أضف سؤال أو موضوع جديد          

المخالفات وما ادراك ما المخالفات

up 13 down 7
a.ibrahem 3167
قبل 3 سنه و شهر



السلام عليكم ورحمة الله وبركاته
صبحكم الله بالخير او مساكم الله بالخير جميعاً

فيه موضوع مشغلني من فترة ودي اتكلم عنه وما حصلت الفرصة المناسبة ولا لقيت وقت اني اطرحه الا وهو المخالفات
يعني نشوف مواضيع كثيرة تمر علينا وهي كالتالي :

1- يا شباب بشتري موتر وعلي مخالفات وش السوات 2- ياشباب موتري ببيعه تشليح وعلي مخالفات واستمارته منتهية
3- ياشباب ببيع موتري واستمارته منتهية وعلي مخالفات مقدر اجدد الخ ......

طبعاً من خلال تطلعي لبعض الاجابات على اسباب المخالفات هذي اكتشفت انها منحصرة على الآتي :
1- موتر اخوي او موتر للبيت كان بأسمي وتراكمت ذا المخالفات
2- كنت اداوم من الغرب لقلعة وادرين يومياً 200 كيلو
3- عطيت ولد عمي موتري راح عليه لاهله وفي اسبوع جاب لي هالمخالفات الخ .......

طبعاً من وجهة نظري الشخصية الاعذار اللي مكتوبة فوق كلها كلام فاضي مع احترامي

يعني نجي لأول واحد اللي يقولي موتر اخوي او موتر البيت بأسمي وجتني هالمخالفات مهب عذر ذا مع احترامي يعني موتر اخوي بأسمي جتني مخالفة وحدة في الست شهور مرة وحدة اقول ما يخالف واسددها حزتها لاحظ حزتها عشان ارتاح والاصح بعد يسددها اخوي هذا اللي يستعمل الموتر تقولي طالب ماعنده الا مكافأة خله ينقها ويطفر عشان يعرف قيمة الفلس وينزبط ويحترم النظام ولا اسددها عنه مرة مرتين شفته انفلت تليت الموتر منه وللمعارض وبسلامته ان شاء الله يداوم على رجليه منيب مسؤول عنه دام ما احترم النعمة اللي هو فيها موتري وباسمي واعطيه يروح ويجي عليها ويجيبلي الخساير والوهقه ، وبعضهم بيقولي اخواني كلهم يستعملون ذا الموتر ومدري من اللي تسبب بالمخالفة اوكي جتك الرسالة بالتاريخ الفلاني اليوم الفلاني دق عليهم واحد واحد من اللي ماخذ الموتر اليوم الفلاني الحزة الفلانية لين تلقى اللي تسبب ويسدد الله لا يهينه لو انه عاطل يتسلف يدبر عمره ولا لعاد يفر طارة الموتر دامه مهب محترم النظام وبيورطني بمبالغ لا حصر لها.

الثاني اللي يقول يومياً دوامي 200 كيلو رايح جاي انا اقوله الله يعينك هذا اولاً ثانيا ياخي شفت نفسي جتني مخالفة مخالفتين ثلاث بسبب سرعتي وانا رايح للدوام خلاص اصحى لعمري اصير اطلع بدري امشي نظامي حتى لو اخذ ساعات اكثر بسلامتها ولا اداوم من هنا ويطير راتبي على المخالفات من هنا يعني تلقاه يوميته في الدوام 120 ريال مثلاً ولا 200 ومخالفته 300 ولا 500 يعني وش استفدت كذا انت تداوم عشان تطلع لقمة عيشك وتعيش ولا عشان تسدد في هالمخالفات.

الثالث عطيت ولد عمي الموتر وجاب لي هالمخالفات انا اقولك اياها بختصر منيب مفصل في هذي اذا ولد عمك ما يستحي ولا يقّدر انا بصير اقوى وجه منه وانا صاحب حق يعني انا اسوي معه خير واعطيه موتري يستفيد منه يرجع لي بمخالفات يعني فوق شينه قوات عينه موتري وجالده ومخالف عليه ينقها الله لا يهينه ولا عاد يشد مفتاحه بسلامته يزعل ولا يطق راسه بالف جدار اما كرم حاتم الطائي ما ينفع في هالمواقف مخالف تتحمل الله لا يهينك هذي مافيها فزعة ولا عانيه.

