أضف سؤال أو موضوع جديد          

خدعة الورش القديمه وللاسف مازالت تمشي علينا

up 31 down 12
ابو هيثم 7 2154
قبل 5 شهر و 3 أسبوع



السلام عليكم ورحمه الله.. كل عام وانتم بخير

من عاده الواحد منا اذا خرب عنده الدينمو او الارديتر او الكمبروسر يروح للكهربائي ويقوله اللي عندك مودع جب واحد جديد .. ومن هنا يبدا النصب !!!

طبعا حنا نروح بحسن نيه ونجيب الجديد ونترك القديم عنده على اعتبار ان مافيه فايده ؟؟؟ يجيك ابن اللذينا وياخذه ويصلح الخراب ويرجع يبيعه بمبلغ وقدره >>> وبعضهم يتفانى ويحاول قدر الامكان انك ماتاخذها وتشوفه يرميها مع القطع على الارض كأنها قمامه (( وانت بكرامه )) حتى يخيل لك ان ماوراها فايده ؟ واول ماتحرك من عنده يروح يفكفكها ويستفيد .. حتى لو تذكرت ورجعت له ثاني يوم وسالته عنها بيقولك رميتها وهو كذاب لانه فكها واخذ اللي يبي منها بس يبي يصرفك .. ولو تفتش المحل تبي تحصلها عنده

حتى لو افترضنا ان القطعه مالها تصليح نهائي ولا فايده .. يقدر يبيعها وزن حديد ان شاء الله ماتجيب له الا ريال واحد هو كسبان لانه جايه ببلاش

ودايم اشوف اللي يروح للكهربائي ويغير الدينمو كامل ويجدع القديم.. ويجيك الكهربائي بعدها يصلح الخراب وغالبا يكون الفحمات ولا تكلفه 20 ريال ويرجع يعرضه ب 700 !!!! (( شف كم كسب من وراك )) نفس الشي مع الكمبروسر وفعليا مايعتبر خربان ولايستفاد منه الا اذا كان مصلب بس

وبرضه المثال ينطبق على كل شي يخص السيارات سواء كهرباء او سمكرة او ميكانيكا او حتى بنشر.. كثير اشوف يغير الزيت ويبقى نص علبه وتلقاه يتركها للبنشري !!! ابي اعرف ليه ماتاخذها هي عيب والا وش السالفه ؟ دام البنشري اخذ حقه كامل ومحاسبك على العلبه كامله قفل الغطاء مضبوط وخذها معك ماله داعي الكرم في غير محله انت اولى بها ومع التغييرة الثانيه نص على نص وفرت عليك قيمه علبه كامله

اذا تبي تعرف قيمه الرجيع رح للتشاليح واسأل عن القير والمكينه تلقاهم يشترطون الرجيع قبل مايعطونك السعر .. ولو قلت ماعندي رجيع رفع عليك السعر دبل وبعضهم يرفض يبيع لك اساسا .. طيب ماعمرك فكرت ليش الرجيع مهم عندهم لها الدرجه؟؟؟

السبب اذا جيتهم تبي مكينه لان مكينتك فيها صوت عمود .. ياخذونها ويطلعون ثنتين من عندهم العمود سليم بس وحده فيها البساتم ضعيفه والثانيه فيها التكايات ، ويركبون ذي على ذي ويعطونك مكينه مجمعه اساسها رجيع واحد قبلك !!! اظن انك عرفت الحين ليش رجيعك بالنسبه لهم يعادل وزنه ذهب

وبختم الموضوع بسالفه حصلت لي قبل 7 سنوات من بعدها اخذت درس اني اخذ القطعه القديمه (( حتى لو ماكنت احتاجها حاليا يجي يوم وألقاها )) كنت رايح لمحل اديترات وقالي انه مكسور ولازم يغير قلت طيب تلحيم قال مايفيد !! رحت لأكثر من محل وقالولي نفس الكلام بالاخير رجعت للمحل الاول وغيرته.. وسبحان الله بعدها ب 4 شهور صدمت ع الموتر وتكسرت قواعد الاديتر الجديد وأروح للتشاليح كلها مكسره والتجاري مانصحوني فيه قالو ضعيف ومحلات الاصلي قالو لازم اديتر كامل ؟؟؟ هنا رجعت لنفس المحل الاول وقالي عندي قواعد سعرها 35 والتركيب ب 50 يوم طلع الارديتر والا والله نفس اديتري القديم!!!! قلت هذا تبعي وانا جيتك قبل 4 شهور وغيرته ؟؟؟ سوى نفسه مايتذكر وقالي هذا عندي له سنه المهم ركبته وعطيته حقه كامل والمفترض اعطيه شغل يده بسسس لكن صارت درس لي ومن عقبها تعلمت >> (( شف ابن اللذينا سرقني ورجع باعه علي لكن ذا مايعفيني من الخطأ )) من بعدها صرت اخذ القطع حتى لو مالها فايده ابيعها سكراب ولايجيني يوم وافرط بشي ثم أنغبن نفس غبنه الاديتر

