هل ينصح بشراء منزل جاهز ام البناء؟

اذا بتشتري بيت جاهز تأكد من شهادة الاستدامة عشان تضمن حقك وسلامتك.

نصيحه البناء أرخص وتكون عارف المواد الي بتسويها أنت
احسن من المنازل الجاهزه


بس يبي طولت بال وكل شي يتيسر

الحمدلله خلصت بناء قبل شهر، تعب وجهد مو طبيعي. لو ما عندك وقت للمتابعة وطولت بال ابعد بعد سماء عن الارض.
خذ وقت في الرسم والتصميم ولو سنة، حتى لا تندم. الجاهز أذا بتشتري أفضل شئ تأخذ بناء شخصي عظم أو جاهز

حياك
انحش عن الجاهز 
من واقع تجربه انك بنفسك اتابع البناء
صح تعب بس تستمتع وتتعلم وتاخذ خبره
العظم اشراف هندسي من القواعد لين بيت الدرج سلم واستلم
التشطيب كذالك 
نصيحة اخيرة ابعد عن تصميم الدرج الداخلي 
ماله شبيه الا السيارة الفخمة الغاليه اذا جيت تبيعه طاح سعرها باالتراب
وباالتوفيق

اعرف واحد بنا عماره 3 ادوار جاه سكر وضغط وفشل كلوي وقبل شهرين جلطه

أهم شي أهم شي الصحه، عندك صبر وفلوسك جاهزه انطلق

خيار اول :لو كنت فاضي طبعاً وعندك وقت: البناء افضل بشرط المواد اصلية او جودة متوسطة على الاقل.+ متابعة واشراف يومي. وصبر وحلم وطولة بال وتفرغ. شبه كلي.
.خيار ثاني لغير المتفرغ او المشغولين او عدم الصبر:: تشتري العقار( البيت )( عمارة ) من صاحبه الذي بناه بنفسه وسكن فيه ..+ تكشف عليه من قبل مكتب هندسي بالخارطة

غير كذا لاانصح بالجاهز ابداً وخاصة فلل الشركات .والمقاولين الصغار.

هذي مثل سالفة توضب المكينة او تشتري مكينة بديلة

كلن له تجربته و علمه اللي مع البناء و اللي مع الشراء
بالنهاية تحكمها ظروفك و استطاعتك المادية

باختصار عندك وقت ومزاج ابني على مزاجك بالتصميم الي تبي 
ماعندك وقت اشتر جاهز ويفضل شيء معتمد ومثقه ومعروف

وعليكم السلام ورحمة الله 

الجاهز اغلبه مواد اقل جودة فترة بسيطة وقدك تشوف التهريبات وتحتاج ترميم وبوية الخ 
وقد سمعت عن بيت جاهز الموية تنزل من افياش الكهربا 

الافضل تبنيه وتكون مطلع على جميع التفاصيل وجودة المكونات ومواد السباكة والكهربا يعني جودة ممتازة عشان تطول معك 

انت استخر ربك والله يختار لك الخير 

طبعا طبعا بيت انت تبنيه افضل 100 مرة .. من ناحية التوفير على نفسك بالفلوس .. ومن ناحية انت تختار تصميمه
وتروى بموضوع التصميم لان لو بديت خلاص ما فيه تعديل بعدها .. رح تتعب شوي بس النتيجة بتكون ف النهاية ان شاء الله
مرضية الك لفترة طويلة بالتوفيق

السلام عليكم
اكيد انت تبني احسن لكن حسب امكانياتك اذا عندك طولة بال
ولبناء مصنعية او عظم اذا مصنيه تتعب واذا لقيت عظم سعره طيب
مع عقد بشروطك خاص الحديد وتحط مشرف وفلوسك معاك تحدد
الدفعات على سب العمل يعني مراحل اخلص القواعد اعطية دفعه خلص
الميدا اعطيه دفعه صب السقف اعطية دفعه وخليه هو سابقك بالعمل
وفي مواقع عن مواصفات البناء والخرسانه تقتدر تستفيد منها

مثل ماذكروا الاخوان أن البناء هم مابعده هم ويبي له تفرغ تام وطولة بال .. أقول لك هذا الكلام

من تجربه أمامي زملاء لي أخذوا قروض بناء وأغلبهم معاه السكر وأقل واحد راسه صار أبيض .

