أضف سؤال أو موضوع جديد          

دعسة الفرامل ماتستجيب من اول لمسة ؟ هنا الحل

up 12 down 3
0abo_waleed0 128
قبل 3 شهر و 4 أسبوع




بسم الله الرحمن الرحيم ،،


السلام عليكم ورحمة الله وبركاته



صباح/مساء الخير يااخوان ، كثير من الناس يشتكي من الفرامل وان الدعسة نصها فاضي وبعدها يبدا يمسك وانا منهم

سقت كامري 2017 وكالة فراملها من اول ماتلمس الفرامل تمسك ماشاء الله تبارك الله ،

طبعًا كل السيارات كذا اول ماتطلع من الوكالة بس بعدين تصير حول نص الدعسة فاضية ،

بعد البحث والتدقيق تبين ان السبب هو زيت الفرامل ، بعد سؤال اكثر من بنشري افادوني ان زيت الفرامل مايتغير

اذا نقص تزيده فقط ، لكن بعد البحث تبين انه يتغير كل سنتين كحد اقصى حتى لو السيارة واقفة ماتتحرك لأنه يمتص الرطوبة ويفقد خواصه

زيت الفرامل يجي 3 انواع ، DOT 3 وهذا لأغلب السيارات ،، DOT 4 وهذا لبعض السيارات الرياضية ، DOT 5 وهذا للشاحنات ،

يجي مكتوب على غطا علبة زيت الفرامل نوعية الزيت اللي تحطه للسيارة ،

سيارتي من عام 2009 من طلعت من المصنع ماتغير لها الزيت ابدًا وغيرته قبل كم يوم وفرقت معي بشكل كبير جدًا ،

مريت بترومين قالوا مانغيره رح للصناعية ، رحت للصناعية قال لي بـ50 ريال وانت تجيب الزيت ، بس يغير اللي بالعلبة فوق

وقلت له لو تغيره كامل كم تاخذ ؟ قال 120 ، سحبت عليه طبعًا ورحت لمحل قطع غيار

واخذت زيت فرامل wagner امريكي الصنع سعر العلبة 8 ريال واحتجت 3 علب وحدود النص


ومريت محل سباكة واخذت لي لَي برادات المتر بريال نفس حق البرادات شفاف


وطفيت السيارة وسميت بالله ، الادوات اللي تحتاجها :

عفريته

مفك كفرات

مفتاح مقاس 10 او 8 حسب سيارتك

لَي برادات نفس اللي فوق نص متر او اقل

علبة فاضية لتفريغ الزيت القديم

4 علب زيت فرامل بالنسبة للكامري ، تختلف الكمية من سيارة لأخرى


طريقة التغيير مشروحة بالمقطع ذا واغلب السيارات نفس النظام



https://www.youtube.com/watch?v=-mZwz1FcyXE


لكن بدل ماتخليها تنسم وتنتظر ، خلها تنسم وادعس فرامل دعسة كاملة وشل رجلك


وعب العلبة عشان مايدخل هواء وارجع عطها دعسة وشل وعب العلبة وكرر العملية لين تشوف الزيت اللي ينزل من اللَي صار صافي

بعدها تنتقل للجهة الثانية وهكذا ، بالنسبة لي اخذت ساعة وربع لأني شغال لحالي ولأن عفريتتي حقت الوكالة ،

اللي بيسويها انصحه يروح لبنشري ويخليه يرفع السيارة ويفك الكفرات وهو يغير الزيت ومااعتقد ياخذ اكثر من 20 ،

الفرامل حاليًا من اول لمسة تبدا تمسك مع ان الفحمات عندي لها فوق السنة الا ان اداء الفرامل اختلف 180 درجة ماشاء الله ،


زيت الفرامل لونه زي الموية بس مايل للاخضر شي بسييييط وغير ملحوظ ، لكن الزيت القديم من الوكالة طلع اسود معدوم مره وهذا هو بالصورة

والسلام عليكم ورحمة الله وبركاته







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


من أكثر المعلومات الخاطئة الشائعة، ان زيت الفرامل و الدريكسون مايتغير. رغم اكثر السيارات صار دريكسونها كهربائي. 


up 2 down 0
dell2012 869
قبل 3 شهر و 4 أسبوع



يعطيك العافية على المواضيع المتميزة

وفائدة كبيرة يجهلها البعض


up 2 down 0
الاحترافي 1310
قبل 3 شهر و 4 أسبوع



صحيح كلامك ومكتوب عندي في كتالوج السيارة زيت الفرامل
يتغير كل سنتين بدون تحديد كيلو
يعطيك العافية على التجربة المفيدة واتمنى تزيد التجارب في المنتدى اكثر واكثر


up 2 down 0
سبحان الله 7787 226
قبل 3 شهر و 3 أسبوع



تغيير زيت الفرامل سهل وةنصح كل واحد يدخل على اليوتيوب ويتعلم بس اهم شي ما يدخل من علبة الزيت عشان كذا انتبه الزيت ينقص اكثر من النص اثناء التغيير .


up 1 down 0
ahmad akk 558
قبل 3 شهر و 3 أسبوع



اناكان عندي مشكله فى سيارتي مولعه لمبه ABS وكلما رحت ورشه يقولي الجهاز عطلان لازم تغيره مريت ورشه سئلني قالي مته مغير زيت الفرامل استغربت سواله قلت ماقد غيرته قال جب زيت فرامل نجرب نغير الزيت اذا ضبط حلو واذا ماضبط انت كذا غيرت الزيت ماراح تخسر شي المهم غيرت الزيت وسوالي حذف الكود من الكمبيوتر والحمدلله رجع يشتغل نضام ABS 


up 1 down 0
fhody44 521
قبل 3 شهر و 3 أسبوع



بطل ما شاء الله عليك
الله يعطيك العافية ، راح يستفيد الجميع من موضوعك إن شاء الله

بس سؤال كم موديل سيارتك ؟


up 1 down 0
khalil99ss 162
قبل 3 شهر و 3 أسبوع



dell2012
فعلًا لاحظت الاغلبية مايدرون انه يتغير لا بنشريين ولا ميكانيكيين الصناعية

الاحترافي
الله يعافيك

سبحان الله 7787
الله يعافيك وبإذن الله مستمرين

ahmad akk
فعلًا كلامك صحيح

fhody44
لمبة الـABS بعض الاحيان تعني شيك على زيت الفرامل ، زيها زي لمبة زيت المكينة

khalil99ss
موديلها 2009


up 0 down 0
0abo_waleed0 128
قبل 3 شهر و 3 أسبوع



الله يجزاك خير ، معلومة مفيدة وجديدة بالنسبة لي 
انا ماشي على الزيت 5 سنوات و500 الف كيلو تخيل!! من الصباح اروح اغيرة '''


up 0 down 0
abdulhakeemayash 6
قبل 3 شهر و 3 أسبوع