السيارة تطفي وانا سايق وتتاخر في التدويرة لفيت كل الورش وخسرت فلوس ولا حل

مافهمت قصدك التانكي فيه مقاومة؟

الكود ما يطلع الا اذا حساسات الدبه قرائتها مضروبه
هذا يعني ان فيه احتمالين
1 الدبه خربت بسبة زيت يجيها او بنزين اذا الزيت ما ينقص ممكن البنزين ما يبخ بشكل منتظم ويزيد عن اللازم واتلف الدبة وعشانه غير منتظم تطفي ويجيك استهلاك خيالي
2 ممكن نفس الخراب اللي ذكرته لاكن الدبه سليمه فقط البنزين كثير وضرب قراءة الحساسين اللي في الدبه يعني اذا نشف البنزين اللي نزل للدبه ترجع الحساسات تشتغل مضبوط


لازم اعرف قصدك بمقاومة التانكي عشان اعرف وش اللي يخللي البنزين غير منتظم

يقصد المقاومة يعني اذا راح للمحطة يعبي بنزين كل مايعبي يقفل لحاله اتوقع فيه ضغط هواء

يعني المشكلة في نظام EVAP حق التانكي شوف ورشة فيها فلبيني وقوله افحصلي EVAP قطعه رخيصة بلوف اوهواز

يعطيكم العافية ابو زياد ودارك ايفل

المشكلة الرئيسية أنه السيارة ما تستغل من اول نقرة لازم مرتين وثلاث خصوصا
اذا كنت سايق ووقفت لعشرة دقايق او نص ساعة
واحيانا تطفي وانا سايق وادور بعدها بعشرة دقايق كذا
الحين رحت لمكنيكي نظف الفلتر حق البنزين وقال المشكلة يا اما من الفلتر او من الطرمبة حقت البنزين

نظف الفلتر والمشكلة ماراحت الحين برجع له واشوف اذا لقيت فحص ضغط الطرمبة بفحصها شكله بتطلع هي السبب

تمام
نظام EVAP يعطي نفس الاعطال يعطي فل وانت تعبي ويعطل التشغيل ويخرب الصرفية لانه يبخر التانكي للثرتل وله اهواز كثير وبلوف فحصه بسيط للي يعرفلة
اهم شي وقف الخساير من خبره كلهم بيجربون لانهم يبون فلوسك ولاعليهم الا من رحم ربي
نصيحه شوف فلبيني وقله يفحص EVAP

احتمال طرمبه البنزين اذا احترت تطفي ودفع البنزين ضعيف يرسل للبخاخات
غيرفقط الطرمبه فقط بدون البدي الخارجي يركب عليها طرمبه بنزين مستوبيشي جالنت نفس الطرمبه
وسعرها 80 ريال ياباني ولا يجي اصلي لا كامله 530 ريال
غيرها منت خسران شي

هاذي اعراض حساس الكرنك بس ماعرف ايش الكود اللي طكرته انت 

تعديل

ذكرته"

اعتقد من حساس الكرنك. هو اللي يخلي السياره تطفي وهي شغاله .
و ماتتشتغل بعد ماتطفي الا بعد فتره.

حساس الكرنك اذا خرب ماتشتغل نهائي
اعراض حساس ياسليم ياعطلان مادام تشتغل السياره ليس من الحساس اما اذا ماتشتغل نهائي هذا احتمال حساس الكرنك
حتي لو بعد فتره

يعطيكم العافية يا شباب
انا من شقرا والورش هنا ميته لا أجهزة زي الناس ولا عمال زي الناس
دورت جهاز يقيس ضغط الطرمبة عشان اتاكد و ما حصلت
المهم قررت اروح الرياض الصناعية القديمة ألف على كم ورشة اشوف وش يقولون
وامشي على الكلام اللي يتفق عليه أكثر من واحد
قبل سنة يمكن رحت العضيب وصلخني واحد سوري صلخ مرتب
اذا فيه ورش كويسة واسعارهم معقولة في الصناعية قولو لنا

في احتمال تكون هذي المشاكل بسبب كتاوت طرمبة البنزين؟

لا لان التانكي يعطي فل وهذا الشي ما يصير الا اذا EVAP خربان لان المحطه فيها حساس ضغط هوا اذا التانكي حقك مسدود فيه مجاري وبلوف نظام ال EVAP يعطيه فل وهذا النظام واصل للثرتل

واذا ما خاب ضني لو تفك غطا التانكي راح تشتغل السيارة

بمعنى ان الطرمبه جالسه تشفط من تانكي مقفل مافيه تنسيم يعني ماراح تشفط شي, لازم يدخل هوا مكان البنزين اللي تشفطه الطرمبه والمسؤول عن العمليه هو EVAP

الله يسعدك يابو زياد
فعلا اذا فتحت فكيت غطا التانك تشتغل من اول دقة وما تطفي
شكلها ميه بالميه من نظام evap زي ما قلت

لكن للعلم لاتوجد رائحة بنزين منتشرة ولا فيه مشكلة مع السرعات الكبيرة وكمان مافيه
صوت فرقعة عند العادم والأعراض اللي قلتها فوق موجودة سواء كان البنزين عالي ولا قليل
واغلب الظن أنها تتاخر اكتر في التشغيل لما يكون منسوب البنزين قليل .. رغم هذا ممكن يكون الخلل في نظام الevap

ولا يمكن يكون فيه احتمال ثاني؟

واذا تعرف يا بوزباد كم سعر فحصه وإصلاحه ووين احصل ورشة تقدم هذي الخدمه في الصناعية القديمة
والله يا بوزباد لو تفتح لك ورشة وتشرف عليها تستفيد وتفيد الناس وما نخسر نص الفلوس اللي قاعدين نخسرها من ورشة لورشة

النظام ماراح يخلي الرائحة تطلع لانه مسدود
والنظام فيه تبخير على المانيفولد (يعني والسيارة على ضغط 750 اما اذا دعست تنفتح البوابه ويزيد المانيفول
ما اعتقد فيه خلل ثاني لانه الاعراض ممكن تنحصر في evap ماعدا كود p0420 وهذا اذا البنزين وزنيته غلط يطلع الكود والevap مخرب وزنية البنزين يعني اذا ضبط ترجع وزنية البنزين تمام

ما اعرف احد في الرياض لاكن اي محل فيه فلبيني يعرف بعض المراكز ياخذ فلوس فحص فقط ويعلمك بالقطعة الخربانه وبعدها تخلي الورش العاديه تغير القطعه والله يعينك عليهم اكتشفت بعضهم يربي دقن لكسب الثقة هههههه

يربي دقن ويتعلم كيف يرسم تعابير صادقه بوجهه قسم بالله أنهم متخصصين في هالامور

حتى عندي نفس النوع السياره ونفس الموديل
وتحصيل نفس المشكله ايه الحل