أضف سؤال أو موضوع جديد          

توفير البنزين

up 18 down 3
a.ibrahem 3240
قبل 8 شهر



السلام عليكم ورحمة الله وبركاته 
مساكم الله بالخير جميعاً او صبحكم الله بالخير




موضوعي اليوم يتكلم عن البنزين وهوس بعض الناس فيه طبعاً لاشك ان ارتفاع البنزين يخلي الواعد يستعيد حساباته ويفكر الف مرة قبل يطلع او يشتري سيارة لكن انا بتكلم عن الناس اللي فاهمه توفير البنزين والاقتصاد غلط وبعضهم يجيب العيد 




بمعنى يجيك واحد والله معه يوكن ولا تاهو ولا من هالسيارات الكبار او سيارة ستة سلندر جديدة او اخت الجديدة ومع ارتفاع البنزين قال بشتريلي اكسنت ولا صني ولا ريو عشان المشاوير وغيره بوفر طيب تعال انت يلي بتوفر الحين انت كم بتدفع عشان تشتري الاكسنت ولا الريو الخ....  ماراح ينزل سعرها عن 30 الف لنفترض لو كانت جديدة غير تامينها وعفشها كامل كم بتطلع ؟ ولو افترضنا انك شريت مستعمله نقول بنص السعر ب 15 يعني انت الحين مباشرة خسرت 15 الف ريال كاش اذا مهيب اكثر لو كانت جديدة او اخت الجديد 




طبعاً غير المصروف الشبه شهري لها من ناحية زيوت وفلاتر كل فترة وبطارية وكفرات سنوياً الى سنتين لانك اكيد بتستهلكها اكثر من الموتر الكبير لانها رايحه الدوام وجايه وطالعه في الليل هذا غير صيانات القطع الاستهلاكية لها واستمارتها وتامينها السنوي طبعاً انا متاكد 100‎%‎ ان قيمة تامينها لحاله بدون زيوتها وخسايرها الثانية يغطي مجمل فرق البنزين بين السيارة الكبيرة والصغيرة بدون المصاريف الثانية 




بالاضافة الى سؤالي الحين هاللي مدفوع فيه 100 الف ولا زود حق الغبار بس للبايكه وشوله موقفه يعني انت خلصت 85 ‎%‎ من مشاويرك بالصغيرة هذي اذا مهيب 90‎%‎ يعني تداوم بالصغيرة عشان بتوفر بنزين ماذقت راحة المراتب حقت السيارة اللي ب 100 الف في مشوارك للدوام ولا استمعت بقيادته لا نهار ولا ليل وبتطلع في الليل مشاوير بالصغيرة عشان بتوفر يعني انت مجمل ايامك تسوق الصغيرة الكبير تلقاك تشغله مجامله بس يوم  في الاسبوع ولا في الاسبوعين مرة معزوم ولا مدري وين بتروح والله بخليه يتحرك من زمان واقف 




طيب هالموتر هاللي انت دافع فيه 100 وزود وواقف اولاً بيقدم موديله وينزل سعره في السوق سنة عن سنة ويعتق الموتر يعني تصرف عليه على وقفه بس تغيير كفرات بطارية فلاتر زيت مدري ايش وانت فعلياً ماجالس تستمتع فيه وتستفيد منه يعني انت ماحطيت 100 الف الا عشان تبي ترتاح موتر مريح مركبه وقيادته حلوة وموديله حديث اركب واشغل وامشي وانا مرتاح ومبسوط مهب عشان اشتري صغيره غيره وازيد الخساير ويقدم موديله عندي وانا مامشيته شي ولا استفدت منه وقده انخفس سعره في السوق لو بجي ابيعه بعدين بينه وبين اللي ماشي ممشى طبيعي على موديله اقل من 10 الالف ريال 




