أضف سؤال أو موضوع جديد          

تجاربي مع الزيوت.. وفائدة مهمة

up 23 down 0
ابو هيثم 7 2253
قبل 2 سنه و 3 شهر



السلام عليكم ورحمه الله

الموضوع يبدأ علطول أول ماشريت السياره جديده أصفار قبل 5 سنوات مثلي مثل باقي الناس خايف على الموتر بزياده وأبد الزيت اللي تستخدمه الوكاله لاتتعداه وكنت أظن إنهم أفهم مني وكلامهم يجب إنك تتبعه بحذافيره كأنه فرض عين عليك

بعد مامشيت 5 الاف رحت للوكاله وكنا بالشتاء مثل الوقت ذا وغيرولي زيت شل هيلكس 10w30 العلبه الصفراء واكتشفت بعدها إن الموتر طاح عزمه وزاد صوته وصرفيته !!!  مشيت عليه لين 10 الاف ودخلته الوكاله مرة أخرى وعلمتهم إن زيتهم ماينفع قالو خلاص بنعطيك زيت 10 الاف ولاتجي إلا على صيانه 20 ألف قلت اوك؟

الزيت كان شل هيلكس 10w40 العلبه الزرقاء وتناقشت مع مدير الصيانه إن هالزيت ثقيييل ولاينفع قالي ماعليك حنا نستخدمه على جميع السيارات وماسبب مشاكل وأنت أصلا ع الضمان أي مشكله تعال لنا ... طلعت الموتر ماحسيت بأي فرق عن الزيت السابق ؟ من بكرا حاولت أشغل السيارة عيت تشتغل !!!!!!!

بعد ماحاولت أشغلها للمرة الثالثه اشتغلت وطلع صوت طقطقه مخيف والمكينه قلبت صوت حراااثه (( أذكركم الموتر جديد بقراطيسه مامشى غير 10 الاف ))  هنا فتحت الكتلوج والصدمه لايوجد أي لزوجه تنتهي ب 40 نهائيا !!! الصدمه الثانيه الكتلوج يطلب تصنيف SM ف أعلى مثل SN لكن هالزيت تصنيفه قديم جدا وهو SL الصدمه الثالثه الكتلوج طالبين زيت تخليقي او نصف تخليقي بينما هالزيت ذا معدني مكرر !!!

دخلت المنتدى هنا لقيت الناس تمدح زيت بترومين A1 بدرجه لزوجه 5w30 رحت علطول للبنشري وغيرته (( مع إن الزيت السابق ماكمل 100 كيلو بالمكينه )) المفاجأة رجع عزم السيارة من جديد ورجع صوتها الهادئ وقلت صرفيه البنزين بشكل ملاحظ هنا أدركت إني على صح وإني أفهم من ذولاك الزلايب. 

استمريت على هالزيت لين ممشى 90 الف وجت مشكله شهيرة فيه عام 2015 وشالو منه اعتماد ديكسوس ومن بعدها انحشت عنه ورحت لبديله اللي هو فوكس تيتان سوبر سن ونفس الطريقه اشتري بالكرتون من محلات الجمله ثم اشتري فلاتر من قطع الغيار وأروح سيدا للبنشري واعطيه 15 ريال شغل يده

مع الوقت نشرت تجربتي بقروب الازيرا اللي عندي ولقيت ناس مصحصحين وفاهمين ومن ضمنهم واحد اضافني في قروب كادينزا وصرنا نعين ونعاون ومعنا كم واحد لين صار القروب كله يستخدمون زيت 5w30 وتركو خرابيط البناشر والوكالات

وكنا ننصح بزيت فوكس تيتان سوبر سن 5w30 وبرضه عليه اعتماد ديكسوس لكن جت مشكله بذا الزيت وصار يرتفع صوت المكينه بعد ممشى 6 الاف هنا اضطريت انا واللي معي نشوف لنا زيت جديد ووقتها كان ممشى موتري 165 الف

اللي معاي دقو الحديد وهو حامي وضربو القمه من أوسع الأبواب وراحو لأفضل زيت في العالم زيت أمزويل الأمريكي أول شركه أنتجت زيوت تخليقيه بالتاريخ وهي اللي تملك الحقوق والميزة الوحيدة الزيت مايتغير مهما طال الزمن

انا عن نفسي واثنين معي رحنا لناحيه الزيوت الأوربية والأمريكية الغير مشهورة وأتوقع محد سمع بإسمها نهائي وأفادنا فيها الرخص تخيل كرتون  12 علبه ب 170 الى 200 ريال وتخليقي بالكامل وتصنيف SN  واحسب تكاليف الشحن والجمرك مع ذاك أرخص من زيوت ربعنا بحوالي 100 ريال يعني المفترض العكس !!!!