(( الهدف من الموضوع هو زيادة الوعي وليس حسد لأحد .. واذا قطعتك القديمه فيها فايده انت اولى بها من غيرك )) وسلامتكم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


من ذا المجنون الي يشتري دينمو مصلح ب700 الى اذا شافك غشيم يمكن تاخذه بهذا السعر هو سعره مايتعدى 200 ريال اذا طقته الحمى
اما انا صراحه بعض القطع اذا كنت باستفيد منها اخذها معي اما اذا مااستفيد منها اخليها عنده خله يسترزق الله خاصه اذا شفته اخذ حق شغل يده مبلغ معقول اخلي القطع المغيرها عنده يطلع منها كم ريال مسكين من 8 الصباح الى 11 الليل في حر الصيف وبرد الشتاء والله ان جلست بس ساعه مع سيارتك في ورشه تنتظرها تخلص ان تكره نفسك كيف عاد هو
طبعا انا اتكلم عن الشغيله الي تخاف الله وتبي تسترزق بالحلال خلها تاخذ باقي القطع وتبيع الي يصلح وتتصرف بالباقي وراه عائله واهل واولاد اما اخذ قطعة وارميها في القمامه صح ممكن اسويها للشخص الي يحاول ينصب علي او شغله في السياره اي كلام ويحاول يتذاكى علي هذا ارميها في القمامه ولا اخليها عنده


up 10 down 10
Pro rare 451
قبل 5 شهر و 3 أسبوع



شكل الي معطينك تسلايك على موضوعك كلهم اجانب وصاحبين المهنه ههههه


up 11 down 16
ابو عبد العزيز 305 369
قبل 5 شهر و 3 أسبوع



وعليكم السلام ورحمة الله 

اذكر مرة رحت مع قريب لي للصناعية وكانت عنده الدودة حقت الكامري خربانة شرا واحدة تجاري وركبها وشفت العامل اخذ الدودة وراح للورشة اللي جنبنا وخبرت قريبي قال حلال عليه قدهي خردة،، وطبعا طولنا فالورشة تقريبا ٤ ساعات وشفته رجع للمخرطة بالدودة وشكلها كانها رجعت وكالة ،،،فاكيد راح يبيعها ،،، ولكن مادام قريبي قال حلال عليه فهي حلاله يسوي اللي يبغاه

 


up 7 down 0
ابو حسين.......... 891
قبل 5 شهر و 3 أسبوع



نفس الكلام ينطبق علي البطاريات . اذا جيت تبدل بطاريه جديده
يشرط عليك تعطيه القديمه مقابل خصم على تركيب الجديده
وانت توافق . لكن هو بالاساس ما خصم عليك فقط رفع قيمة البطاريه
الجديده دبل مثلا قيمتها 80 ريال يقول البطاريه ب 120 اخصملك 30 ريال
واركبلك الجديده وتعطيني القديمه . استفاد اخذ منك البطاريه واستفاد ربح الجديده



up 7 down 2
ابوعابدالله 81
قبل 5 شهر و 3 أسبوع



ابو هيثم موضوعك حلو جداً 
من ناحية ان الواحد لازم يكون عنده وعي وحسن تصرف 
واسهلها نص علبة الزيت الي كل مره يدفعون قيمة علبة كامله ولو وفرها كان افضله 
مثلا موتري ٤ علب وربع هل اخلي الباقي ، طبعا لا لان بيكفيني حق ٣ تغيرات عقبها 
ومن ناحية دينمو وكذا لازم تنشب لهم ، مثل ماسويت خرب الدينمو وقالي جيب جديد قلتله لا صلحه وشيل وحط واخرها صلحه سبحان الله 
وسالفة الرجيع للقير والمكينة صحيح لهم فايده لكن حنا وش بنستفيد منه لا حنا ميكانيكيه ولا لنا باع ونفس نبحث ونسوي 
وبنفس الوقت بيكون وفر عليك وقت ومال
يعني لو فرضنا قال ٥٠٠٠ بدون رجيع و ٣٥٠٠ مع رجيع انا وفرت ١٥٠٠ 
وهو الله يرزقه لو ضبطه وباعه ب ٣٠٠٠ كيفه لان مثل ماقلتلك ماعندنا وقت وعلم ميكانيكي نفكك ونركب 

