أضف سؤال أو موضوع جديد          

اذا خربت سيارتك تمشي عليها ؟

up 14 down 8
a.ibrahem 3167
قبل 3 سنه و 6 شهر



السلام عليكم جميعاً مساكم الله بالخير او صبحكم الله بالخير


موضوع بسيط ومنيب مطول عليكم ان شاء الله فيه الا وهو لما نقول ان بعض الناس يجيب الخراب والبلا لموتره ما يصدقونا ويقولون يابن الحلال البلا في السيارة فيها عين فيها نفس ناضلينه الموتر مهب عملي الموتر ردي الخ .......


ممكن يكون بعضها صحيح لكن الطامة الكبرى تجي لواحد يخرب موتره خراب بسيط وهو اللي يزيد الطين بله بحركاته



يعني يجيني واحد يقولي الموتر معلق على النمرة 1 ومشيت عليه لين طق ولا فضى ولا وقف ولا ارتفعت الحرارة


ولا يقولك الحرارة ترتفع عندي وانا مالي خلق اوقف زحمة وحر لين شفت الموتر يدخن وبعدها طفى يعني وش تبيه يسوي لك يتجمل معك لين توصل طال عمرك عشان ماتوقف في الحر والزحمة



ولا لمبة البطارية ولعت ومشيت عليها وطفت وعطيتها اشتراك ومشت وطفت ومدري وشوا ثمن ارتفعت الحرارة يعني يا بني ادم معروف ان المراوح كهرب ودام الموتر فيه ضعف معناها ماراح تشتغل بالشكل المطلوب وبالتالي بتدخل في دوامة ارتفاع حرارة وممكن تضر مكينتك



طبعاً البعض بيقولي لا تلومهم مهب كلن عنده خبره اوكي احترم الشي هذا لكن والله البعض من عجز يسويها ولا متكيسل وللاسف يذكرها في الموضوع عادي مالي خلق اوقف مستعجل طيب يعني مستعجل والموتر خربان انت كذا عطلت نفسك زود تمشي وتوقف وضريت الموتر زود وقفه على جنب وخذ اللي تحتاجه واطلع تكسي ولا اوبر ولا دبر عمرك وخله على سعه زبطه




يعني فيه خرابات ممكن انك تمشي حتى لو طلعت لانها مالها اثر جسيم على الموتر يضر مكينة ولا قير ولا غيره مثلاً انا فصلت عندي الدعسة ادعس هواء مايقبل ابد وولعت لمبة المكينة عرفت انه من حساس منظم ظغط الهواء طفيت وشيكت الحساسات وكذا شغلت ومشت طبيعي بس لمبة المكينة والعه وجلست اسبوع امشي عليها للأمانة مهب اهمال لكني والله مالقيت وقت وفي نفس الوقت عارف انها مالها أثر جسيم ان شاء الله ويوم فضيت وديتها غيرت الحساس والحمدلله رجعت طبيعي




لكن لو عندي مشكلة في كهرب ولا مراوح تفصل اوقفها ما امشيها لو استاجر سيارة ولا اروح تكسي او بتلقى لك 100 طريقة تدبر عمرك فيها


يعني فيه اشياء نقول مايخالف لو مشيتا كم يوم للضرورة بداية جلدة مقص فحمات باديه تطلع صوت على السرعات العالية وهكذا من الاشياء الهوينه لكن مكينة تطقطق ولا قير يفصل وتمشي امرك عجيب



عموماً اتمنى هالرسالة توصل لكل الناس ويعرفون الثقافة هذي ترى البعض والله يجهل ان الشي اللي يسويه يضر موتره بنفسه مثل اهمال زيت المكينة يشلخه لين يقول بس ثمن يجيك يتشكى مكينتي فيها ومافيها طيب وليش غيرك يملك نفس السيارة وتمشي معه ممشى كبير وماشاء الله تبارك الله ماقد اخلفته او خرابات المعقولة والمعتادة معناها البلى فيك انت



موفقين واسف على الاطالة







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


يعطيك العافية موضوعك ممتاز
وهاذا الي انا ماشي علية
احاول بقدر المستطاع اي عطل يحصل لموتري
اصلحة بدري قبل لايتطور الوضع وتكون الخساير اكبر
خاصة الصوف والعكوس والتهريب والحرارة
الف شكر لك


up 8 down 6
الرفاعي33 13914
قبل 3 سنه و 6 شهر



حياك عزيزي الرفاعي 33 الشكر موصول لك ايضا على مواضيعك الجميلة


الله يوفقنا وياك


up 1 down 1
a.ibrahem 3167
قبل 3 سنه و 6 شهر



موضوع جدا جميل ومهم

فيه ناس ما تغير زيت السيارة أبدا للمعلومية ,, وقمة طموحه انه يسأل اول ما يطلع الموتر ( يعني ما اجيكم يالوكالة وأغير الزيت برا ؟ )

مافيه اهتمام بالسيارة لا ميكانيكيا ولا حتى نظافة السيارة يهتم فيها

تلقى سيارته مشهبة من التراب من مطر قبل سنتين ,, ولا غسلها ولاشيء ,, واللي اصطبه مكسور وتاركه والمشكلة لو تدقق في وضعه المادي تلقاه مرتاح جدا ولا يقصر عليه قاصر

وبالأخير يحط رجل على رجل ويقولك والله الأمريكي سيء والله الياباني سيء وانا مجربه والخ ....