والاسباب كثيرة ومختلفة وكل سبب له حل سواءً سلمي ولا حل الزامي ونهائي

نجي الآن لأسباب عدم السداد طبعاً الغالب يقولك والله التزامات ويالله الواحد يلحق مصاريفه اوكي على عيني وعلى راسي بس بتقنعني شهرياً كل اللي تشتريه او تصرفه من راتبك هو احتياجات فعلية بحته مافيها شي ترفيهي او شي تحتاجه بس مهب ضروري الجواب لا طبعاً ومستحيل يعني الشهر اللي بتشتري فيه ايفون x ولا ساعة ابل ولا بتروح بها دبي تبعزق خذ هالدراهم وانطلها في مخالفاتك اوكي احرم نفسك في شهر من الاشهر من الوناسه بس في المقابل استفدت انك قضيت حاجة ومهمة

طبعاً الكلام اللي كاتبه انا كله فوق اتكلم عن المخالفة الفردية يعني وقت صدورها او مخالفتين ثلاث بالكثير لكن الناس اللي طاح الفاس بالراس عندهم والحين عليه 30 ولا 20 ولا 12 هذا اقوله الله لا يهينك اسحب تقرير بارقام مخالفاتك وشهرياً ادفع لك وحدة كنك تقصد موتر يعني لا تحط اعذار ما عندي امكانية اسدد وغيره حنا لا شتهينا وبغينا الشي طلعنا الفلوس لو نتسلف ونسدد واذا ما بغينا قلنا التزامات وما تكفي ولو تجي تمسك راتبه وتشوف وين صرفه هالشهر او طوال السنة بتلقى فيه خنبقه اشياء شاريها رفاهية ممكن يستغني عنها او يأجلها على الاقل في سبيل انه يخلص اللي عليه

طبعاً في النهاية الغرابيل ذي كلها عليك انت هم مهب ضارهم شي وبتسدد بتسدد طال الزمن ولا قصر ف ليش كل هالعبالة وتدخل غيرك معك في متاهات وسوالف يا ولد عمي خل الموتر باسمك يا مدري سو كذا انا مقدر علي مخالفات واحياناً يدخل فيها احراجات ومجاملات على غير سنع.

في الختام انصح نصيحة اخويه لكل واحد عنده مخالفات سواءً كثيرة ولا قليلة سدد اول بأول نصيحة أخ واعتبرها مثل الدين معلق في رقبتك بكره لا قدر الله يحدك امر من امور الدنيا لازم تسافر ضروري تجي لجوازك منتهي ولا بتجي تصدر ما تقدر ولا بتجي مدري وش تسوي وقالوا لك لازم تسدد مخالفاتك طيب ليش انا أأجل واطوف الموضوع لين اوصل للمرحلة ذي ثمن اجي اطر واتشحذ العالم يا اخوي سلفني 5 يا ولد عمي مدري وشوا وهذا غير الاشياء اللي تتراكم عليك بعد من المخالفات مثل الاستمارة انتهت لها سنين ومنتاب قادر تجددها ولا رخصة اعتقد بعد الرخصة نفس الكلام طيب ليه ؟ ولين متى ؟

شكراً لكم وموفقين
احمد ابراهيم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


صح لسانك وسلمت يداك .. 