شوف لك جاهز يكون بناء شخصي وحط مليون خط أحمر على كلمة بناء شخصي لأن شريطية

العقار جميعهم الآن يقول لك بناء شخصي ، أهم شي تشتري عقار بناء شخصي من صاحبه ويكون سكن

فيه ولا تستعجل أبداً خذ وقتك وإنت تبحث حتى لو طال الوقت شوي .

محدثك إشترى جاهز وبناء شخصي وتحملت هبوط أرضيات داخليه والحوض كلّه هبط . لكن الحمدلله على كل حال .

* الحوض = الحوش

والله وزاره الاسكان قالو تعال نعطيك بيت جاهز ورفضت
مثل الي يلف على رقبتك حبل المشنقه لمده 25 سنه
وبناء تجاري

كل شيء بالدنيا يبغاله طولة بال
أشوف البناء أفضل من الجاهز لأنه على نظرك وأنت تختار اللي يعجبك في كل شيء

إذا الدراهم متوفرة أتوقع كل شيء راح يهون
لكن المشكلة اللي يبني بشكل متقطع وديون والتزامات هذا راح يتعب كثير..

ياليت يا إخوان إذا فيه مواقع تهتم بالبناء تدلوني عليها وأكون لكم من الشاكرين

لي تجربة مع شقة اجار جننتني وقلت في نفسي الحمد لله اني مستأجرها مو ملك
طبعا استأجرت شقة بعد زواجي وسكنت فيها وكانت جديدة انا اول مستأجر لها وكان تشطيبها روعه وحلوة لعريسين وكذا المهم سكنت فيها ثلاث سنوات وسبحان الله كملت سنة بالتمام بدون مشاكل وبعدها بدأت الاحظ عيوب فادحه فيها طبعا صار جاري اللي ساكن تحت شقتي يشتكي ان دورات المياه عندي تهرب عليه في شقته وشوي صار مدخل العمارة فيه هبوط خطيرر وشوي بعدها بفترة جدار الحوش طاح بسبب هبوط في الارتداد الجانبي وفجأة كل شوي اغير خلاط للحمامات والمطبخ وشوي السخانة خربت شوي جانا مطرر قوووي ونزل الماء من السطح ع الافياش كل الافياش تصب موية وشوي الشقتين اللي تحت صار فيه هبوط وحصل صدع بالعمار من النص والكهرباء صار فيها ماس قوي اذا شغلت المدام العجانة الكهربائية او اي جهاز فولته عالي يطفى قسم الرجال كامل بعدها طلعت ادور شقه ونقلت لها وتمام الشقة الحالية 

بعدها  ايقنت في نفسي يستحيل اشتري بيت جاهز بحياتي ابني لي بتعبي وجهدي لو 4 غرف او اجلس مستأجر او اشتري بيت اذا كنت اعرف صاحبه واعرف كيف كان شغله في العمارة غير كذا اشيل الفكرة من راسي 

جبتها على الجرح وكنك مادريت
و كملها الاخوه اللي ردو كانهم دارين عني
ياسر وابو حسين وبقية الاخوه
،،،،،،،،،
كنت افكر اشتري جاهز وبعد ماستأجرت شقه وشفت البلاوي المتلتله وهربت منها ماطولت , ورفض صاحب الشقه استلامها
ويطالب في بقية العقد ,, وكانت فيها بلاوي بالسباكه ولخبطه بالكهرب وشغل ابو تجاري بحت لا يمكن البقاء بها
،،،،،، عندها تبت من شي اسمه اشتري جاهز إلا بشرط ،، انك تعرف صاحبها وتطلع على فواتير الشغل انه اصلي
وان فيه مكاتب هندسيه مطلعين على شغل العماره عند البناء وموقعين عليها ,,,,

غير كذا اعيش في اجار والشقه اللي ماتعجبني احذف مفتاحها
والله يعين