_________________________________________________

الفائدة المهمة هنا الزيوت المصنعة بالدول المتقدمة (( تصنيع كاااامل وتجميع وتعبئة )) تكون خاضعة لشروط ومواصفات معينة وزيوتهم اليوم وبكرا وبعد 100 سنه ماتتغير الا للأفضل وتتطور عكس زيوتنا

للأسف الشديد الزيوت المعبأة عندنا تجيك مواصفات خرافية وبعضها أعلى من الزيوت الأوروبية (( لكن على الورق بس )) زي تصنيف ديكسوس غير موجود بالزيوت اللي آخذها أنا لكن جرب ذا وجرب ذاك وشف الفرق بنفسك

باختصار وبدون لف ودوران الزيوت المعبأة بالشرق الاوسط مالها خاتمه اليوم ممتازه وبعدها اسوأ من السيئه وسبق وأكلتها بثلاث زيوت ذكرتهم فوق ولاني مستعد أجرب واحد جديد
وأكون صادق معكم حاليا مستحيل مستححححيل ارجع للزيوت العربية لأني مستفيد مرتين الأولى أرخص الثانيه أجود وأضمن يعني وش تبي بعد ؟

يمكن أنا أتكلم من واقع تجربه بالسيارات الكوريه خصوصا السوناتا والالنترا تلقاك حاط لها زيت 5w30 ومع ذاك تسمع صوت تكتكه أو طقطقه تجي للسبب تلقاه يستخدم واحد من زيوت ربعنا المعروفة

أنا عارف بيجيني واحد يقول انا استخدم زيوت الربع من 10 سنوات ولاشفت إلا كل خير !!! الله يتمي على سيارتك يالغالي وعقبال 20 سنه ولكن انا ذكرت سيارات معينه ممكن موترك من شركه ثانيه الله يستر علينا وعليك وبرضه علشان أكون منصف ممكن تلقى واحد يستخدمها على السيارات المذكورة ولاشاف شي (( السالفه مع الزيوت حظ وتوافيق لكن أتمنى يكون حظكم مع زيوت الربع أحسن من حظي ))

هذي أسماء الزيوت البديلة :

1/ زيت برافا الامريكي هذا رابط وكيله المباشر  http://aledileya.com.sa/تواصل-معنا/

2/ زيت سبيد ميت (( هو الزيت اللي استخدمه حاليا وأحسن مافيه انه مناسب محركات الديزل والبنزين )) صناعه كورية للعلم وكيله المجدوعي وأشوفه الأفضل من وجهة نظري للي ساكنين بالمنطقه الشرقية

3/ زيت كيكس صناعه كورية برضه وعليه اعتماد ديكسوس

4/ زيت ليكوي مولي صناعة ألمانية

5/ زيت ايني صناعه ايطاليه

6/ زيت فيدول الكندي وكيله خالد سعيد الهاجري وهو نفسه وكيل كفرات ماكسس

7/ زيت يورول الهولندي ووكيله الهاجري برضه

8/ زيت موتر كرافت (( أقصد النوع التخليقي منه )) ومعروف انه أمريكي

9/ زيت أمزويل صناعه أمريكية وكيله شركة الخيار الاسمى

10/ زيت أرديكا البلجيكي وكيله محلات المركبات المتقدمة

ارجع واذكركم جميع هالزيوت متوسط سعرها 200 ريال للكرتون وتحت ماعدا الزيوت الثلاث الاخيرة .. وطبعا تمشيك 10 الاف لانها تخليقية بالكامل .. وللاسف الموقع فيه مشكله ماقدرت أضيف جميع الصور لكن برجع وأحاول لاحقا .. في أمان الله










إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


يعطيك العافية ياغالي



بالنسبة لزيت ايني انا سمعت ان بعضه صار يصنع محلي


up 0 down 0
azzamj 4
قبل 2 سنه و 3 شهر



ايني صار محلي مو مثل اول ايطالي مو كل مستورد ممتاز
امزويل رقم واحد مافيه احد ينافسه بالزيوت للمعلومية لكي مولي مبالغين في سعره مرة المجموعة الثالثة مولجين 60ريال سلامات بينما امزويل السقنتشر المجموعة الرابعة خليط الخامسة
PAO


up 0 down 0
patrol2013
قبل أسبوع و 6 يوم