خير ماقلت ، وجزاك الله خير 


up 2 down 0
m7md 33 1155
قبل 3 سنه و شهر



انا عجزت افهم الي عليهم مخالفات 100 الف و 50 الف

هذول وش قصتهم يعني يتعمدون المخالفات

انا علي 150 ريال حزام امان ومتظايق منها



up 5 down 0
mercy_sa 1075
قبل 3 سنه و شهر



وعليكم السلام اتفق معك بكل كلمه قلتها

اغلب المخالفين او اللي توصل مخالفاتهم لمبالغ كبيره مسسسستهترررين سواء هو اللي جاب المخالفات
او اخوه او ولد عمه لانه هو مساعد ومشارك بالاستهتار لا نضحك على بعض

لكن النظام فيه خطا كيف شخص توصل مخالفاته الى مبالغ كبيييره مثل 50 الف او 100الف
المفروض يستدعى اول ماتوصل مخالفاته 15 الف ويحقق معه وتسحب سيارته او تصادر



up 3 down 1
المنطق يقول 728
قبل 3 سنه و شهر



كلامك سليم ١٠٠٪‏ عدم التقيد بالنظام والتكاسل وعدم الالتزام بالانظمه هي اللي خلتنا كذا بس الواحد لازم يغلط ويتعلم من غلطه


up 1 down 1
ابو حسين.......... 1024
قبل 3 سنه و شهر



دوامي 200 كيلو يوميا والخط كله ساهر لي سنه 6 سنين ماجاتني الا مخالفتين وبسرحان بسببي اتصورت


up 1 down 0
camaro28 812
قبل 3 سنه و شهر



قبل لاتسوي فاهم وبتجلد العالم
اجلد اللي مخلينا نوصل ل50 و100 الف مخالفات ولحتى مليون ريال بدون اي عقوبات

بكل الدول الاجنبية اللي حنا نحذوا حذوها بالتطور

اذا وصل الواحد مبلغ عالي من المخالفات

يسحبون رخصته ويسجنونه ويصادرون السيارة ويحطون عقوبات تخلي المخالف يركد

اللي صاير معنا قلة حيا




up 1 down 4
شرقااووي1212 16
قبل 3 سنه و شهر



اذا وصل الواحد مخالفات ب5 الاف
المفروض يصير عليه جبسة محكمة
بتسدد والا سجن وسحب رخصه
وان باقي تكررت راح نسجنك سواء سددت او لا
هذي القوانين اللي تمشي العالم صح

مو تعطيني سياره وحط وكاميرا وتقول روووح ومهما تتصور راح تدفع
كذا انت ماتبغى مصلحتي
انت تبغاني اخالف واسددك وانت مبسوط بس
تخيل



up 1 down 5
شرقااووي1212 16
قبل 3 سنه و شهر



كلامك اغلبه غلط..
الكلام ب المواقع اسهل من الفعل ب ١٠٠٠ مره..
كلامك مثالي وليس واقعي..واغلبه غير قابل ل التطبيق..


up 1 down 6
.ابوظافر 52
قبل 3 سنه و شهر



المشكله الغالبيه يضحك على نفسه ويأتي بأعذار واهيه وكاذبه ويصدقها ..

يا أخي أنا لست مع ساهر ولا ضده ولكن عندي عقل إذا صارت مخالفاتي ألف ألفين أحترم نفسي وغصب عني وأوقف هذه المخالفات ماهو أستمر وطز خلها توصل مليون ( أليس هذا بإستهتار )

وياصاحب الموضوع تتكلم على ناس وتقول 12 وعشرين ألف ههههههههههه الله يصلحك الناس تتكلم من التسعين ألف والغالبيه فوق المئة ألف وزملاء لنا ومعارف هههههههههههه


up 3 down 2
jakwar2004 437
قبل 3 سنه و شهر



شكراً لكم على اضافاتكم

شرقاوي 1212

ماهو شرط كل نظام لازم اضع له عقوبات صارمه عشان انت وغيرك ينزبط ويمشي على الجاده فيه شي اسمه رقابة ذاتية

وبعدين تطبيق قرار مثل هذا بيترتب عليه اشياء كثيرة يعني ابسط شي بيترتب عليه انت الحين يا شرقاوي عليك 30 الف يعني المفترض تنسجن وبالتالي بيترتب عليه سحب رخصتك وبتنسجن وبتنفصل من دوامك حسب النظام بسبب ايقافك وبالتالي بتصير عاله على المجتمع لو طلعت من السجن وانت عاطل عرفت كيف ؟