واخوي برو رير ، بالنسبه للدينمو ٧٠٠ تصير لان لما يزبطه ويبيعه مايقولك مصلح يقولك مستخدم نظيف ويصلخون فيه ولو حس انك فاهم نزلك بالقيمه 
وانا معك بعض الشغلات اخليها لهم يتكسبون من وراها 
وللي تقول وراهم عيال ودوام طويل وكذا ترى اغنى مني ومنك 
لان العامل الي يعتبر مديرهم وجايب عمال براتب نفس جنسيته الي له الحلال كله ويعطي كفيله المقسوم كل شهر تراه مدخل ذهب 
واقرب مثال صارلي في ورشه اصلح عندها قديمه ومن النوع الي توصخ ثوبك لاجيت خخخخ 
مالقيت البيج بوس سالت العامل قال روح اينديا واحد اسبوع 
قلت اقطع واخص الي طقها تذكره روحه ورجعه اسبوع 
قال ايوا هو كل ٢ شهر كذذا روح واحد اسبوع هذا نفر فلوس زياده 
هو في انديا ٣ بيلدنق كبير هو فلوس زياده ، المهم قام يحسد مديره ، 
فلذلك لايغرك انه مسكين ومو محصل ولا شغله تعبان تراهم مطلعين ذهب 
حتى حقين البناشر الي ماسك الشغله اموره طيبه وتحصل ورى البنشر جيب جديد ما طلعناه 

وانا ما احسدهم الله يرزقهم ، بس لازم نوعى شوي ، ونعطي كل ذي حق حقه ولا تغلبنا العواطف بزياده 

بو حاتم ضحكني تعليقك ههههههه الله يسعدك 

ابو عابد الله ، خذ البطاريه من محل البطاريات وخذ لك كم لفه وبتحصل سعر طيب ، اترك الي بالحواري دايم غاليين لان يعتبرون الي يجيهم يا انه مايعرف الاسعار او متوهق محتاج بطاريه 

ابو حسين ، دامه قريبك سمحله الله يجزاه خير ، بس ليتك نورته عالموضوع ، 
وعلى فكره معظم الاشياء تضبط بالاصلاح 

اذكر مره باللند خرب علي الكليبر الخلفي يسار 
المهم بالتشاليح حصلته ب ١٠٠٠ وجديد حول ٢٠٠٠ وعلى كلامهم دايم يخرب 
المهم كنت خلاص بشتري جديد ، بس مدري وش الي خلاني اسال عن طقم الاصلاح 
المهم حصلته وركبته كله مع الشغل يا ١٠٠ يا ١٢٠ ريال من ١٠٠٠ 

اعذروني عالاطاله وبالتوفيق للجميع


up 6 down 5
m7md 33 757
قبل 5 شهر و 3 أسبوع



ازيدك من الشعر بيت
يقولك لازم تغير رديتر المكيف عشان ما يخرب الجديد
يقوم يفك غطا في زاوية الرديتر داخله زي القطن فلتر ويشتري الفلتر ذا ب 10 ريال ويبيع الرديتر حقك
حركات


