أضف سؤال أو موضوع جديد          

سيارة قديمة بس عمليه ضنك تنفع

up 9 down 11
a.ibrahem 3167
قبل 3 سنه و 7 شهر



السلام عليكم ورحمة الله وبركاته


مساكم الله بالخير جميع


عندي موضوع بسيط ودي نتناقش فيه قلنا نتناقش مهب نتطاق والاختلاف في الراي لا يفسد للود قضية الا وهو


يجيك واحد معه مبلغ بسيط مرة ووده يشتري افضل سيارة كفئة بالسعر هذا لذلك تلقاه يتجه للقديم او للسيارات الغير مرغوبة بسبب نزول اسعارها بتكلم عن الفئة هذي



يعني انت الحين جمعت فلوس على قدك حتى قيمة تغيير كفرات ماعندك او حالك على قده وعندك من الالتزامات مايكفيك وحتى لو يصفى من راتبك جزء بسيط وتقدر تسوي صيانة به للسيارة لا يعني انك تطير راتبك كل شهر في مصاريفك الشهرية وفي الموتر وتعيش طول السنين كذا لا لابد ادخر يعني الموتر ذا مهب دايم لي بكره بيطلب وبيخرب وبينتهي وبرجع لنفس الموال طفسه جمعتها واشتري بها سيارة قديمة ويبتل طول السنين كذا واخرتها ما استفاد لاهوب اللي استفاد من فلوسه وجمعها ولهوب اللي شرا بها شي يستاهل


لذلك انا اشوف الاتجاه للسيارات القديمة بعض الاحيان اكبر غلط


يعني مع احترامي يجيك واحد معه 25 ولا 30 الف يروح يشتري له 2004 ولا 2006 منكد كد ماشي 450 هذا وش ترتجي منه ذا الموتر اوكي لاصار نظيف ماعليه وبيخدم بس برضوه مهب ماكل زمانه وزمان غيره بيبدا يطلب من كثر الاستخدام ومن الزمن بعد ترى مهب بس كل شي المشي بعض الناس يشوف الموديل قديم بس مامشى شي يعتقد انه بيخدم اكثر واحسن من الجديد وهذا مهب صحيح وانت اساساً نفسياً ماتكون مرتاح 100%



لأن لوه صحيح كان المواتر المخزنه واللي موقفه من سنين من تنغز سلفه يشتغل وما يخلي مكان مايروح له كل شي يتلفه الزمن وكثر الممشى وانا من وجهة نظري ان الزمن يلعب في الموتر اكثر من الممشى لأن لوها تحسب كذا كان بطق مكينة وقير جديدة وبيرجع الموتر احسن من الوكالة



يعني عشان أأكد لك الموضوع لو قلتلك سافر للمكان الفلاني بسيارة صغيرة موديل 2016


ولا بسيارة عملية ومعروفة موديل 2001 ولا 2004 انت من داخلك نفسياً ودك تروح بالجديد لوه صغير


طبعاً فيه ناس بتقول عندنا موديل 99 وله خمس سنين ما طب ورشة ونظيف وهكذا اوكي كلامك صحيح وبعضهم حتى وهو خربان يروح للخفجي ماشاء الله مايضره معروفة ذي وغالبيتها سيارات معينة


لكن انا اتكلم عن الناس اللي بتشتري من السوق انت عندك الخيار بالجديد حتى لو فئة اقل خذه انت لكن اللي معه 2001 ولا 2005 من زمان وموتره وعارفه وصرف عليه ويدري وش فيه وش مافيه هذا ياحيل الله مايقدر يشتري جديد او يقدر بس مايبي يظغط عمره وعارف موتره زين وش يحتاج وش يشيك عليه واكيد اذا حس انه انتهى الموتر بيقضبه الباب متى ماسمح له الوقت لكن انت الفلوس معك والسوق مفتوح لك تروح ترجع معهم ليش


وفيه ناس تعرف تحسبها صح يشتري قديم شوي لكن داري انه كويس وعملي مابعد انتهى زمانه مره ويخدمه ثلاث اربع سنين ويبيعه بخسارة بسيطة ويجدد وهكذا


