التكييف بالسيارات الكورية - حل المشاكل

12 1

لايمكنك التصويت حتى الحصول على 20 نقطة على الأقل
إضغط هنا للإخفاء

الاحترافي 1441
قبل 6 سنه و 5 شهر

(( لاحظت كثير من الإخوان يشتكي من التكييف بالسيارات الكورية خاصة بوقت الصيف الله يكفينا شرها ويعطينا خيرها ,, ويعتق وجيهنا من نار جهنم
والكل يعرف إدارة موقع حراج وبكل أسف متجاهله طلبات الأعضاء من تثبيت المواضيع المتميزة ,, ولا حياة لمن تنادي وتعبنا وحنا نتكلم ونضرب بالكلام ولا حولنا أحد
انتم وشركة الكهرباء واحد هههههههههههههه

عموما حبيت أنقل هالموضوع القديم من أخونا ابو هيثم 7 - ان شاء الله يستفيدون أصحاب السيارات الكورية
ولو ماهو مهم هالموضوع ما نقلته ,, والشكر موصول لابو هيثم 7 ))

---------------------------------------------------------------------------------------------------------------------------------

السلام عليكم ورحمه الله

كما وعدت الاخ راعي الازيرا بأني انزل موضوع عن مشاكل المكيف خصوصا بفترة الصيف

بالبدايه لازم نعرف ان كمبروسرات السيارات تجي نوعين ميكانيكي وكهربائي

النوع الاول هو الكمبروسر القديم ويشتغل على نظام الكلتش وميزته انه بارد جدا لكن فيه بعض العيوب من اهمها صوته العالي + يقلل من عزم السيارة + يصرف كهرب اكثر وبنزين اكثر

النوع الثاني هو الكمبروسر الحديث بنظام البلف .. ميزته ان صوته خفيف لكن عيبه انه يفصل عند الوقوف وهذي ميزة بالدول الاوربيه لانها توفر الوقود لكنها عيب كبيرر بمناطقنا الحارة

وعلى حد علمي بدت المشكلة بسيارات تويوتا قبل هونداي ؟ خصوصا الكامري 2007 ومافوق واليارس الشكل القديم .. وكانو يرهمون كمبروسر الكامري 2002 وكمبروسر الكورلا 2007 وتحت على اليارس .. لين لقو حل افضل وهو تركيب كمبروسر ماليزي مصنوع بدون حساس او بلف

نجي للجانب الاخر .. السيارات الكوريه بدت مشاكل التكييف فيها بعام 2010 مع نزول الكادينزا ولحقتها السوناتا بعدها بسنه والازيرا بسنتين .. ثم تبعهم البقية ( الكادينزا والازيرا والسوناتا والاوبتيما والسنتافي والتوسان و الفانH1 كلها نفس الكمبروسر حتى لو اختلفت المكاين للموديلات الجديدة بنظام البلف باستثناء مكينه 2.0 لانها بالاساس مكينة ألنترا )

طبعا اي واحد معه موتر كوري ويطرح موضوع هنا بيلاقي بالتعليقات علطووول ( غير البلف مباشرة ) ؟ ويروح ابن الحلال ويغيره وبعد شهر يرجع نفس الخراب ؟

المفترض يبدأ الواحد خطوة خطوة من اسهل شي لين اللي اصعب منه .. وراح اذكرها بالتفصيييل

1/ غير فلتر المكيف < الكتلوج مكتوب انه يغير كل 15 الف كيلو او 6 اشهر أيهما اسبق .. والمضحك المبكي ان بعضهم تلقاه تعدى 100 الف وماعمره غيره ويشتكي من التكييف بعد ؟؟

2/ شيك على الفريون وشوف ناقص او لا ؟ اذا فيه نقص خله يحدد مكان التهريب ؟ من المواصير او الثلاجة

3/ شيك على ارديتر المكيف وشوف فيه اي علامات لتهريب الزيت .. وحاول تنظف هيكله الخارجي من اثار الطين والترسبات

