ماهوا العمر الإفتراضي لمكاين السيارات ؟

حسب اللي اعرفهم اكثر ممشى ممكن تمشيها السيارة قبل لاتخبط في بحر ال ٦٠٠ الف
اتكلم عن سيارات اعرف اصحابها وليس خبر في النت انه السيارة الفلانية مشت كذا وكذا

على اي اساس حكمت فيه كامري بوشت وباقي تمشي لكن راعيها 
غير المكينه وهي ماشيه 800 الف ! وموتري ماشي 550 الف ولا فيه الا نقص زيت تقريبا علبه الا علبه ونص كل 4000 كيلو

مشكورين ع الردود

العمر الافتراضي للمحرك يعتمد على مستخدم السياره
هل يسوي صيانه مثل ماكتب في كتاب دليل المالك؟
هل يستخدم الزيت الصحيح للمحرك؟
هل استعماله طبيعي للسياره مثلا (مشاويير داخليه او سفرات)

لأن البعض تحصله مهتم بالصيانه الصحيحه لكن استخدامه للسيارة بشكل خاطئ مثلا (سرعات جنونية او مقاومات)
او تحصل سواقته طبيعيه ولكنه غير منتظم بالصيانه مثلا يمشي على الزيت 20 الف او يستخدم زيت خاطئ بالاساس

ايضا فيه اسباب ثانية للتخبيط منها ارتفاع الحراره ولها اسباب كثيره منها بسبب الاهمال بالصيانه الدوريه مثلا تشييك ماء الرديتر او عدم تغيير بلف الحرارة او اسباب ثانيه مثل خراب المراوح. وعدم المبالاه باصلاحها حتى تخبط المكينه

كلام كبير مشكور

عندي كامري 2002 مشت مليون 200 الف وحاليا تنقص علبة كل 3000 كيلو مع العلم اني مواضب على غيار الزيت بشكل دقيق كل 4000 المهم السيارة تحت رجل واحدة .... واكبر ضرر على السيارة هو الاهمال في الزيت وقطع الغيار لابد ان تكون اصلية

اعرف شايب من الجماعة الله يذكره بالخير معه كريسيدا 85 تقريبا...يقول مشت ثلاثة مليون الا شوي ولا توضبت او تغيرت المكينة والقير نفس الشي لا توضب ولا تغير والسر حسب ما قال يغير الزيت كل الف كيلو وما يركب الا قطع من الوكالة!!
طبعا انا مثلكم ما صدقت هههههههههههه لكن الرجال ثقة وصاحب دين ويكلمني عن موتره الشخصي..

الموضوع صعب تحديده بالضبط

المكائن تختلف فالقديم يختلف عن الجديد والمصنّع يختلف

ظروف القيادة تختلف فالمنطقة الجنوبية مرتفعات وطلوع وجدة رطوبة وزحمة والرياض جو جاف وهكذا

السواق يختلف - في ناس رجلها حارّة وتدعس وفي ناس سواقتها رايقة وفي ناس تستخدم داخل المدينة وفي ناس مشيها أغلبه خطوط

كان عندي كورولا 2001 مشت 550 ألف وراحت تالف والمكينة ما تنقص زيت

السيارات القديمه تتعدى بحر 900 الف وماخبطت واتكلم عن واقع تجربة
سيارة كرسيدا موديل 91 قراندي مع ولد خالي الى الان
وونيت هايلكس 84 كانت مع واحد من الجماعه بعد 24 سنه سوا لها توضيب

المحافظ على سيارته من زيوت وحنية ويهتم فيها تدوم معه عشرات السنين
والبعض تو مطلع سيارته مالها شهر وتلقى مكينتها عاطبه

كرسيدا مشت 3 مليون ؟ حلوهه السالفه شكله ماطلع من ديرته اصلا بسيارته وقطع الوكاله كانت سر ؟ فاجئنا مادرينا

ع العموم اشوف ناس كثير سياراتهم تعدت ال 300 الف والمكاين كانها جديدة م شاء الله صار فيه ثقافة لدى البعض والزيوت تطورت والحين قليل اللي يستخدم 20w50 ماتنفع للالمنيوم والطرمبات الجديدة سواء كوري او ياباني

اما الامريكي ماشفت للحين احد وصل 300 الف من اللي اعرفهم وماصارت له مشآكل للامانه ماغير واحد وهي اكسبدشن قيمته فيه

