تحذير من مسجل رودماستر H-872 عيب مصنعي واستغفال للمستهلك

كم مدة الاستخدام اول شي ياعزيزي 
والمفروض اللي شريتها منه يوضح لك الشي هذا 
ثاني شي تقدم الشكوى على  الموزع انت شريت سلعة وماناسبتك لأن فيها عيب 
نظام وزارة التجارة يجبرهم على الاسترجاع 
اما ان الكرتون انفتح هذا ماهو عذر 
شي بديهي ان الكرتون ينفتح حتى لو ماشريتها 
انا زبون وابي اشوف شكلها قبل ما اشتري يمكن مايناسب ديكور سياراتي ماهو معقول 
يقول يجبرني اشتريها عشان فتح الكرتون 
ياخذ له لزق من اقرب بقالة ويرجع يقفله 

مده الاستخدام حاليا حول اسبوعين والسبب لاني شريتها وسافرت..الغرض الاول من طرح الموضوع التنبيه لاني جربتها وسيئه جدا باختصار ممكن تتسبب بحادث وان تحاول خفض او رفع الصوت. راح ارفع شكوى على الموزع والوكيل لانه الوكيل ساكت عن هالتصميم الغبي جدا

ياحبيبي هي تصميمها كدا لاعيب مصنعي ولاشي
التحم بالصوت فيها باللمس اذا هالشي مو عاجبك ليش تشتريها 
من البداية

لي تجربة مع هذا المنتج وصراحة خساره فلوس عالفاضي

توقعت ردود غبيه مثل رد المسمى احمد. انت اما مندوبهم او عقلك مخبص لان من اول يوم اخترعوا مسجلات السيارات التزموا بوجود ازرار للتحكم حتى مايتشتت السايق. ثانيا لو تشوف جوالك اللي يفترض لمس كامل بتلقى فيه زر رفع وخفض الصوت......ولو قريت كلامي زين عرفت اني شريتها وكلي ثقه انه مافيها هالمشكله وقبلها بيوم مركب نفس الجهاز لفورشنر وفيه زر الرفع والخفض....الصراحه..الرد عليك مضيعه وقت

اذا انت مٌغيب هذي مشكلتك
الشاشات بنظام رفع وخفض الصوت باللمس
موجوده من سنوات!

رد غبي اخر من المسمى احمد . عندك اضافه مثل العالم ولا اسكت بالله عليك. الا الحماقه اعيت من يداويها

اخوي صباح الخير  معي  نفس  الشاشه وفيها ازرار  التحكم  باللمس  عالجنب
 تطلع معي   اتوقع اما اعدادت  او ارجع  لنفس  المحل اللي  ركبتها عنده 
بالضمان تاخذ  حقك   والله   يوفقك  

مايجي معها ريموت تحكم طيب؟

اخوي نسكافيه الله يعطيك العافيه. كلللل الموديلات فيها الزر الا هذي ...ليش اتكلم عن عيب مصنعي. تاكد من رقم الشاشه هل هي نفس اللي عندي H-872.....مع اني متاكد انها مو نفس الرقم
اخوي ابو نادر حتى لو جاء معها ريموت . انا اتكلم عن شي اساسي بالشاشه ..سيارتي ستاندرد وابسط وافضل حل اني اركب تحكم بالدركسون....الشاشه هذي راح تنسحب من السوق لان المشكله هذي مشكله تتعلق بالسلامه والامان ...واللي اشترى نفس الشاشه بيفهم قصدي

انت عندك بالطاره ازرار رفع وخفض الصوت

اذا موجوده الازرار مايستاهل الزعل

واذا ماهي موجوده الله يعينك بدلها وريح راسك من الطلبات

صارتلي نفس سالفتك
بالاخير ريحت نفسي لمن رجعت عنده وقلت وين رموت المسجل وعطاني رموت فيه تخفض الصوت
وبرمجت نفسي على الرموت وحطيته جنب مكان القهوه بعلي الصوت اضغط زر الريموت ووسع صدرك

انشب بحلقهم يعطوك ريموت ومع الايام تتبرمج على الريموت زي ما تعودنا على ريموتات الرسيفر
ولا تزعل نفسك انا افداك

