تجاربكم مع الرافعة الكهربائية 0 العفريته 0

انا شفت لها فيديو على اليوتيوب يمدحون بها موجودة في ساكو اعتقد و فيه العفريتة اللي نفس حقة البناشر تجي في شنطة و انت تجمعها

هذولي اريح من عفريتة السيارة نفسها في ثواني قليلة السيارة تنرفع و اريح.   للأمانة ما جربت اي منهم بس واضحة و باينة من الية عملها

حياك
مثل ماقال لك بدر 
العفريته يدويه هدروليك تجي بشنطة ممتازة وعمليه ولاتتعب
بعدين خذ معك رقع تيوبلس وماطور هواء للضروف الطارئة
وباالتوفيق

انا مشتري لي عفريته هدروليك صغيره حقه دنه لها معي حول 5 سنوات عمليه جدا طبعا تشيل اي سياره لى انها حقه دنه يعني تتحمل اوزان ثقيله يجي معها يد حديد ترفع فيها ولاتحتاج تجميع مثل العفريته الي يسمونها التمساح زي حقه البنشر تختلف عنها ولاتاحذ مكان فى السياره تحطها تحت المرتبه ولا مع عده السياره ولاتتعب وقت الرفع فقط تضغط وترتفع ماتحتاج جهد ثواني والسياره مرتفعه  اشتريتها من الرياض فى البطحا من شارع الريل اتوقع سعرها حدود 100 ريال صناعتها ياباني تجي فى شركه ايسوزو 

ماله داعي خساير عفريته كهربائيه بالسعر الفلاني اردى نوع سعرها ب200 ريال وماتستخدمها الى يمكن خلال سنتين مره او مرتين بالكثير هذا الكفر بنشر وتقطع مالك الى تصلحه بنفسك اما اذا انت حتى والكفر بنشر تنسيم بس تقوم تفك الكفر وتركب الاستبنه هذا شي ثاني
احسن لك اشتر منفاخ هواء الاطارات اذا الكفر مبنشر انفخه بالهواء خله يوصلك اقرب بنشري يركبلك الاستبنه ب5 ريال اذا كان موقع الاستبنه سهل واذا صعب ياخذ 10 ريال
وفك نفسك من الفك والربط

الانواع الكهربائية الموجودة فالسوق كلها مو مضمونة لكن خذ العفريتة التمساح مثل اللي عند البناشر اريح من اللي تجي مع السيارة وطريقة رفعها سهل 

اذا صملت على اي نوع ابعد عن الصيني لأنه ممكن ينكسر عليك بأي لحظة

الرافعة البرتقالية مثل الصورة بالموضوع انا مجربها على الجمس نوعها صيني
لكن ممتازة وترفع بالراحة  وفيها منفاخ هواء للكفرات ويجي معها مفك للصواميل ممتاز 
صراحه مريحه جداً
استخدمتها 3 مرات مرتين تجربه ومره بنشر والحمدلله مابها شي 
وكل الموجود بالسوق صيني وحتى لو اعطاك عليه ضمان سنة ممكن تمر السنة وانت مااستخدمتها 

وفي ملاحظة نسيت اذكرها الرافعه البرتقالية تتحمل حتى 3 طن ولاتصلح للسيارات الصغيرة 
مع البنشر تنزل السيارة وبعد كذا ماتحصل مجال تدخلها تحت السيارة 

السلام عليكم
اخوي من تجربه شخصيه

استخدمة النوع الاول اللي لونها فضي للاسف انكسرة وطاحت حملت عليها كيا اوبتيما وانكسرت وغيرتها على الضمان وجربت
البديله لرفع التسريحه بغرفة النوم وايضا انكسرت وطاحت والحمدلله الله سلم

استخدمت الثانيه البرتقاليه لرفع اوبتيما واكسبديشن وجيمس ممتازه وما عليها ملاحظات
واشتريت لعدة اشخاص مافي احد اشتكى منها وسعرها من 380 ريال الى 450 ريال
اذا قررت تشتري استخير الله وعليك بالبرتقاليه ترفع الى 3 طن


وفي نوع يرفع الى 10 طن اعتقد لونه احمر

وطبعا كلها يجي معها منفاخ ودريل فك صواميل الكفرات

والمطوره يجي معها جهاز شحن البطاريه واعتقد سعرها حول ال 700 ريال