ــــــــــــ

تأكد من طرمبة الماء

وضح اكثر بمعنى القطع اصليه او درجه اولى؟
متى ترتفع الحراره وانت مسرع مثلا او واقف او مع المكيف او
في حميع الاوقات ؟ 
متى تقريباً بدأت معك المشكله ؟ 
وش قد سويت  قبل ماتصير مشكلة الحراره ؟ 

هذي تفاصيل ضروريه ومهمه والله يزين امري وامرك وامر كل مسلم

الطرنبة كيف اتاكد منها 
القطع من الجبر 
لا علطول اذا شغلت وسخنت تبدا المشكلة 
لها تقريبا اسبوع 

اذا فيه ريحة رطوبه او ماء داخل السياره قفل ليات المكيف الحار 
ولا غير الثلاجه 

احتمال كبير تكون طرمبة الماء أو مروحة التبريد فيهن ضعف مع ان الموديل حديث
طيب نوع الماء اللي حطيته بعد ما غيرت القطع اللي ذكرت ترا مهم جداً 

وحاول لا تستخدم السيارة بقدر الامكان حتى تحل مشكلة الحرارة لانه يمكن تروح عليك المكينة 
واذا غلبت الروم لو توديها الوكالة وتطلب كشف على المشكلة وتصلحها برا في ورشة ممتازة 

طبعاً قريت كلامك ان المروحة تكون على اعلى سرعة اذا ارتفعت الحرارة 
لكن اذا كانت الحرارة طبيعية تكون على المروحة على السرعة الاولى المنخفضة 
فاذا كان فيها ضعف او ما تشتغل السرعة الاولى ترتفع الحرارة 

اذا المويه تنقص ومافيه تهريب البلا من راس المكينة

تاكد من طرمبة الماء ! افتح غطاء الرديتر والسياره شغاله وشوف الماء يقلب 

او لا 

تأكد هل فيه حراره في الرديتر أو أحتمال يكون حساس الحراره عليه كلس ومايقرأ صح والكمبيوتر ويخلي المراوح تشتغل الحراره اسبابها كثير ممكن غطاء الرديتر أو أوساخ في الرديتر أو وجه الراس متآكل ويبخر مع الشكمان أو راس المكينه منشعر أو طرمبه الماء او بلف الحراره أو المراوح أو فيه تنسيم في الرديتر تحديد العطل يكون من الأسهل للأصعب لو كانت خبرتك ضعيفه في تحديد الأعطال يعني أفتح غطاء الرديتر وشغل السياره وهي بارده وشوف المويه بعد ماتفتح الغطاء أذا تشوف المويه تدور يعني طرمبه الماء شغاله ولو شفت المويه فيها فقاعات يعني الراس منشعر ولو كل شي تمام تنتقل للي بعده غير غطاء الرديتر لو أستمرت المشكله حاول تركب مويه لونها واضح يعني لو كان لونها احمر راح تشوف اللون واضح ومن وين متسرب ونظف حساس الحراره ولو كانت المشكله مستمره تأكد من المراوح هل تشتغل بالسرعات الثلاث أو لا

الله يعطيكم العافية 
انا لاحظت تحت الطبلون تحت فرشات الارضية 
اكرمكم الله فيه موية ماادري هل هي من الرديتر او لا 
عند فرشة الراكب 

انا كانت عندي مشكلة مشابهة
اخرج الظهر كم مشوار احصل موية الرديتر انتقلت الى قربة الماء الاحتياطية
ومويا القربة تصير فللللل

بعدها ترتفع الحرارة
و اوقف السيارة و افتح غطا الرديتر و اعبيه من المويا اللي في القربة

دام انك بتلاقي موية داخل السيارة
هذي ثلاجة المكيف الحار
ارخص حل سد الثلاجة حقت الحار

يعطيكم العافية ع ردودكم الطيبة 
بعد البحث وقروشة الميكانكيين 
اجمعوا كلهم ان المشكلة من راس المكينة 
الله يعوضنا وحسبي الله على هالشركات التعبانه 
ماحطوا انبير حرارة ليش يمكن انه بيخسرهم حتى لو 
كملوا جميلهم وشالوا انبير السرعة 
الضاهر اني  مشيت عليها وما انتبهت والحرارة طاقه اتش 
والله يكتب اللي فيه الخير 

معوض خير كل مشكله ولها حل

كلام اخوي مشعل صح وقد صارتلي 

اذا في مويه داخل السياره تكون من ثلاجه الهيتر ( المكيف الحار ) 
١- تغير الثلاجه . 
٢- تكنسلها ، ( تكلفك ٣٠ ريال ) 

وبعدها جرب الموتر اذا رفع حراره ممكن يكون ع كلامهم راس مكينه 

لكن نصيحه شيك على اتوماتيك المروحه ( الافياش ) وغير غطا الرديتر 

هو يقدر يتاكد اذا راس المكينة او لا يشغل السيارة وهي باردة ويفك غطا الراديتير وينتظر لما تحمى السيارة اذا طلع الراديتير فقاعات هوا هذا راس مكينة مافيها كلام

للاسف الرديتر يطلع منه فقعات وبقوة 
وبرضه الموية تفور في القربة ويطلع منها هوا 
السيارة وديتها للورشة والله يعوض