 
فيه ناس بتقول احتاجه وقت سفر احتاجه اذا جيت بودي العايله اللي بيقولي وقت سفر انا عندي له حل وخاصةً اللي بيسافر في السنة حسنه اقعد يخوي على ذا الصغيرة ولاجيت بتسافر في السنة حسنه استاجر موتر يخوي والله انها اوفر لك بتوفر كذا عز التوفير يعني كم بتسافر من مرة في السنة مرتين كم المدة اللي بتقعدها والله ماتجي نص قيمة زيوت وفلاتر هالصغيرة اللي شريتها وبتكد عليها








وبخصوص اللي بيقولي عايلتي كبيرة بس شاري هذي اذا جيت بداوم وكذا اقوله على عيني وراسي ياسيدي لكن والله انك جالس تصرف اكثر من لو بتستعمل السيارة الكبيرة هذي وتعبيها بنزين كموتر رئيسي 




يعني انا متاكد لو تحسب خسايرك في الصغيرة اللي بتشتريها كقيمة مشرى وصرفيتها شاملة الزيوت والفلاتر وتامين واستمارة على مدى 5 سنين بس بتحصلها دبلات الدبلات عن فرق البنزين اللي كان المفروض تدفعه لو استعملت الموتر الكبير كموتر رئيسي وحتى لو افترضنا ان الفرق لصالح السيارة الكبيرة يخوي خلني احلله ليش دفعت انا 100 الف الا عشان استخدمه في سنته واستمتع فيه مهب اكسر ظهري بموتر صغير واحرم نفسي من ذا وراحته 




يعني اللي المفروض يعيدون حساباتهم اللي والله على نية شراء وتوه بيشتري الحين وماعنده مثلاً عايله او عزابي نقوله والله انت فكر بطريقة سليمة وحاول انك توفر احسن لك 




اعتذر على الاطالة في الموضوع وترى باب النقاش وابداء الراي مفتوح للجميع ، الله يوفقنا وياكم وتقبلوا تحياتي ،،، 




احمد ابراهيم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


تستاهل لايك على الموضوع اللي كتبته وكأنك كاتبه بالنيابة عني.

اتفق معك 100% في كل نقطه قلتها. واضيف على كلامك بعض النقاط:

بعض الناس عنده موتر نظيف ومافيه ملاحظات ويبي يبيعه عشان ياخذ موتر اقتصادي، طيب فرق السعر اذا صار يبي يبيع اتوقع في الغالب يكون بايع بخساره، الخساره هذي بتعبي موتره 5 سنوات قدام.

والنقطه الثانيه اللي هي يشتري موتر ديزل ومو مقتنع لا في عزمه ولافي صوته ويدري انه موتر ثقيل نفس ومع ذلك يشتريه عشان يوفر بنزين. والمشكله انه عنده ان قيمة الموتر اللي شراه بتعبي موتره بنزين 100 سنه قدام. واحد من الربع شاري GXR ديزل. شفته مره وانا قريب منه وكان مستعجل شغل ومشى ياجماعة الخير كأن اللي تحرك حراثه من الصوت والثقل مع انه واضح انه داعس له. طيب وش الله حادك عليه دامك قادر تشتريه بمبلغ وقدره، فما يعوق معك لو اخذت بنزين. اخف نفس وأهدى صوت وارخص في الصيانه.

ومع ذلك فيه ملاحظه عشان مانكون ضد اصحاب هذا الفكر:

اشوف ان النقاط اللي ذكرها الاخ صاحب الموضوع والنقاط اللي اضفتها تتناسب مع سعر البنزين 2018 ولكن السنوات القادمه هل السعر فعلاً بيزيد حتى يصل لتر البنزين 91 اوكتان بحوالي 4 ريال؟ هنا بتختلف الحسبه ويمكن نكون معهم مو ضدهم.


up 5 down 0
الحويزي1 1127
قبل 8 شهر



حياك
كلام سليم وجميل ومرتب وموفر لذوي الدخل المحدود 
اللي عنده سيارتين بيدفع 
لاكن اللي ماعنده الاسيارة وبلشان كيف يعبيها ويفحصها ويامن عليها
واذا صار فيها عطل تورط يمكن يخليها باالااسابيع واقفه
بيعين الله والبنزين احتمال كبير يرتفع سعره العام القادم


up 1 down 1
باترول 2020 2486
قبل 8 شهر



أعرف ناس عندهم موتر شارينه بفوق 200 ألف ومدفون غبار فالبايكة، واقصاده فوق الثلاثة آلاف ولا يتحرك.