up 7 down 0
ابوزياد123321 201
قبل 5 شهر و 3 أسبوع



 ممتاز اخوي ابو هيثم على هالمعلومات والتجارب  واغلب تجارب الاخوان طيبة وتوضح للمستخدم كيف يمون واعي وعارف حقوقه ووش له ووش عليه  وانا شخصيا اقول الله يرزقني ويرزق غيري وانا مع وجهة نظر اخوي Pro  واقول اذا السعر بالمحصلة تمام لي سواء اخذت القطعة القديمة او خليتها ماتفرق اهم شيء اكون كسبان بالمحصلة واحسبها حسبة رياضية واقرر ولكن انا وجهة نظري في ها المواضيع ان يكون طرحنا عقلاني وعملي يعني ممكن تطبيقه فعليا ويكون مفيد لنا وهذا المهم سواء ربح العامل او الميكانيكي اولا اهم شيء حنا نكون مستفيدين والسعر كويس لنا ومرتاحين في عملية التركيب مكانها والوقت قصير هنا الفرق  وفيه نقطة ايضا بخصوص القطع القديمة خاصة اللي عنده سيارات كثير او مستعمله ودايم يبدل ويغير ويصلح ،،، نقطة التخزين والمكان اللي بتحط فيه القطع المستعملة لاني مجرب يبي لك مخزن ولو قطعك كثير يبي لك اكثر من مخزن  ويبي لك هواية وخبرة تعرف تركب او تاخذ قطع وتبدل يعني اهم شيء تكون انت شخصيا فاهم القطع وخراباتها وايضا تركيبها وبكذا العامل مايقدر يخدعك ابد ابد  وهنا مايحتاج اني اتضايق من العمال وخدعهم لاني اعرف منهم وفاهم اكثر منهم ،،،، مثلا الزيت الزايد او الشغل بنفسك انا اشوف كثير اخوان يقول العمال ياخذون والعمال يغشون ولو قلت له طيب خذ باقي الزيت معك قال لا يوسخ ملابسي ويوسخ السيارة ولو حطيته في البيت يبي له مكان وانا مجرب هالشغلة المحصلة لازم نفكر من زاوية اخرى يعني ليش مايكون فيه محلات تشتري الزيت الزايد ومحلات تشتري البطاريات القديمة ومحلات تشتري القطع المستعملة وتكون قريبة مو بس في التشاليح البعيدة  وهم بكيفهم ياخذون منها للناس ويرهمون ويستفيدون وحنا نستفيد واللي يبي ياخذ اشياء منها ولامعه حق جديد ايضا يستفيد  ،،،انا من زمان اي شيء اصلحه في سيارتي او اجهزتي اجلس مع العامل واراقب الشغلة كامله عشان اصير فاهم في الميكانيكا والكهرباء واعرف وش الخربان بالضبط وكيف صلحه عشان افهم الطريقة  حتى لو مااشتغلت بيدي بعدين لكن لو احتاج اقدر اصلح بدون عامل وهذا هو المهم واقدر استغني عن العامل في اي لحظة  والان اليوتيوب مفيد جدا جدا للتعلم ،،،والا العامل من حقه ياخذ اجرعلى تعبه وجهده  والظروف اللي يشتغل فيها من حر وبرد وغبار وهذا ايضا مفيد في تخفيض الاسعار لانهم عارفين انك تقدر تستغني عنهم 


up 3 down 1
جبل شعيب 100
قبل 5 شهر و 3 أسبوع



نفس الكلام على الكفرات تنطل عنده القديمه ويلمعه ويبيعه اقل 
شي وحده ٥٠ ريال وهي أصلا تألفه 


up 4 down 1
بايع الدنيا 66 1468
قبل 5 شهر و 3 أسبوع



للأسف حنا كشعب اذا خرب شي ماعندنا إلا غير جديد .. طبعا العمالة يقدرون يصلحون كل شي ويسوون توليف لبعض الامور وتمشيك سنين لكن ماله خلق ومايبي يضيع وقت ويقولك جيب جديد .. لو تروح مصر وهالدول هناك محد يغير شي جديد كل شي يصلحونه ويولفونه ويمشيهم سنين


up 5 down 0
ابو محمد 154 44
قبل 5 شهر و 3 أسبوع



والله ي اخوان معنا يارس اذا صار فيها مشكلة

اورح اتمسكن عند الورش واقولهم انا طالب جامعي منين لي حق قطعه جديدة المكافأة ٩٠٠ ريال

واغلبهم يحنون عليا ويصلحون القطعه بدال ما اغيرها ههههه

عاد الي سيارته غاليه ولا جديدة الله يعينه


up 2 down 3
abdullahalharbif15 746
قبل 5 شهر و 3 أسبوع



ابو هيثم الله يوفقك ويسعدك ربي على هذا الكلام الواقعي والمفيد وأين هذه المواضيع من زمان وانا معك حرفيا فيما قلت. والوعي مطلوب من الجميع 


up 0 down 0
طبعي غير بعض البشر 48
قبل 5 شهر و 3 أسبوع



حتى الفحمات ما أنصح تخليها
شوف محلات السكراب

محلات السكراب تستقبل المعادن و البطاريات بيعها و اكسب من وراها

هذا الحل اللي متبعه

و شكرا يا صاحب الموضوع


up 4 down 0
الفارس المميز 2633
قبل 5 شهر و 3 أسبوع



وعليكم السلام ورحمة الله وبركاته ، وانت بخير ، يعطيك العافية يابوهيثم على الموضوع ، صح ان بعض الناس لازم ينتعلمون لكن من طرفي انا مستحيل اخلي قطع في الموتر عند راعي المحل سواءاً بنشري او كهرباء أو مكانيكي ، لأن بعض

القطع تقدر تستخدمها مره ثانية في حاجة الطوارئ وبعض القطع تلقى خرابها بسيط يتصلح .


up 0 down 0
نواف القحطاني 1 13
قبل 5 شهر و 3 أسبوع



لاتكن ( صيد ) ثمين ل المجرمين...الخرده مقابل المال..والا خذها معك..بعها او ضعها ف المستودع..او ارمي بها في مكان بعيد..بحيث لن يعثر عليها احد..لاتساهل مع المجرمين..3Z


up 2 down 0
.ابوظافر 48
قبل 5 شهر و 3 أسبوع