العمر الافتراضي للسيارات مليون كم والدليل انه عداد السيارة مبرمج من وكالتها يوصل مليون كم , سافرت الى تركيا قبل 4 سنوات ولقيت التكاسي حقت المطار صاكين ال600 الف في عدادتهم ووالله كلمة وردة قليلة في حق بعض التكاسي اللي شفتها هناك , ليش معظم السيارات عندنا تبداء المشاكل على 200 الف وفي منهم من تخبط مكاينته قبل , هذا عتمد على الانتظام في تغيير الزيوت واستخدام الزيوت المناسبة وطريقة قيادتك للسيارة ودرجة الحرارة في الجو والعج واهتمامك بتغيير سوايل السيارة في الوقت وحتى بعض القطع البسيطة ممكن تسبب مشاكل في المحرك ك بلف الحرارة وغطا الرديتر والخراطيش والليات وبعدين في قطع بجوار المحرك لها عمر افتراضي ايضا مثل المرواح والردييتر ومويته كل هذولي لازم تغيرهم في اوقات معينة تجديدا للمحرك وحتى لا يصير في عندك انسدادات تسبب ارتفاع الحرارة ومن ثم تلف المكينة لا قدر الله

حرارة الجو والعج تلعب دور كبير في ارهاق المحركات للاسف الشديد ولو حنا زي امريكا او اوروبا في الاجواء لكان افضل للمحركات بكثير بالاضافة الى انو معظم عمالة صيانة السيارات الا من رحم ربي يا ما جاهل وطالع من محو الأمية وجاي يتعلم في سيارتك ويا ما حرامي ونصاب واستغلالي وهذا ياثر على السيارات وصيانتها حتى لو بشكل غير مباشر

تعتمد على عدة عوامل
اولا الاستخدام . لابد يكون معقول ومتزن مايكون شخص دائما داعس ورافع ضغط المكينة ولا يكون دايم مهدي ودعسه خفيفة لان هذي تأثر مع الوقت على عمر المكينة.
الامر الثاني استخدام نوعية الزيت المناسب وتغييره بانتظام مع السيفون
وكذلك يعتمد على نوعية السيارة
مثلا السيارات القديمة من عشر سنين وفوق كانت جودة تصنيعها افضل بكثير من الان واللي يحافظ عالسيارة بتعمر معه . لكن الان اغلب السيارات الجديدة مكاين المنيوم وتيربو وقيور cvt وكلها كهرب والكترونيات فهي مصممة انها تخدم فترة معينة وبعدها تضطر انك تتخلص منها .
مثلا الامريكي الجموس والشفر السوبربان والفكتوريا اذا محافظ عليها تمشي فوق ٥٠٠ الف بالراحة بمكينة الوكالة . شفت سيارات كثير عند الزملاء والاقارب وكان عندنا سوبربان شفر ماشي فوق ٥٠٠ الف.
كذلك النيسان يعيش خصوصا السيارات القديمة موديل ٢٠٠٠ وتحت قبل اتحاد نيسان مع رينو الفرنسية كانت جودة نيسان واعتماديتها اكثر بكثير من وضعها الان وبذاك الوقت اشوف انها افضل من تويوتا بالاعتمادية وقوة المكاين
والدليل شف ونيتات وجيوب النيسان موديلات التسعينات وتحت مليانة بالشوارع وكثير منها معديه النص مليون ممشى

وكذلك التويوتا واللكسز معروفة بالاعتمادية وجودة المكاين
شفت مقطع بامريكا وكيل لتويوتا جايبين رجال معه تندرا غمارة ٢٠٠٧ ماشي حول المليون كيلو على ظني.. عمله انه يشيل قطع غيار لمعدات شركات النفط من ولاية لولاية فكان عمله خطوط يوميا وهو محمل السيارة ولكن محافظ عالصيانة ولازالت بقير ومكينة الوكالة
كذلك اللكسز بامريكا تعتبر سيارة عملية وحقت كرف اكثر من كونها فخمة كون مكاينها قوية وتعيش اكثر خصوصا طراز الes القديم

عفوا تعديل
هذا رابط المقطع حق التندرا
ماشي مليون ميل
يعني 1,600,000 كيلو

عاد وكيل تويوتا الي بامريكا خذو منه السيارة وقالو بيفككونها ويشوفون كيف حالة السيارة من جوا عشان تفيدهم بتطوير المكينة مستقبلا على كلامهم

https://youtu.be/TL7fyyUNRmA

تتعلق بطبيعة الاستخدام والصيانة الدورية وقطع الغيار وعدد المستخدمين
ومناخ البلد التي تمشي فيها

مشكورين ع المشاركات ابداع يعطيكم العافيه معلومات قيمه

أضيف على ما ذكر الاخوان ، أن مكائن شركات السيارات تختلف من شركة إلى أخرى ، أقول لك مكائن السيارات اليابانية أطول عمراً
من مكائن السيارات الكورية .

كلام صحيح مشاركه مباركه