنوات ماباقي الا كم شهر والدفعة الاخيرة

وقدر الله على صاحب السوناتا وسوا حادث والموتر راح تالف وهو فكه الله ماجاه شي 

طبعا البنك سحب السيارة وقال الفترة الماضية حسبناها تأجير شهري ودام انك بدون دفعة اولى توكل على الله مالك عندنا شي 

والله ياهي غبنه تدفع قسط 4 سنوات وزيادة وبالاخير تروح السيارة وتطلع منها بلوشي 

تبي نصيحه من اخوك المسلم .. ابعد عن التاجير اذا منت مضطر لسياره جديده نصيحه اخو ومحب خذ لك قرض بسيط ودور لك موتر نظيف وقصده على سنه او سنه وشوي صدقني انك بترتاح سنه ونص ونت مخلص لكن التاجير بتضل لازقه فيك 5 سنين ون تقصد وفوقها الموتر ماهو لك وخلال ال5 سنين ممكن تمر بظروف وممكن وممكن لاتقول مهوب صاير شي انا شريت تاجير والله انها ضاغطتني ضغط وودي اتنازل عنها وافتك من الاقصاد اللي كسرت ظهري لو البنك حزتها وافق يعطيني قرض اقسم بالله اني ما اطلع تاجير لكني كنت مضطر .. حبيت انصحك بما احب لنفسي وانت ادرس وضعك مافيه احد بيعطيك حكم يرضيك كلنا نشور عليك وعسى الله يهديك للي قاسمه لك الله .. وبالتوفيق

خذ تجربتي

انا اول ماتوضفت ولله الحمد عام 1425 اول شي فكرت فيه

بيت
زواج
اخر شي سياره

ولله الحمد الان

عمرت لي بيت دور واحد
تزوجت

باقي السياره ومعي سياره راضي عنها تمام الرضى وافكر الان اشترى للولد الله يصلحه سياره جديده لان دوامي قريب ومالى روحات كثيره

المقصد فكر بحياتك قبل تفكر بالسياره

خذ قرض من البنك واشتر السيارة كاش







التاجير المنتهي بالتمليك ليست باسمك باسم الشركة سيء نظامهم اذا راحت السيارة تالف مالك شي عندهم لا السيارة ولا المبالغ المدفوعة و غير كذا ما تقدر تسافر عليها خارج السعودية الا بتصريح منهم