حقيقه عدم الفحص الدوري بالنظام الجديد

الاستماره مثل  نظام اول فقط الغوا التاريخ من على الاستماره
حتى ماتروح للمرور وتطبع استماره جديده كل ٣ سنوات ، 

يعني تخفيف ضغط عليهم ، فقط ب ابشر تجددها 
وقبلها تكون فاحص ومامن ، لان السستم مربوط ب الفحص الدوري والتامين
وغرامه عدم تجديد عن كل سنه ١٠٠ ريال الكترونياً 

يعني افحص وامن وجدد من ابشر فقط ، هذا اللي يبونه
مايحتاج تروح للمرور وتصف سرا وتطبع استماره وتاخذها

ياليت يلغون الفحص اشغلنا

بتتحول الزحمة من مراكز المرور الى محطات الفحص
اذا كل سنة ملزوم بالفحص و رسوم و يعدي الموتر او تعيد

يعني الفحص مالغوه؟

بالعكس الفحص مطلوب منا كل سنة مع التأمين

بيخف الضغط في اقسام المرور بس لكن بيزيد في مراكز الفحص و شركات التأمين

انا اشوف الافضل انه الوكالات هي اللي تفحص دوري افضل من المشوار و اللطعة تحت الشمس لين يجي دوري.

كل سنه تسوي فحص بمبلغ وقدرة 
وكل سنه تسوي تامين بمبلغ وقدرة 
كل سنه يبغى لك فوق ١٠٠٠ ريال تامين وتفحص وصلح 
بعض سيارات لو تنزلها معرض ما جابت لك ٤ الف 
الوضع الحالي طفرة وعطاله  
قرارات مستقبلا تخوف الله يستر بس 

ياخوان النظام نفس ماهو
الفحص الدوري من عمر الدنيا كل سنه لازم تفحص لكن ماعمرنا سويناها
الفحص نجيه وقت التجديد او شراء/بيع سياره اذا الفحص منتهي فقط فقط
وغرامة الفحص يعطيك اياها العسكري اذا وقفك وشيك على الفحص فقط

يعني اذا بتجدد الفحص الدوري وانت لك 20سنه مافاحص محد بيكلم تفحص عادي وبدون غرامه
الغرامه يعطيك العسكري اذا وقفك وشيك على فحصك فقط
عكس الاستماره مرتبطه بسستم كل سنه تاخير فيها100ريال

اللحين الي سوه بدل ماتروح تطبع بطاقه جديده كل3سنوات
صارت بطاقتك لك ولزمن مافيها تاريخ
لكن بنظام ابشر فيها تاريخ وتجددها كل3سنوات
بس بدون مراجعه للمرور عشان تستلم البطاقه الجديده


هذي ماهي مشكلتنا مشكلتنا ان البطاقه لو تخزنها بالبوك وتحافظ عليها
ماتستفيد بطايقهم خامتها تعبانه بسرعه تتوسخ ويمسك الوسخ فيها
وتشوفها بعد سنه رايحه فيها وانت ماطلعتها الا عند 3تفاتيش وباقي التفاتيش مايطلبونها
المفروض يحطون مواد تصنيع البطاقه تعيش لاطول فتره ممكنه دامهم حطوا ذا القرار

الفحص الدوري عندنا مازال متخلف يحتاج الى مشروع تطوير ولا تغير من عشرات السنين لازم تروح تمسك سرى بالساعات
واللي يضحك اكثر يقيسون نسبة الكربون وانت تشوف بعينك سيارات مشنبرة والدخان حاشر المحطه واخرتها ينجح السالفه فلوس بس

بعدين مدري وش يحسون فيه لما يطلبون فحص على سيارة موديل 2017 او 2016 لسه جديدة مفروض اقل شي 5 سنوات ماتحتاج فحص

اخ شيفروليه

تدري اخوي جاب سيارة من دبي في سنة 2013  و شحنها مع البسامي 

ولما جا يبي يطلع لها لوحات سعودية  طلبوا منه المرور يفحصها عند المقاييس (ساسو) + فحص دوري  و يقنع المرور يابن الحلال 

جديدة ما مشت كثير انا اول مالك لها من وكالتها في دبي  و العسكري أبد لازم فحص دوري.  ما قال غير الامر لله حمل يا السيارة 

على السطحة و على الفحص لا و النكتة بعد يجيك عامل يمني من الورش اللي برا الفحص يقول يبيلك تصلح عنده سلامات سيارة جديدة

احطها عندك ليش بتنجح ان شاء الله 

اللي عارفه ان السيارة الجديدة ما تسوي لها فحص الا بعد مرور سنتين او ثلاث سنوات من تاريخ إصدار الاستمارة 
طبعاً كلامي عن سابق تجربة لما بعت موتري والاستمارة باقي فيها سنة او اقل بشيء بسيط .
فما أدري هل لازال معمول فيه او لا ؟!

افحص وامن كل سنة سلامات
الوضع الحالي احسن

خذت ديسلايكات مع انه كلامي هو الصح

هالحين مو من سنة طلع قرار بأنه لازم الفحص كل سنة و العالم كلها داجة في مراكز الفحص؟؟؟؟؟؟؟؟ صح والا لأ؟؟؟؟؟؟ قولولي؟؟؟؟؟؟ 

طيب واقترحت انه الوكالات هي اللي تقوم بالفحص هذا احسن حل , يعني مثلا انت لما تدخل سيارتك الصيانة بالمرة الواحدة تفحص دوري و تاخذ

استكر لو نجحت. احسن ما توقف بالساعات تمسك سرا و ما تدري يمكن سيارتك تعدي او لأ.

انا راعي سيارة و دايم أفكر بحلول منطقية تريحني و تريح غيري.

بس الظاهر في ذَا المنتدى لا الحلو ينفع و لا الشين ينفع  

سافرت دبي وسئلت صاحبي الاماراتي وقال عندنا بدبي اكثر من 15 مركز فحص دوري معتمد ولا زحمه ولا شي
يقول قبلها بيوم ادخلها للصيانه بالوكاله تشيك كامل وتغير قطع وفي خدمه بصيانه الوكاله لو تبي تفحصها فحص دوري
ياخذوها للفحص وتنجح وتحاسبهم وتاخذ سيارتك مصينه ومفحوصه ولا زحمه ولا قلق ولا دوخه

طيب ليه ما يكون هالشي عندنا ان يحطون اكثر من فحص دوري شمال جنوب شرق غرب ويكون في ناس بصيانه الوكاله
تاخذ سيارتك للفحص وتحاسبهم حق صيانتهم وحق انهم فحصوها

الطاسه ضايعه وسبب كرهنا للفحص يا اخوان وانا واحد منكم ان دايم زحمه وضغط نفسي وشمس وقرف

المغرب وهي المغرب الى ما عندهم بترول ماشاء الله عندهم اكثر من مركز فحص دوري بالمدينه وشوفه عيني ما عندهم زحمه
وقلق

الله يحسن الحال

كم المده المسموحه بعد انتهاء الاستماره وينزلك مخالفه 100 ريال ؟

اخوي الغرامة تنزل بعد ٦٠ يوم من انتهاء الاستمارة تقريبا