وأضيف حاجة ثانية بسيطة:-
اللي يروح ينجد مراتب السيارة ويحرم نفسه من مراتب الوكالة.


up 3 down 0
2007gx 365
قبل 8 شهر



الناس تفكر على المدى القريب
ماعنده مشكله يطق سياره ب٣٠الف
وهو عارف ذا المبلغ بيغطي ٥سنوات بالراحه من البنزين
بس بالاخير والمهم انه يعبيها 50ريال مثل الاكسنت والصني...الخ
ارحم من الجيب اللي عنده ١٥٠ريال وكسر فله واخر شيء
صرفيه عاليه وكل مايعبيها ينق ١٥٠ لحاله الفل يكسر الظهر
يعني لازم تصف عند الصراف تسحب
اما الاكسنت ب٥٠ريال لو تنفض جيبك بتحصل مبلغ فلها

لذلك الناس تفكر بالفل قبل سعر السياره وكلهم عارفين مبلغ السياره بيغطي البنزين سنوات
بس ماعنده مشكله اهم شيء فلها ب٥٠


وسياره ثانيه غير الجيب اشوفه شيء ممتاز
على الاقل تخليها للكرف والدوام
لو تكسر مكينتها بتمشي ماتقول شيء
ولا تخاف عليها توقفها بأي مكان تنحك ماتنحك ماتشيل همها
مثل الجيب لو جته حكه تنقهر عليه


up 4 down 4
d7ooom777 397
قبل 8 شهر



كلام غير صحيح..لعدة أسباب..
١/في حال خراب السياره الكبيره اجرة اليد وتكاليف القطع اغلا بكثير من السياره الصغيره..
٢/في حال حدوث حادث او حكوك ف البدي..هذا ينقص من قيمة السياره بشكل كبير..
٣/كثرة استخدام السياره الكبيره يعرض القطع الاستهلاكيه ل التلف..مساعد اكسنت مثلا ب ١٥٠ مساعد الجيب ب٥٠٠ او اكثر او اقل بقليل..
مرونة المشي والسلاسه لصالح السياره الصغيره حتى لو حكيت بشي او تضررت السياره ضرر بسيط ماتتحسف عليها ولا تنقهر..وهذا شي ايجابي ب النسبه لنفسيه الشخص..
٤/من كلامك كاني رميت١٥٠٠٠ ريال ف الهواء ولا استفدت منها..وهذا غلط فادح.. ب العكس انت ب ١٥٠٠٠ ريال ماخسرت شي.. اشتريت سياره تخدمك..وفيه توفير من اكثر من ناحيه ل المستقبل الشبه قريب..يعني بعد سنتين او اكثر..
٥/تروح ل المناسبات او السفر ب السياره الكبيره..ومايمنع كل ويكند تطلع..يعني بمعدل يوم او يومين ب الكثير ب الاسبوع تحرك السياره..مايقارب ممشى ١٠٠٠/١٥٠٠ف الشهر..وهذا توفير بنزين..بمعنى كل شهر تعبيه مره او مرتين..
٦/نظافه السياره من الداخل..بتكون نظيفه ومرتبه وشكلها مريح..بعكس لو تستخدمها كل يوم..راح تضظر بعد فتره تلميع داخلي وتحط مبلغ موب سهل..
٧/استمتع بسيارتك ولو نفسك تطلع تتمشى فيها خاصه آخر الليل..رح تمش وانبسط..ولاتخلي شي بخاطرك..الحياه سعاده..
٨/اعرف ان كل ماجلست سيارتك الكبيره واقفه..كل ماكانت جديده..وكل ماسعرها عند البيع كان اكثر..
٩/كل شخص حر ب اللي يسويه..وكلامي مجرد رد على الموضوع..نختلف او نتفق..المهم الفايده لنا جمبعا..3Z