لكن انا حديثي على اللي يجهل السوق ويجهل وش الافضل له بسعره لاتدربي عمرك بالدرادع اذا انت مابخصت السوق يعني بعض السيارات خمس سنين تحسها خلاص هو كويس ويمشي بس ماعاد تثق فيه حتى لو انه مامشى يبدا يستهبل ويطلع خرابات معقدة وسالفة لكن بعضها تعرف انه يبي 1 2 3 تزينها وتكدها طالما مكينته نظيفة وقيره ويصبر كم سنة وانت عاد واستخدامك


هذي رسالتي اللي حبيت اوصلها اتمنى احد يستفيد منها ويفسر كلامي بالطريقة الصحيحة ، والله يوفقنا وياكم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


الفلوس تحكم والحاجه تحكم .



up 3 down 0
فهد ابن حسين 65
قبل 3 سنه و 7 شهر



اتفق معك وانت قلتها خذ جديد حتى لو فئة اقل او اصغر

يعني نفرض ان ميزانيتك 40 الف وانت ماعندك عائلة تاخذ يارس او اكسنت جديدة افضل من انك تاخذ كامري او سوناتا مستعملة وماتعرف وش فيها

السيارات القديمة بعضها عملي اكثر من ذحين مثل الكرسيدا والكامري القديمة بس مهما كان صاحبها محافظ عليها بتتطلب قطع ومشاكلها تكثر وبتخسر اضعاف
مثل البني ادم عند الكبر في المستشفى قبل الموت يضعف القلب وبعدها يقلك التنفس ضعيف وتنضرب الاعضاء بعدها مثل الكلى وغيرها كل شيء في الدنيا له عمر محدد

والمستعمل اغلبه مغشوش هذا وهي موديلات حديثة وممشى اقل وين تحصل النظيف واذا انغشيت الله يعوضك فلوسك راحت مافيه قانون يحميك فما بالك بسيارة قديمة
اذا الواحد يفكر في المستعمل حتى لو قديم يتجه للوكالات قسم المستعمل على الاقل يعطونك ضمان سنة او سنتين يمكن اغلى بشوي لكن تشتري راحتك واذا الاوضاع صعبة
خذها بالتقسيط وريح راسك حتى لو فئة صغيرة استحمل افضل من الورش والصناعية وكل يوم بسطحة


up 4 down 1
xviper 134
قبل 3 سنه و 7 شهر



جزاء من كلامك كانك تتكلم عني ههههههههههه
عندي ازيرا 2006 الحمدالله من وكالة ما قد طبت الصناعية الا لقطع استهلاكية فقط كادها كد وسط البلد بس اذا جيت بسافر بها ما اقدر نفسيين ما ارتاح

فاضطر اخذ سيارة اخوي اكسنت 2017 اسفر وانا مرتاح نفسين
زبدة كل شي له عمر افتراضي وينتهي .


up 3 down 0
محمد قاسم 1410 -46
قبل 3 سنه و 7 شهر



أنا استغرب من الي معه 30 ألف ويقدر ياخذ فيها سيارة جيدة موديل حديث تخدمه بدون مشاكل ولكن الرجال يبغى يركب بي ام دبليو فياخذ موديل قديم مكروف ويخسر عليها صيانة كل فلوسه

وبعضهم يدفع المبلغ في سيارة وكالة ويجلس يقسط فيها 5 سنوات

الي معه 25 اى 30 ألف يدور سيارة عملية موديل حديث يستخدمها سنتين أو ثلاث ويجمع مبلغ يشتري فيه سيارة جديدة من الوكالة أفضل من مشاكل التقسيط أو السيارات القديمة


up 1 down 1
أبو عبادة 4852
قبل 3 سنه و 7 شهر



محمد قاسم 1410 شرحك سرا هههههههههههههههههههههههههه انا نفس الوضع الاوبريس 2009 وسط البلد ما اخلي بها مكان والحمدلله اربع سنين وشوي ماقد اخلفتني ولله الحمد بس سفريات ما احب اسافر عليها لا يعني اني ما اثق فيها لا الحمدلله توني جاي قبل كم اسبوع عليها من الشرقية وامورها طيبة الحمدلله بس مابي اجهد الموتر زود خطوط ووسط بلد يكفي اللي يجيها يومياً ودام معي واحد بيروح موتره حديث وجديد ليش نزيد ذي تعب نروح بالجديد وانا الحمدلله اعرف موتري يعني مهب كل هذا تخوف ادري ان مكينته الحمدلله زينه وبتقولي حرارة عارفه وش سويت وش غيرت ومويتها جديدة وغاسل السلندرات ونظيفة واشيكها وكل شي والعضلات نظيفة والكفرات والفحمات جديدة يعني ما اخاف منه بس قلتلك مابي اجهد زود واقضي على عمره بسرعة يعني 352 ماشيه الحين ماشاء الله لو بجلدها زود عليها خطوط يمكن في سنة او اقل بتطرح 400 وانا ابيها اكثر من سنة لين اخلص التزاماتي واجمع زين واشتري موديل حديث بدون دين ان شاء الله



