أضف سؤال أو موضوع جديد          

لخبراء السفر .. نصايحكم لخط الرياض جدة

up 6 down 0



السلام عليكم

ناوي ان شاء الله اسافر من الرياض لجدة خط اول مره ومااعرف الطريق مزفلت زين ؟
هل فيه بعارين ؟
كم سيد هو وكم السرعه المسموحه اللحين وهل هو امن ؟
بالنسبه لخط الطايف مكة اي واحد اروح ابي واحد أمن معي عائله الله يجزاكم خير







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


من مكه على الطايف ومن هناك تنزل على خط الرياض الافضل والخط طيب افضل من خط الساحل 
ثلاث مسارات ولايوجد مطبات معك ساهر طول الخط ودرب السلامه ان شاء الله 


up 2 down 0
al-shrif 31
قبل سنه



الطريق من الرياض الى جدة 
بشرحه لك بحكم اني كداد بعد  الحمدلله

تعبي من محطة الحجاز وموقعها قبل نقطة القدية 
لاتروح مع ديراب

اقصى حد السرعه 132 كم الين يجيك اول كبري بعد القديه
ثم ترتفع السرعه الى 140  كم 

المحطات المتوفرة على الطريق
الاتوز
الدريس 
ساسكو 

والبعارين مافيه بعارين 
الخط كامل كويس بنسبة 90٪ 

اذا عبيت من الحجاز ومشيك تمام بتوصل للدريس اللي قبل الحوميات
بعد كبري التنيبيكيه 

هناك عندك مطعم هرفي والمحطة كويسه ونظيفه ومرتبه ودايم اوقف فيها

واذا حبيت تكمل عندك في مدخل الحوميات محطة ادريس 

بالنسبة لساهر موجود بالطريق كامل من الرياض الى الحوميات 
غير سيارات امن الطرق الرسمية والسرية 
لكن امش بالسرعه النظاميه ماحد يوقفك ولايصورك ساهر
وانتبه ترى مافي هامش فوق 140 

واذا تعديت المويه راح يجيك ساهر حق الطائف وتكون السرعه 140 حتى وصولك
نقطة القرشيات وبعدها ترجع السرعه حسب اللوحات الارشادية مع هامش 10٪ زيادة
عن سرعة الشارع


الطريق بشكل عام ممتاز
حركة سير دائمة
محطات متوفرة
الصرافات تحصلها في المحافظات
المزاحمية
الجله- تبراك
القويعيه
الرويضه
حلبان
الخاصرة
الحوميات
ظلم
المويه
رضوان
العطيف
الطائف

اذا وصلت الطائف عندك اما طريق السيل الكبير ( تريلات )
او الهدا ( بدون تريلات )

عن نفسي انزل مع الهدا دايم بدون تريلات وبدون ساهر

هذا وصل الله وبارك على نبينا محمد
اتمنى اني مانسيت شيء


up 44 down 0
xpoldx 1430
قبل سنه



الأخ xpoldx كفى ووفى

أحب أضيف إذا مو متعود على نزول الجبال واستخدام الغيار الثقيل فطريق السيل أفضل لك مع أني أحب الهدا نزول وطلوع والمناظر رائعة

ربنا يسهل لك طريقك وتروح وترجع بالسلامة ولا تنسى تشيك السيارة ولا تنسى دعاء السفر


up 7 down 0



جزاك الله خير وبيض الله وجهك يااكسبلود بس ابسألك الهدا فيه منحدرات ونزلات ومرتفعات ؟


وهل طريق مكة والسيل منورين الليل ؟
لاني ابسافر الليل وسيارتي نورها ضعيف شوي


xpoldx
بسأل عن الاستراحات في الطريق هل يوجد شقق كويسه


up 0 down 0
عمده33 1634
قبل سنه



لاتروح مع الهدا اذا انت مو متعود على المرتفعات انا اذا جيت مع الهدا ادوخ روح مع طريق السيل بس زحمه تريلات


up 1 down 2
كارينو 555
قبل سنه



الشقق الكويسه تلقاها في المحافظات عادة 
ونصيحة لاتمسك الطريق الا وانت مفلل نوم 
ومعك ربع كيلو فصفص من باجه يشغلك فالخط ههههههههه

الهدا نزوووول بس انه كويس اذا انت عارف متى تبدل السرعه 
واذا خايف من المنحدرات والنزول روح على السيل


طريق السيل اول 20 كيلو منعطفات حاده والطريق حارتين لكل سيد
ومعك تريلات 

الين توصل الميقات بعدها ينفتح الطريق ويصير 4 حارات لكل سيد

السرعه 100 كم في طريق السيل اول 20 كم 
وبعدها 120 كم مع الانتباه لهامش السرعه 10٪

الطريق في السيل غير مضاء ومافيه انوار الا جهة الميقات بعدها ينقطع النور
حتى توصل النقطه الجديدة وثم تنقطع حتى تدخل مكة

اما الهدا فالطريق منور الين توصل جدة 




up 0 down 0
xpoldx 1430
قبل سنه



مكسر شوي وتريلات وانتبه اذا معك جيب . طحت في حفره كنت بقلب فيها . .
امشي بنهار افضل شي .
كله سيدين من الرياض لين توصل جده


up 0 down 0
مستر12 861
قبل سنه