up 9 down 7
.ابوظافر 41
قبل 8 شهر



والله اخسر زيوت وفلاتر 
ولا اروح ابيعه مع زياده البنزين يطيح سعره ب 30 الف ولا 40الف
وخاصه لوكان معك نظيف بديه وكاله ووممشى اقل 
شاري سياره مثلا 130الف وارتفع البنزين اروح ابيعه ب 90 او اقل حرام بالله 
اخليه واقف ابرك اذا بنبيعه  في المدا البعيد جدا


up 3 down 0
ra511 80
قبل 8 شهر



يا شباب
يا شباب
الحين البنزين الاخضر ب 1.37
لو صار ب 2.5 او ب 4 مثلا كيف
وضعك مع السيارات الكبار ؟؟؟؟
اللي يشري سياره صغيره مهو يحسب حساب سنه وحده
هو يحسب حساب 10 او 15 سنه قدام
اسعار البنزين راح ترتفع وتصير بالتسعيره العالميه
هذا كلام الدوله
حبيبنا ابراهيم كاتب الموضوع لما يصير اللتر ب 4 او 5 ريال
هل راح تداوم باليوكن او التاهو او او. اي سياره ضخمه ؟؟؟؟؟



up 2 down 2
لا للغلاء 608
قبل 8 شهر



كلام سليم 100%

لكن اتمنى مايرتفع البنزين عن ماهو عليه

كنت اول اعبي سيارتي كيا اوبتيما 2014 بمبلغ 28 ريال واكسبدشن 2014 بمبلغ 43 ريال ( كان سعر اللتر 0.45 هلله )
وبعد الارتفاع الاول ( اللتر الاخضر صار ب 0.65 ) صرت اعبي الاوبتيما ب 44 ريال و الاكسبدشن 62 ريال ( تقريبا )
وبعد الارتفاع الثاني ( اللتر الاخضر صار ب 1.37 ) صرت اعبي الاوبتيما ب 90 ريال والاكسبدشن 130 ريال ( تقريبا )

لو راح يرتفع البنزين الى 2.84 مثل ما تقول الاشاعات عام 2019

راح اعبي الاوبتيما ب 195 ريال تقريبا و اصير اعبي الاكسبدشن ب 280 ريال تقريبا

ولو بيرتفع الى 3.93 عام 2020

راح اعبي الاوبتيما ب 270 ريال والاكسبدشن 370 ريال

فرق كبير شوي 100 ريال و الصرفيه للسياره العائليه دبل السياره الصغيره , فاكيد الكل راح يشتري سياره صغيره ويقتصد وان شاء الله تكون اشاعه


up 2 down 0
ابوخالد1397 2472
قبل 8 شهر



يا اخوان ماادىي منين جايبين توقعات ارتفاع أسعار البنزين

الدوله قالت راح يصير البنزين بالسعر العالمي ما اختلفنا بس تقولي ٤ ريال ليه ؟؟
عندك الامارات قيس عليها الان عندهم السعر عالمي وكل شهر يتغير وتقريبا ب ٢ ريال السعر العالمي


up 2 down 2
فهد العـوفي 26
قبل 8 شهر



والله اتمنى يكون البنزين رخيص
لكن الامور الاعوام القادمه لن تكون كما نتوقع او نريد
ومع ذلك ..........نقول عند الله كل خير


up 1 down 0
لا للغلاء 608
قبل 8 شهر