وش سالفة السوم على الخاص بكل اعلان

أي اعلان بدون رقم أو مقفل الردود أو يحط سومة من خارج الموقع تلاقيه غير جاد بالبيع ويبحث عن زبون غشيم يبيعه السيارة بسعر غالي وبدون فحص

نصيحه اشتري سياره او اي سلعه والسعر واضح ولو غالي عليك سعره فاوض معاه بالاتصال ولو وافق خير وبركه روح افحص وقلب
عن نفسي اشتريت سياره من الموقع كان طالب 25 واتصلت وقابلته والحيت عليه يخفض وراعاني ونقص الفين وفحصت
وطلعت تمام واشتريت
ما عليك باي سعر من الموقع ولا اي سومه اتصل وعطه سعرك بالي في جيبك ولو وافق خير وبركه ولو ما وافق دور وتلاقي
باذن الله
السوق على قفا من يشيل اهم شي الصبر وطوله البال

انا بتكلم عن تجربة 

كنت اعرض سيارات لي او لربعي 

المهم مثال السياره تسوى ٣٠ واكثر 

بالعام يسومون ب ١٢ او ١٥ الى ٢٠ ومعظمهم كلام فاضي 

بالخاص سومات فوق ٢٥ وبرقم جوال وكلام محترم 

والزبون الي يجيني اساسا لا سام بالعام ولا بالخاص 

الزبون يجي بالاتصال بدون ردود اغلب الاحيان 

فصرت اقفل الردود وارتحت من الي يبخسون بشكل مو طبيعي 

ف رجعت وابتلشت ب الي يدقون وبازعاج واوقات غلط 

يفكر انه شاف الاعلان الحين اكيد راعي الموتر صاحي 
مثل واحد داق علي ٢ الفجر سلامات 
صحاني من نومي ماكنت حاط صامت وتهاوشت معه
وقلتله ماني بايعك ياخي عيب وقت اتصالك

ف بالنهايه واريح شي والي ضبط معي 

اقفل الردود وماحط رقمي واعرض سلعتي بالسعر المطلوب
سالفة سوم ماحبها لانكذب ع بعض بتجيب اكثر من الي ابيه مثلا

ف احط سعري ( وانتظر الرسايل ) بسوماتهم وارقام جوالهم
وصراحه ما ادق عليه ،
اذا جازت السومه ارسله رقمي اقوله كلمني
اذا دق يكون صامل ، مادق ماعنده سالفه يطقطق

والله يرزقنا واياكم كل خير  

حط نفسك مكان المعلن وجرب اعرض سيارتك.
اذا هي تسوى ١٥٠ في العام بيجيك واحد ويسومها ب ٨٠ ولو تقول له بعتك معد رد عليك لان فيه كثير يلعبون وماخذينها طقطقة.
الافضل انك تحد سيارتك وتقفل الردود عشان ترتاح من المزح الثقيل 

بصراحه انا متابع هذا الموقع من زمااااان وملاحظ ان اغلب اسعار السيارات هنا بالموقع شااااطحه فووووق مره يعني مثلاُ تحصل كامري موديل 2016 ستاندر ماشيه كثير يقولك حادها بي 50 والا 55 وهي بالمعارض يالله تجيب الـ 40 الف وبالطقاق بعد ، ولو يحرج عليها بالحراج ماتجيب ولاحتى 30 او35 هذا اذا صارت نظيفه وبدي وكاله بعد ،،،،
يعني صرت بصراحه ادخل هذا الموقع من باب الاستئناس فقط والتسليه لاني بصراحه لو نويت اشتري سياره ماراح اشري من هنا خير شر بسبب المبالغه في الاسعار ،،، هذا غير النجش والكذب من بعض الباعه هنا ، يعني مثلاً اول مايعرض سيارته ويجون الناس يسومونها بالعام بي 20 الف مثلاُ يقول والله جابت على الخاص 25 ، يعني انا ما ادري من هذا الزبون المجنون اللي زاد على نفسه 5000 طقه وحده ،
يعني الزبده تحس الدعوه نصب في نصب بصراحه من اغلبهم ، طبعاً انا ما اعمم انا اقول الاغلب وليس الكل ، اكيد فيه ناس هنا محترمين وممتازين لكن الحذر واجب على اية حال ،،،
والله الموفق .