فديت خشمك يالملكيه. السالفه مو زعل زي مافهم بعض الاخوان السالفه تنويه وتحذير لانه المسجل الوحيد بين مسجلات رود ماستر مافيه هالميزه المهمه جدا وهذا اللي يعطي علامه استفهام كبير ....الاخوان يعتقدون ان التحكم بالصوت عن طريق اللمس سهل جداا.. باختصار شديد ايقونه صغيره جداااا على شكل سماعه واذا ضغطت عليها يجيكسماعه ومثل الخط تسحب باصبعك يمين يعلى الصوت يسار ينخفض الصوت....بالله عليك كل هالعمليه تسويها وانت تسوق ؟؟؟؟؟؟ ياخي بالجوال وانت وقف تكون العمليه صعبه فمابالك وانت تسوق !!!!!!
انا هنا انبه واحذر انه هالموديل فيه خطا كبير وعيب مصنعي من عرفنا الدنيا والمسجلات تجي بازره تحكم وتجي بريموت بعد مو شي جديد انا شاري قبل s100 رووووعه وفيه تحكم صوت باللمس+فرار+ريموت...اتمنى يفهم المقصد
ملاحظه: بعض الاطفال ردودهم تدل على طفولتهم واذا زعلوا جمعوا عيال الحاره عشان يحطون ديسلايك :))))))))))))
ياانهم اطفال او عندهم طفوله متاخره (استمروا )

اجل عيب مصنعي والشاشه جايه كدا من المصنع ههههههههههههه
رح اشتكي المصنع في البلد الام ايش دخل الوكيل!

أسأل عن الريموت
لأن شريت شاشه رودماستر وفيها ريموت
وكل الشاشات اللي شريتها من قبل كان فيها ريموت
والإصدارات الاخيره من الشاشات اغلبها
تجي الأزرار من جهه وحده

اخوي ايمن اقلب الجوال بالعرض تفهم قصدي..راح تبين الشاشه كامله. القضيه مو ريموت او غيره....القضيه مثل ماذكرت مافي مسجل سياره (اركز على سياره) يجي دون ازره تحكم بالصوت لسلامه السايق
يعطيك العافيه والجميع

و عليكم السلام ورحمة الله وبركاته

أشكرك عزيزي على هذا التنبيه
بعض الناس ممكن يشتري و على باله إن أزرار الصوت موجودة

و لكن لا يعتبر هذا خطأ مصنعي و لكن ممكن تعتبره خطأ أو عيب في تصميم واجهة برنامج الشاشة أو مثلا خطأ في تصميم المنتج
ولكن لا يعتبر بأي حال من الأحوال عيب مصنعي

لأن مصطلح عيب مصنعي يحمل دلالات غير الملاحظة التي تخبرنا عنها

حتى وزارة التجارة لا أعتقد أنها تقبل كهذا البلاغ أو إذا قبلته لن يكون الحكم لك و لكن سيقولون بشكل بديهي انت اخترت المنتج بنفسك وقدامك صورته

إلا إذا كانت صورته مثلا على الكرتون بخلاف المنتج داخل الكرتون فهنا قد تكون حالة غش و تدليس على الزبون

كصاحب محل من الممكن أتفهم احتياج العميل لأزرار لكن لست مجبرا على تغيير المنتج له
من الممكن أن أغير له المنتج من باب خدمة العميل و كسب رضاه لا أكثر

إذا كان مع الشاشة ريموت أو تستطيع الحصول على ريموت فقد يكون هذا حل جيد

تحياتي لك

مرحبا اخوي الفارس ومشكور على ردك.رأيك يحترم لكن نكون منطقيين...اذا كان الخطا يؤدي الى مشكله بالسلامه والامان (مثال مشكله في ABS السياره ) هذا يعتبر عيب مصنعي.... المسجل موجود لغرض الترفيه اولا واخيرا...لكن عزيزي لما احط غرض ترفيهي وراح يؤدي الى مشكله بالسلامه والامان ..من وجهه نظري هذا يعتبر عيب مصنعي من منتجين المسجل لانهم لم يراعوا طريقه الاستخدام وعرضوا حياه المستهلك للخطر...مع ملاحظه ان بعض العيوب المصنعيه لاتؤدي الى ضرر بالسايق ...طبعا الكثير راح يقولون اني مبالغ بالموضوع والسبب لانهم ماعايشو المشكله وجالسين يتخيلون المشكله رغم شرحي لها بالتفصيل الممل....اللي مو متخيل المشكله ويرد بانها ماتستاهل اتمنى قبل يكتب اي شي يروح ويجرب المسجل وطبعا يجربه وهو يسوق واتمنى من الله انه مايسوي حادث :))))))))
الريموت والتحكم من الطاره تحدثنا عنه كثير ونعرف انه حل وهذا يسمونه (play around the problem)...والمعنى تخطى المشكله بحلول بديله....وانا من اول الموضوع وضحت انه الهدف الاول توعيه وتحذير والهدف الثاني النصيحه...واقدر ولله الحمد احل المشكله ب خيارات عديده مثل ريموت او تحكم طاره...لكن هذي مشكلتنا للاسف نحب نوجد حلول لاخطاء غيرنا اللي حنا نكسبهم وندعمهم...في النهايه خطا مثل هذا لايغتفر واتمنى انهم يحسون شوي ويسحبون المنتج هذا من السوق