الحذر يا إخوان - قصتي مع شركة تأمين وتعقيب لموضوعي السابق
22
2
إضغط هنا للإخفاء
السلام عليكم ورحمة الله وبركاته
اسعد الله اوقاتكم جميعا
تعقيبا لموضوعي السابق عن احتيال شركات التأمين
وعن موضوعي والحدث الخاص فيني
بالمختصر قصتي
* انا لقيت سيارة في جدة وكلمت قريب لي هناك شافها وفحصها وتوكلنا على الله وراح يسوي مكاتبة وبعدها يشحنها للرياض
* طبعا قلت خلني أروح من الحين اسوي لها تأمين عشان يربط وما أغث خلق الله في جدة وينتظرون يربط والخ ....
* رحت لمكتب خدمات ( امام مرور الروضه ) ولقيت واحد وقلت له ابي أسوي تامين ( مع العلم ما طريت له ان السيارة بجدة أبدا )
* طبعا بسبب جهلنا موضوع التأمين وانك عادي تدخل موقع ( تأميني ) وتشوف افضل وارخص تأمين وتدفع لهم اما فيزا او غيره )
* الرجال سوا لي التأمين عن طريق شركة ( سوليدرتي ) والله يصلحه بدال ما يكتب عنواني راح كتب عنوان وهمي في جدة ( وللمعلومية هذي السالفة مع اكثر مكاتب الخدمات يحط لك عنوان وهمي وتبحل به عاد بعدين بقولكم ليش )
* طلعت من عنده وربط التامين وسوو مكاتبة ثاني يوم واستلمت سيارتي وصلى الله وبارك
------------------
* بعد فترة قدر الله وعملت حادث وكان الخطا علي 100% وعوضوا الطرف المتضرر 33 الف ريال
* بعد 4 أشهر من الحادث ( الخميس الماضي ) جتني رسالة مفادها (عزيزي العميل يوجد مطالبة مالية ضدك برقم كذا . وفي حال لم يتم سدادها سيتم رفع أوراقك إلى سمة بعد 5 أيام عمل
* تم الاتصال على شركة سوليدرتي وافادوني بتسديد 33 ألف ريال والا سيتم رفع اوراقي لسمه
* السبب أفادوني ( إخفاء حقائق جوهرية ) ولما استفسرت قالوا انت مسجل عنوانك في جدة وانت حسب عنوانك الوطني انت بالرياض !!!
* قلت لهم وش المشكلة قالوا لازم يكون نفس عنوانك الوطني ,,الغريب إنهم ورطوا حالهم وقالوا ترى شركات التامين والمواقع التامينية من قريب ربطوا العنوان الوطني مع أي رقم بطاقة احوال .. طيب انا سويت التامين قبل ربط العنوان الوطني أصلا
* قالوا والله هذا اللي عندنا والله لا يهينك ( تنق 33 ألف ريال ) قلت معصي
* كلمت شخص في مؤسسة النقد قسم التامين وقال لي ارفع شكوى من نفس الشركة وخلال 5 ايام ما حلوا المشكلة قدم شكوى علينا وراح نشششششخلهم لك
* رفعت شكوى عندهم وخلال ساعتين فقط كلمتني بنت وقالت ليش ما كتبت عنوانك الرياض !! قلت لهم وش تفرق قالت لي اسعار جدة غير اسعار الرياض والمدن الثانية ههههههه وهذا المكتوب من شروط الوثيقة ,, وش هالقانون المريض هذا !!!
* المهم قلت لها ( انا مسوي تأمين في مكاتب جدة والمكاتبة بجدة والمرور لو اطلع برنت يبين ان السيارة بجدة ) انصدمت البنت قالت لي جيب لي ما يثبت ان المبايعة بجدة او مرورها بجدة وارفعها للإدارة
* كلمت قريب لي يعرف شخص في مؤسسة النقد يقول لي معصي يوقفون خدماتك وقوانينهم غلط وغير صحيحة .. وماله دخل العنوان في كل المواضيع
-------------------
انا الحين بدبر ورقة المبايعة وبشوف وش بيسوون ووش نهايتهم
الخلاصة /
نصيحة نصيحة يا إخوان
اي شخص مأمن عند المكاتب هذي يروح يدخل على الشركة اللي مسوي عليها تامين ويتاكد من عنوانه ويغيره للعنوان الصحيح
لأن والله بديت أشك ان شركات التامين متعاونة مع بعض المحلات انهم يحطون عناوين وهمية عشان يطالبونهم بعدين في اي حادث او بدونه
نصيحة اخوكم ويشهد الله كتبت هالموضوع عشان افيدكم بعد ووتوخون الحذر
اخوكم أبو سلطان
إبلاغ
الردود
4
0
اهم شي جيب العميل ويحاولوا باي طريقة يتحصلوا منك على فلوس
او يلغوا العقد اذا جاتهم مضره
2
0
2
1
هم يبون يستغلون اي فرصة عشان يطالبونك ب 33 الف
يعنى انا اشوف الواحد يأمنوعند مكتب رسمي تابع للشركة افضل حتى وان فرق ٢٠٠ ريال
4
0
وبالنسبة لموضوع ان مؤسسة النقد تشخلهم شخل لا تصدق الكلام هذا انا كنت موظف في المؤسسة وعارف الموضوع وكيف يتم التواصل مع البنوك وشركات التأمين
عموماً الله يعوض عليك وهذا درس ومستقبلاً خلك شغلك كله سليم وسيدا عشان ما اكد يقدر يفتح فمه بكلمه وحده
2
2
لصوص لا بارك الله فيهم
لا تهمل الموضوع وتابع فيه وخلك أنت المشتكي حتى ما يقدروا يتلاعبوا معك
2
0
الصراحه قضيه جدا سخيفه للاسف ...ادفع ٣٣ الف عشان ماكتبت عنوان صحيح وش هالغباء .....
2
0
4
0
لكن الكلام للأكثرية اللي مسوي تامين عند مكاتب الخدمات
خله يراجع اسم شركة التامين ويشوف عنوانه لا يتورط ورطتي ويكفي المرمطة بس
0
0
1
0
1
0
1
0
0
0
0
0
اسقطوا المطالبه او دفعت؟
1
0
سويت مكاتبة لشراء السيارة في معرض وايضا التأمين من نفس
المعرض الان بعد حادث قبل سنة ونصف الان يطالبوني بالدفع
بسبب العنوان واخفاء معلومات جوهرية قلت انا مالي ذنب ولا
كان وقتها اصلا عندي عنوان وطني والشخص الي سواء التأمين
عارف اني في الرياض .... قدمت شكوئ لمؤسسة النقد وقالوا
لي كلامهم صحيح عاد اللحين مدري هل صدق لهم صلاحية
انهم يوقفون خدماتي ولا لا
0
0
واحتيال من جنسيات عربية .... اللحين الي عثرت عليهم من
هالمشكلة من نفس هالشركة هم ثلاث انا وانت وواحد في اليوتيوب
ياليت ننشر في القروبات تحذير من هالشركة والتعامل معها
0
0
ولا دفعت لهم ريال وبعدها قدمت بشكوى رسمية في مؤسسة النقد
0
0
وكان الله بعونك
قبل 5 سنه و 5 شهر