والله تبي الصدق موقع حراج ماينفع تشتري منه سيارة اول شي بعض الااسعار مبالغ فيها وماتعرف لون السيارة الحقيقي مثلا لو فيها رش او جايتها صدمه قويه ومجبصه بمعجون بالحقيقي التصوير غير عن الطبيعة احسن شي بموقع حراج بيع قطع غيار ممتاز جدا جدا ارخص من التشليح بعضهم انا نص القطع اخذها من الموقع

من يوم عرفت حراج وفيها من العجب العجاب الكثير

لكن الي شفته امس مامر علي ابداً ابداً

منزل اعلان....وكاتب ع السوم..ومقفل الردود!!!
ههههههههههههههههه

الاعلان بقسم تويوتا المدينة

دائما اشوف ناس كثيرين يقولون السوم وصل 20 الف في الخاص وبعدها بثلاث ايام يقول الحد20 الف
ياخي كون صادق من البدايه ولا تخرب على نفسك وغيرك

والله يا عزيزي عندي مبدأ إن اللي يسوم بالعام ما فيه أبدا أي جدية

وفيه بخس فضيع

انا من الأشخاص اللي أقفل الردود .. وبنفس الوقت أشوف سعر السيارة بالسوق كم تسوى ولا أبالغ

وصدقني الجاد بالشراء واللي رغبان السيارة بيتصل عليك ويهتم كثير ويرسلك وتس أب

فيه عيب فقط بخصوص الاتصال: اللي هو يتصل عليك ويقولك كم ماشيه ووش فيها ووش لونها يعني مثلا مكتوب بالاعلان ( كامري ) على طول ما يقرا اي تفاصيل .. يشوف الصور ثم يكلمك ويقعد يسألك

لكن موضوع إني اقفل الردود عشان يجيني الغشيم مثلا لا والله غير صحيح

الموضوع هو ضمان الجدية بالاهتمام .. لان فيه بخس مو طبيعي من الشريطية .. وبنسبة كبيرة اللي يسوم بالعام شريطية

هذا اللي حبيت اوصله

صح لسانك يالاحترافي +1
وانا نسيت اكتب عن الي يدق ويسأل عن ممشى وبدي ووو وانا ذاكر كل شيء بالموقع 
لدرجة يسألك هي كم موديلها ، طيب ماتعرف موديل ولا ممشى ولا نوع فل ولا استاندر ( وشوله داق )
المشكله تسايره وتجاوبه بكل صدر رحب واخرها يقولك طيب ويسكر ، وهذا وجهك يالضيف ههههه

سيارتي كامري 2009 نزلتها بشوف ان جابت قيمة بتوكل وابيع ساموها بالعام 5 و 6 و7 و 9 !!!

وجاني واحد صامل بالخاص سام 12 وقلت له باقي عليها رفع السومة لـ12500 ومابعت ، طبعًا السيارة قيمتها بالسوق من 15 الى 20 تقريبًا فطبيعي لما يجي احد يسومها بـ6 و 7 بيجي واحد يسومها بدبل السومات ذي عع الخاص ويبقى ماهو حقها

اللي يدق ذا يسوم نفس السيارة بعشرين اعلان واذا دق عليه واحد منهم يسأله بكم لأنه مايدري اي واحد من كثر اللي سامهم ، وبالاخير مايشتري طبعًا يكسر سومته بكم الف واذا عييت يسكر

انا مايقهرني الا جاء يعيب بسيارتك عشان تبيع بسومته