الله يوفقنا وياك يا محمد قاسم 1410


up 0 down 1
a.ibrahem 3167
قبل 3 سنه و 7 شهر



كلام سليم يا ابوعبادة وهذي سياستي في الحياة ما احب الجديد الاقساط ولا القديم المكروف اشتري نظيف موديل كويس ويخدمني اربع خمس سنين وابيعه بخسارة استخدامي له واحدث الموديل وهكذا


up 1 down 1
a.ibrahem 3167
قبل 3 سنه و 7 شهر



xviper


المثل اللي قلته يطابق حالة السيارات اللي اتكلم عنها بالظبط يعني مثلاً لو عندك شايب محافظ على صحته من يومه صغير وسمن وعسل ورياضة حتى لو هو محافظ وصحته زينه من صغره وخلقه هو نشيط بيتعب ومرده بيجيه المرض مهب اهمال بس العمر له دور وعظامه تصير هشه نفس الشي السيارة ياكلها الصدا والزمن


up 0 down 0
a.ibrahem 3167
قبل 3 سنه و 7 شهر



كلام سليم تماماً وأتفق معك بكل حرف.

لكن بالنسبة للسفر، مشكلة السيارات اللي سعرها أقل من 60 ألف عزلها رديء فما ترتاح في السفر بها واللي معك.
بعكس لو تاخذ سيارة قديمة شوي لكن فخمة وكبيرة وبنفس سعرها فرق 180 درجة عزل الصوت ووسع الداخلية.


up 1 down 0
وليد م ع الدخيِّل 490
قبل 3 سنه و 7 شهر



ووعليكم السلام ورحمة الله وبركاته، ومساك الله بكل خير ونور.


up 1 down 0
وليد م ع الدخيِّل 490
قبل 3 سنه و 7 شهر



اهلا وسهلا اخوي وليد الله يحييك طبعاً لاشك كلامك سليم 100% واتفق معك السفر باكسنت ولا يارس مثلاً يختلف عن السفر ب افلون ولا هوندا وغيره



بس انا يوم ذكرت مثالي اقصد اللي يشتري قديم مرة ومتهالك بس عشان فئته وفي نص الخط يقولك طلعت لي حنه القير يمشي بنمرة وحدة الموتر قام يرجف مدري وش جاه



لكن فيه سيارات موديل 2008 او 2007 توها بنشاطها وتدري انها لازالت كويسة وتثق فيها ان شاء الله عادي تروح بها وهي تختلف حسب النظافة ونوع السيارة


up 1 down 0
a.ibrahem 3167
قبل 3 سنه و 7 شهر



عندي 15 ألف .. إيش تنصحني من سياره ؟!

نازل بعد العصر


up 0 down 0
mr_safwat 7
قبل 3 سنه و 7 شهر



mr_safwat اعتذر على التاخير في الرد لأني ما ادخل المنتدى نهاية الاسبوع


15 الف مبلغ قليل لكنه لاباس فيه ممكن به اذا بتاخذ شي لا زال حديث وجيد مالك الا الالنترا 2012 او 2013 ولو انك بتحصلها اغلى شوي يمكن ب 18 او ان لقيت ب17


عندك الكيا ريو ولا السيراتو بتحصل موديلات حديثة


هذا اذا انت تقول بفك عمري من الخرابات والقروشة السيارات هذي صحيح صغيرة وتفتقد نوعا ما للراحة وعزمها عادي جداً لكنها تريح مخباك وراسك لأن مافيه الا قير ومكينة نظيفة حافظ بس في استخدامك وتسلك سنين لين الله ييسر لك ويرزقك ان شاء الله وتشتري اللي في بالك


موفق


up 0 down 0
a.ibrahem 3167
قبل 3 سنه و 7 شهر