4/ اذا عملت الخطوات السابقة .. انتظر يومين وشوف فيه تحسن او لا ؟

5/ اذا مانفع معاك ف احتمال المشكله تكون بالكمبروسر وقدامك 3 خيارات

الحل الاسهل : ((تغيير البلف)) طبعا راح يفك الكمبروسر ويطلع البلف ويطلع معه الزيت القديم .. ثم يصب الزيت الجديد ويركب البلف ويغسل المواصير والثلاجه وينظف ارديتر المكيف ويعبي الفريون وياخذ شغل يده 400 ريال تقريبا والبلف ب 250 والمجموع 650 ريال

الحل الثاني : ((تركيب كمبروسر كوري)) من شركه Hcc وتحصله بمحلات قطع الغيار ب 700 الى 900 ريال .. وهو نفس اللي بالوكاله اللي سعره 2500 ريال لكن يعتبر درجه ثانية < وطبعا بينظف دورة التبريد كامله مثل ماشرحت بالنقطه اللي قبل وراح يكلفك مابين 1150 الى 1300

الحل الثالث : ((ترهيم كمبروسر اوبتيما او سوناتا او ازيرا 6 سلندر موديل 2009)) < وهذا على قولتهم اخر العلاج الكي

لكن انا اشوف الحل الثاني هو الافضل والاضمن .. وللمعلومية اغلب اللي يغيرون البلف مايستمر معاهم فترة طويله ، بل احيانا يخرب بنفس اليوم والسبب ان الكمبروسر عندهم مودع خلاص ولازم يغير ، اما الترهيم فهو مخاطرة ممكن ينجح وممكن لا

انا حاولت اوصل لراعي ورشه متخصصة بالترهيم وتناقشت معاه وطلعت بفايدة ان اغلب خراب الكمبروسرات هو 80% سوء استخدام والباقي عيب مصنعي

يقولي راعي الورشه المفترض بعد نهايه الصيف سنويا تفك الكمبروسر وتغير الزيت ؟؟؟ انا انصدمت مثلي مثلكم يارجل ماخبرت الكمبروسر يغير زيته بعد فترة معينه مثل زيت المكينه والقير .. لكني مقتنع بالنهايه بأن اي زيت مهما كانت قوة صناعته الا انه لايمكن ان يحتفظ باللزوجه الى الابد

وقالي سبب التغيير ان الزيت يسود وتروح اللزوجه ويبدأ يجمع رايش وبقايا حديد ثم يسد البلف وبعدها الكمبروسر مايبرد ... لكن لو غيرت زيت الكمبروسر ونظفت البلف سنويا قدرت تتلافى المشكله

وسألته عن ترهيم كمبروسر الاوبتيما .. اوضح لي انه مايركب غير حق 6 سلندر فقط ويحتاج كتاوت وفيش لانه يستهلك 12 فولت بينما حق الوكاله 6 فولت فقط , ايضا يحتاج لتعديل المواصير شوي لكنه يركب على نفس السير ونفس مسامير شد البلد لانه نفس القواعد .. ايضا يركب على الارديتر والثلاجه القديمة لكن من المستحسن تغيير الارديتر حق المكيف

الكمبروسر بيكون اقوى من ناحية التبريد وماراح يسبب ضعف بالعزم اذا كان الموتر 6 سلندر مثل الازيرا لكن بالنهاية هل هو مضمون او مايسبب مشاكل مستقبليه ؟ يمكن اقدم واحد ركبه توه يكمل سنه فما زالت العواقب مجهولة

وحسب افادة زميل لي انه قرأ تصريح لشركه هونداي يتعهدون بحل مشاكل التكييف داخل الشرق الاوسط بدايه من اجيال السيارات القادمه .. وحاول يتحقق من الموضوع وراح لوكاله كيا اثناء تدشين الكادينزا الشكل الجديد 2017 واكتشف ان الكمبروسر شكله مختلف ورقمه مختلف ايضا .. معناته الخبر صحيح باذن الله

طبعا هذا يخص الاجيال الجديده من هونداي وكيا .. مثلا اذا الازيرا تغير شكلها ب 2018 بيشملها هالشي لكن السوناتا اذا استمرت بالجيل الحالي فما راح تتغير الا ب 2020 .. وشكر خاص للاخ محمد الجهني اللي وصلنا ذي المعلومة

إبلاغ

الردود