الصامل يتصل؟؟

مع الأسف موقع حراج حاليا أصبع مرتع للشريطية والمعارض واللي يبيعون السيارة بغش واضح
بعضهم يبي سيارته مثلا ب 80 ألف ( وهذا فوق سعر السوق بمراحل )
وتجي الناس تسومها ب 55 او 60 ألف
يروح يتصل على اخوياه ممن عندهم حساب حراج .. ويجي ويقوله أسومه ب 75 الف
او يجي واحد يسوم وخويه يقوله ( بع يا رجال سومة طيبة )
وبنفس الوقت ياخي فيه ناس ما ترضى على نفسها الخسارة وترضى على غيرها
يعني مو منطق تشوف سعر السوق لسيارتك من 50-70 الف ريال
تروح تطير بالحد 100 الف !!

بالعربي موقع حراج احسن حل تحط اعلانك وتقفل الردود واللي فعلا وده بالسيارة بيكلمك .. واهم شي تخاف الله ولا تحط سومة وهمية وتستغل بعض الناس وتقول افرق السوم وخذه

هذا ربي ما راح يباركلك في حلالك

والرسول عليه الصلاة والسلام قال: (رحم الله عبداً سمحاً إذا باع، سمحاً إذا اشترى، سمحاً إذا اقتضى)

وازيد على كلام الاحترافي

اغلب من يزيدون بالسوم عضوياتهم جديدة طازه

والاغلب ولاحط في ذمتي معه اكثر من عضويه ويدخل يزيد ويخرب ع الباقين

الواحـد اذا عرض له سلعه اتمنى يحدها بالمبلغ الفلاني ويقفل الردود
واللي عارف السياره انها طيبة وسعرها حلو يتواصل ويشتري

لكن البعض يعرضها بس علشان يشوف كم بتجيب ويهون بالبيع

الحمدلله بعت 18 سيارة عن طريق الموقع والشريطية مليانين ما ننكر واللي يخربون الموضوع مليانيين والحاسدين موجودين وبعضهم يعرض السيارة للسوم فقط ولا يبغى يبيع او اذا احد حشره يكتب تم البيع ويطلع

فيه غرض عرضتها بحراج ولا جاب الحد اللي بغيته
طلعت برا وبعته باعلى من حدي بحراج
اللي عنده سيارة ينزلها المعارض كل جمعه مره وثنتين وثلاث الين يلقى رزقه
لكن يخاف الله في بيعته ولا يغش حتى يبارك الله له
ولا يعتمد على موقع حراج فقط

المشكله فى الاعضا نفسهم نادر تحصل صامل يعني مثلا عارض جوال للبيع يجيك واحد يسومه 300 واذا قلت له بعتك يبدا يتعذر اناخارج الرياض ولا ابقابلك الوقت الفلاني ولعاد يرد ياخي ابي اعرف حاجه مالك فيها ليه تسوم ترا والله كلما احد سواها فيني اني ادعي عليه ضيع الرباين الصاملين وضيع وقتي وبعض الاحيان تكون محتاج لمبلغ ويجي يخرب ويمشي مدري ايش المقصد 
اتمنا من اداره الموقع تشوف لنا حل 
وفيه نوعيه من الناس الى مثلا يكون السوم 50 ريال يجي يسوم 30 تقول له السوم يزود ماينقص يقلك انااسوم بخراجي ياخي اناماحديت السلعه حقتي عشان تسوم بخراجك هذا يسما بخس والله عيب الي قاعد يصير ولى الي يجيك يسوم بقل ويقلك اناصامل طيب الي قبلك مو صامل يعني ؟؟؟ 
الزبده الموقع صار اكثر الي فيه مبزره اول تعرض لك حاجه تشوف رجال صاملين مو مثل الحين قطع ارزاق وتسوي اعلان تتعب عليه واخر شي يجيك واحد يكتب بعد اذن صاحب الاعلان ويعلن فى اعلانك !!!  

خذها قاعده اذا اعجبتك سياره
مثال افلون 2015 نظيفه وعارضها صاحبها ب 88
كلمه اتصال وخلك جاد بالشراء مو استهبال
واتساب وحط سعر يناسبك وقله احفظ سعري
مثلا عطيته 75
بعد فتره ان ماحصل زبون بسعره صدقني بيجي يكلمك ..

انا حصلت معي نفس السالفه ونزلت من سعرها تقريبا 10 الف وهوا رجع كلمني

عرضت سيارة قبل فترة واغلب الاتصالات هروج وسواليف ويعلمك قصة حياته واحد منهم قعد يسولف من بعد صلاة المغرب الى اذان العشاء

حياك
كلو كوم واللي مدرعم كوم صاحب السيارة مبين كل شي باالااعلان
فحص استمارة بدي محركات ومبين ان قيرها اوتو الخ
تجيك اساله كم ماشي كم باقي استمارة والبعض يستهبل
وش لون السيارة وهي قدامه الصورة لونه ابيض
الوكاد قفل الردود واللي صامل يكلم

والله الوضع صار مو طبيعي

عارض جوال ب 200 حوالي 10 اشخاص كلموني ونحدد موعد بس اكتشفت ان ماعندهم سالفه المشكله يسال اسئلة كثيره وتقول شكله صامل وبعضهم عطاني فوق حدي وبرضه كله مضيعه وقت