أبحث عن سياره تناسبني. رأيكم

5 8

لايمكنك التصويت حتى الحصول على 20 نقطة على الأقل
إضغط هنا للإخفاء

الحويزي1 1129
قبل 6 سنه و 3 شهر

السلام عليكم ورحمة الله

وأسعد الله أوقاتكم بكل خير...

"لي فتره أدور موتر ومحتار مدري وش اشتري من بين عدة خيارات وأبيكم تساعدوني فيها. وكل خيار مبني عليه سلبية بأكتبها بعده. والمبلغ اللي معي:
45 ألف
أو 115 ألف
أو 150 الف ريال.

بتستغربون ان المبلغ مو محدد بالضبط، ولكن بأوضح لكم:
بيكون مبلغ الشراء 45 الف اذا على الفلوس اللي متوفره معي حالياً.
أو بيكون 115 الف إذا بأسدد قرض بنك واطلع واحد ثاني بيطلع الفرق تقريباً 70 الف. بأزودها على ال 45 اللي عندي حالياً ويصير المجموع 115 الف. وبيبدأ قرض جديد لمدة خمس سنوات.
أو 150 الف، اذا بأضغط على نفسي وهذا الحد الأقصى اللي ما أقدر أتجاوزه، ال 150 مبلغ كافي لشراء أي سياره مستعمله أو جديدة حسب وجهة نظري.

وبهذي المبالغ المختلفة أنا أمام هذي الخيارات:

الاول: أشتري بس بال 45 الف أما:
* لكزس 2004 او 2005 ( السلبيه: موديل قديم نوعاً ما).
* أو افالون 2009 او 2010 ( نفس السلبية السابقه تقريباً، والنظيف نادر وسعره مبالغ فيه ).
* أو ازيرا 2015 او 2016 ( قناعتي في الكوري متأرجحه، بالرغم من احترامي للسيارات الكوريه ولانتشارها ).
* أو مرسيدس فياقرا 500 موديل 2004 او 2005. ( اللي يفهمون لها بمنطقتي قليل، ومو عملية كثير).
* أو فورد تورس 2013. ( سلبيتها ان فيها مشاكل كهربائيه بسيطه، مثل انطفاء الشاشه أحيانا أو تعليقها، وشغلات ثانيه ما أذكرها ).

الخيار الثاني:
ال 45 الف أحطها مقدم في سياره أصفار والباقي اقساط مو تأجير منتهي بالتمليك. يعني الاستماره بتكون بإسمي، و التقسيط أفضل من التأجير لأنه يفكك من النسب العاليه للأرباح ( على تسمية البنوك) وتفتك من قيمة التأمين الشامل، وعندي القدره الحمد لله على مبلغ تحمل الأقساط الى حدود 2500 ريال. ( ولكن السلبيات، مدري وش اشتري مدام السياره بتطلع بمبلغ مو هيّن. ولكن بأحط لكم الأشياء اللي تهمني بالسياره للي بينصح بهذا الخيار :
-تكون سياره شعبيه يعني لها انتشار بالسعوديه.
-تكون قطع الغيار متوفره لاقدر الله احتاجت السياره قطع.
- تكون عمليه.
- يكون عزمها وتسارعها جيد جداً الى ممتاز.
- الافضلية للقير الاوتماتيك . ولو عادي مافيه مشكله.
- صيانتها سهله والورش تعرف لها لو كان فيه حاجه للإصلاح.
- لو كانت السياره دبل فأفضل.
- اذا مرتفعه فيكون افضل.
- الصيني مالي عليه نظر.
- المنطقه اللي اعيش فيها بارده. وتضاريسها مستويه.
- السفر قليل جداً (في السنه مره).
- اكثر استخدامي للسياره دوام، ولأشغال البيت وللمناسبات فيهمني انها تكون مو شبابيه بزياده. مع العلم إن الدوام مو بعيد مره وداخل مدينه 40 كيلو رايح جاي.
- افراد الاسره 6 فيهم اطفال. فيهمني تكون الفئة من متوسطه الى كبيره.
- بالنسبه لاستهلاك البنزين أهم شي ماتكون سياره تبلع البنزين بلع. يعني الصرفيه الى الحدود المتوسطه مافيه مشكله.
- ما يهمني صيانة الوكيل غاليه ولا رخيصه لأن مافيه نية اسوي صيانه في أي وكاله.
- السيارات الهجينه والديزل مو مقتنع فيها.
- معدل المسافه اللي أقطعها بالسنه 25000 كيلو.

الخيار الثالث:
بال 115 الف بتكون الخيارات:

*جيب لكزس LX570 موديل 2010 الى 2011 ( ينفع لدوام ورسميات اما اشغال البيت ومشاوير داخل المدينه فيمكن يكون ثقيل ما أدري، والشيء الثاني اذا بيرتفع البنزين أكثر السنوات القادمه حسب ما سمعنا، بأبتلش به).
*لكزس Ls460 موديل 2013 تقريباً. (ما أدري هل فئة 460 اعتمادية وعملية أو لا، الجيل السابق من ls460 اللي كان موديله من 2007 الى 2011 حساس ويظهر فيه أعطال متكرره مثل ال ABS وكم شغلة ماتحضرني).
*لكزس ES350 موديل 2016. ( تصميمها الخارجي وحجمها مايوحي انها لكزس، مع واحد من الشباب وما مدحها كثير يقول كأنك تسوق كامري بس مفخمينها ).
*جمس حوض 2016 وأشتري معه أي سياره عائليه ( الجمس مطبه قاسي، والسلبيه الثانيه مضطر يكون معي سياره غيره للعائله).

الخيار الرابع:
اضغط على نفسي الى مبلغ 150 الف، وتكون الخيارات:

* يوكن دينالي قصير 2015. ( سلبيته يطيح سعره بعد كم سنه، وصرفية البنزين ما أدري عنها بس استخدمت يوكن عادي مو دينالي 2016 وأشوف ان استهلاكه عالي بس الدينالي قيره 8 سرعات فما أدري عنه ).
* أفالون 2019 بعد ماتنزل عندنا بعد كم شهر، ويصير فيه منها مستعمل شبه جديد. لأن سعرها جديد أكثر من المبلغ اللي معي ( السلبيه، بيكون جيل جديد مدري وش مشاكله، ووجهيتها بصراحه كلها شبك).
* أي سياره من السيارات اللي ذكرتها مسبقاً ولكن بالمبلغ هذا أقدر آخذ موديل أحدث.
* أي سياره تقترحونها.

وختاماً:

أشكركم على وقتكم في قراءة الموضوع، وأعتذر عن الإطاله والأمل بالله أن يكتب اللي فيه الخير ثم بخبرتكم وآرائكم اللي بيكون لها دور أكيد على اتخاذ القرار الصحيح، ولكم دعوه طيبه بإذن الله. وبيتم الرد على كل رأي بإذن الله.

تحياتي...

إبلاغ

الردود