السيارات خصوصا الجديدة اكثر حساسية من الأول ,,

وانا بصراحة فيني عادة ماهي طيبة ,, انا أي صوت اسمعه بالسيارة يضايقني واصلحه على طول , بعضهم يقول هلوسة او وسوسة كما يقال لكن اشتري راحتي والموتر ما قد خرب علي خراب جامد بكل السيارات اللي شريتها ولله الحمد والمنة ولا حتى تخبيط مكينة او قير

والا اللي مستعد يشتري كفر مشي حالك او مستعمل بس عشان ما يدفع ,,وبالأخير يقولك انفقع معي الكفر بغيت اروح بداهية

حبيبي
حافظ على سيارتك تحافظ عليك وصل الله وبارك





up 11 down 0
الاحترافي 1437
قبل 3 سنه و 6 شهر



الاحترافي ابدع وما خلا مجال للكلام من بعده


up 4 down 1
المعتصم بالله 6519 443
قبل 3 سنه و 6 شهر



وعليكم السلام
مره ارتفعت حراره السياره وصلت قبل H وافتح الكبوت
الا السياره تغلي هذا وقت الليل الاديتر فيه ماء
وجبت ماء ورشت الاديتر الين بردت السياره
وشغلت السياره وشغلت المكيف بشوف مروحه الاديتر
تشتغل او عطلانه وفعلا عرفت سبب الحراره من المروحه
والله وامشي على السياره على مهلي لين وصلت البيت
وثاني يوم واروح للكهربائي وطلع سلك محروق
وعرفت السياره اذا مشيت مروحه الاديتر ماتشتغل
الا اذا وقفت اوفي زحام تشتغل



up 2 down 4
تركي ابو فارس 82
قبل 3 سنه و 6 شهر



وشكرا لك يابراهيم على موضوعك الجميل


up 1 down 2
تركي ابو فارس 82
قبل 3 سنه و 6 شهر



موضوعك حلو أشكرك عليه للأسف فيه ناس تهمل سيارتها

انا الحمد لله سيارتي ماخلي فيها لمبة محروقة على طول اقرب كهربائي ب 10 ريال يغيرها 

مرة كانت السيارة معاي فيها حرارة وكنت يومها رايح الوكالة عشان اصلح هالمشكلة و قربت للH وانا خلاص ما باقي كثير على ورشة الوكالة  و أول ما وصلت طفيتها على طول الحمد لله

ما صار شي. 


up 3 down 1
بدر الباثفايندري 1125
قبل 3 سنه و 6 شهر



شكراً لكم جميعاً واضافات ثرية الحقيقة اشكركم عليها


الحقيقة انا كتبت الموضوع بدون تخطيط او ترتيب جُمل لذلك طلع بهذا المنتج وماحبيت اني اكتب كامل التفاصيل لكي اعطي فرصة لغيري يضيف اضافاته الخاصة



موفقين جميعاً


up 2 down 0
a.ibrahem 3167
قبل 3 سنه و 6 شهر



الحمد لله محافظ على السيارة كتغيير الزيوت والامور هذي
حتى الغسيل تقريباً كل اسبوع او اسبوعين حسب الجو ووصاخه السيارة
حتى الفورد اللي رايحه فيها اغير الزيت بوقته..لكن في خرابات ماكان في امكانية مادية وقتها مثلا المقصات او الركب
لكن اضطر استخدمها..نتيجة لذلك انكسرت علي الركبة وانا طالع من موقف والحمد لله
اخذت العبرة ان اي شي يخرب صلحه بدري لا يصير عليك مشكلة
اضعف الايمان غير الزيت بوقته وشحم الجلد والعضلات وربط العضلات كل فترة


up 4 down 0
3llawi96 3115
قبل 3 سنه و 6 شهر



عليكم السلام ورحمة الله وبركاته
موضوع جدا ممتاز مايختلف عليه اثنين
شكرا لك على طرح المواضيع الهادفه


up 2 down 1
نواف الحربي4 322
قبل 3 سنه و 6 شهر



والله موب دايم كسل اغلب الناس اخر ١٠ ايام تطفر ماعندها تعبي بنزين تلقى لمبات اطبلون مسوية حفلة عنده ماعنده فلوس يزينها وبعضهم راكب موتر فوق قدرته ويخرب عليه ويجحده لين يوقف عليه 


up 3 down 0
benz lover -78
قبل 3 سنه و 6 شهر



المعتصم بالله 6519

اشكرك على الإطراء الجميل ,, ما أستحقه والله


up 1 down 0
الاحترافي 1437
قبل 3 سنه و 6 شهر



للأمانة 

انا ماكنت أروح للصناعية إلا مع السطحة ... 

إهمال على طفرة على طيش شباب 

بس مع كثر الخرابات والدق وهالمنتدى الطيب تعلمت أشياء كثير 
وأعرف الي يحتاج صيانة على طول من الي يتحمل كم يوم 


up 1 down 0
شرقااااااوي 653
قبل 3 سنه و 6 شهر



الله يوفقنا وياك يا شرقاوي وكلنا نكمل بعض ونتعلم من بعض


up 0 down 0
a.ibrahem 3167
قبل 3 سنه و 6 شهر