فيفترض اني انا احكم عقلي واذا شفت مخالفاتي بدت تزيد اظبط عمري واعقل مهب لازم الحكومة تربيني

عساهم يلحقون راس مع هالدرباويه وحقين الاوبتمات وذا المبزره عشان يستدعونك انت وغيرك ويسجنونه كان تمتلي السجون




up 2 down 2
a.ibrahem 3167
قبل 3 سنه و شهر



ابوظافر

اذا كلامي غلط 100% وين الصح اجل ووين المثالية في الموضوع والغير قابل للتطبيق ترانا عايشين معكم ومثلنا مثلكم مناب من كوكب ثاني ماجانا 30 ولا 100 الف مخالفات


up 0 down 2
a.ibrahem 3167
قبل 3 سنه و شهر



صح كلامك اخوي a.ibrahem محنا من كوكب ثاني 

الموضوع كله ( وعي ) ورقابة ذاتية .. 
واكيد العمر له دور والسلوك النفسي .. 

سابقاً كنت ما اهتم حتى من قبل ساهر ايام الرادارات 
اسرع وتجي مخالفات واسدد كنه العيد 

بس من تالي بديت اوعى لنفسي واحاول اني اهدي والتزم بالنظام 
وان فلوس المخالفات انا اولى فيها ، او اهل بيتي .. 

وصارت تجيني مخالفات بين فتره وفتره اكون ساهي او ما انتبهت ، او على عجل .. 

اول كنت اذا بسافر ماعرف الا فوق ١٦٠ اما الحين لا ثبت السرعه وخلك محترم (: 

صراحه قبل اسبوع دخلت على ابشر وجمعت القيمه الي انا دافعها مخالفات من عام ١٤٢٦ هـ 
صراحه جاتني حسره مبلغ فوق ال ٢٠ الف .. 
لو انها عندي الحين كان اخذت موتر افضل من موتري او استفدت منها .. 
ومن ضمنها اشارة ٣٠٠٠ كان ابوي ماخذ موتري ولف منها من المسار الوسطي حاولت اعترض اكثر من مره بس بدون فايده 
دفعتها قبل العيد عشان اجدد استمارتي وانحرمت من الطلعه بالعيد ): 

فلذلك اتمنى من الكل انهم يوعون وينتبهون وكذا .. 
وحتى لو يحب السرعه يحاول قد مايقدر ،. 

لكن الله كريم والله يفكنا ومن يقرا المخالفات والمشاكل .. 

وشاكر لك موضوعك المميز .. 


up 1 down 0
m7md 33 1155
قبل 3 سنه و شهر



١/اغلب الاحيان تظطر العايله شراء سياره..اذا كان احد ف البيت يطلعونها ب اسمه..وفي الغالب الاخ الصغير..مع الوقت يكون عليه مخالفات..
٢/خارج نطاق العايله حتى لو احد الاقارب اخذ السياره او كنت راكب مع خويك بسيارتك..في سفر مثلا وجات مخالفه وسببها خويك..الاغلب يقول اعطيك مع الراتب..وهنا المشكله..لان مع الراتب يبدا يصرفك ويقول مااقدر..تظطر تاخذ موقف سلبي ويصير بينكم مشكله عشان مخالفه
٣/اغلب الناس عليهم التزامات ولايقدر يسدد..شهر اجار بيت..وشهر يسدد المتاخرات على سيارته المنتهيه ب التمليك..وشهر عيد اضحى ومدارس واجازه . . . الخ ) مع الوقت وحاجات الحياه الضروريه تبدا تتراكم عليك المخالفات..
٤/الحرص ف السواقه والانتباه..يجنبك المخالفات..لكن على حساب مشيك بشكل ابطء من غيرك..
*مجرد رأي..3Z


up 0 down 0
.ابوظافر 52
قبل 3 سنه و شهر