احذر من هذي الكلمه هات عربونك..

46 3

لايمكنك التصويت حتى الحصول على 20 نقطة على الأقل
إضغط هنا للإخفاء

لحـن المفارق 533
قبل 5 سنه و 8 شهر

السلام عليكم ورحمة الله وبركاته
الله يمسيكم بالخير..
صارت لي قصه مع شريطي نصاب.. واكتشفت انه انسان
يعيش على عرابين خلق الله....
السالفه بدأت يوم ابحث لاخوي الصغير عن يارس موديل 2015
يروح للجامعه ويخدم نفسه والبيت
دورت في المعارض لقيت اسعارها تتراوح من 18 الى ال 25 والنظيف يزود شوي
والتعبانه تنقص شوي
المهم لقيت لي يارس موديل 2015 مع رجال جعص واخلاقه زفت اكرمكم الله ..واكتشفت انه انسان طفران مايبغا يبيع
ولكن يوقف سيارته في الساحه ويعرضها بسعر مغري عشان الشاري يرمي العربون اللي يطلبه وبعدين يخوبره في منكح أليم
نظريا اعجبتني اليارس وبويتها ممتازه وشكلها ممتاز
سلمت عليه قلت يالغالي كم سيمت قال ب 16 والصامل مابأقصر معه
قلت وش فيها قال جتها صدمه على الرفرف الخلفي..وسويت الرفرف في وكالة عبداللطيف جميل والصدامات مرشوشه فقط
قلت شي ثاني قال ابد مافيه الا اللي قلت لك
شاورت اخوي الصغير ..واعجبته السياره... قلت خلاص توكلنا على الله وكاسرته بسهوله واعطاني ب 15
قلت مشينا للفحص ..قال عربونك.. قلت عربوني كلمتي..مشينا للفحص ..قال ماني طالع من المعارض بدون عربون
قلت شرط مافيها غير اللي ذكرت قال شرط وارد لك العربون ولو تبغا قيمة الفحص معه.. قلت السياره لك قل نعم لي لكن ولدي يستخدمها الفترة الاخيره
قلت طيب واعطيه 500 قال وش ذي قلت هذا العربون طبعا بعد ماركبت السياره وشغلت وهو معي واخوي ورا
قال ماتكفي.. ماهي حق طلعتي من المعارض..قلت يارجال انت ليش حاط براسك ماني مشتري السياره ..بشتريها ان شاء الله اذا كان فيها مثل ماقلت
قال لا ماتكفي ..واطلع له خمس ميه ثانيه وقلت تري والله اذا كان فيها شي غير اللي تقوله ..انك لترجعها وتدفع حق الفحص..قال خير .. رحت للفحص وانا مغبون منه
وادفع قيمة الفحص .. وشوفواوالبلاوي اللي طلعت
1_السياره مرشوشه دار مادار ماعدا التنده
2_ البابين اليمين معجون
3_صدمه اماميه واصله لين الرديتر
3_ معجون على القير ..والقير متغير
4_لحام في الشاصي
قلت يالغالي الله يستر عليك ويرزقك هات العربون وادفع الفحص ..قال عربونك ماهو راجع لك ولاني دافع الفحص ..انا علمتك فيها صدمه قلت له والبيبان واللحام في اللي في الشاص.قال علمتك وجاك العلم
واسحب مفتاح السياره واخليها داخل مركز الفحص
قلت والله ماتشوف سيارتك.. يالحرامي الا لين تجي الشرطة
والرجال صوته عالي ويصيح والناس تجمعوا ..ويقولون اذكروا الله
قلت والله مايشد المفتاح وانا وياه على الشرطة
الرجال مشكلجي وباين عليه وسخ وقذر وعايش على عرابين خلق الله ..
جوني العمال حقين الفحص قالوا اقل شي طلع السياره وتفاهم انت وياه برا..قلت مافيه خلوها لين تجي الشرطه
الرجال قعد يهدد ويصايح ويضحك ضحكة الواثق قلت خلك الشرطه تربيك والبلد فيها قانون ..الرجال الصدق يوم سمع بطاري الشرطه لاحظت انه يرتبك..
دق على واحد وجاء يوم جاء خويه قال وش العلم وعلمته..قال خلاص ابشر بالعوض عربونك بيرجع لك ..قلت والفحص قال الفحص عليك .قلت والله ليدفع الفحص قبل العربون ..
راح له خويه ويتكلم معه قال والله ماادفع ولا ريال.. يبي العربون ياخذه..قلت والله العظيم لأوصلها محاكم وقيمة الفحص ان تدفعها اضعاف مضاعفه ..وانا رجال ماوراي شغل متفرغ للمحاكم واتعاب القضيه اقسم بالله لتدفعها اضعاف مضاعفه
قال اعلى مافي خيلك اركبه...
شوي اخذ عربوني ورماه بالارض قال خذه قلت له تجيبه وانت ملعون ..خويه اخذه من الارض وعطاني اياه وقال تكفى خلاص اقصر الشر..قلت هات قيمة الفحص طلع من جيبه 300 واعطاني ..قلت ابشر بالسعد سم المفتاح ... الشريطي النصاب قعد يهاوش خويه النصاب ليش تعطيه هذا ملعون والدين وقاعد يسب ..وانا الحين اضحك ضحكة الواثق المنتصر
انا ادري ان كلهم ربع ويفزعون لبعض .والرجال كبير ماحشم نفسه ولا حشم عمره..
ونويت لو راحت المحكمه اني احلفه انه قالي سواها بعبداللطيف جميل والاشياء الثانيه اللي قالها..
هو انصدم من ردة فعلي وماتوقع ان صوتي بيرتفع والناس بتتجمع .يحسب اني باخليه ياخذ العربون واقعد ادعي عليه... الحمدلله ذاك اليوم بدل مايكسب من عرابين الناس خسر 300 ريال قيمة الفحص..
نسال الله يكفي المسلمين شرورهم
الزبدة مالكم بالطويله رجعت على رجولي والله مشوار هههههههه.
تكفون انتبهوا من حرامية العرابين تراهم يدرون ان الناس يخلونها يقولون الف ولا اتخوبر بسياره 50 الف...
هذولي يطلعون في اليوم مبالغ مهوله من العرابين لعنة الله عليهم..والمشكله مافيه قانون يجرمهم وطايحين بالعالم الساكته ..تكفون لاتعطون احد العربون ..انا يوم عطيته واثق اني بارجعه وانا انسان تخوبرت بسياره ورجعت حقي يوم القاضي وقف خدمات المعرض وانا مااطفش من المحاكم عادي ..الاغلبيه مايحبون المحاكم والتعب
اتمنى اني توفقت في فضح هذولا المجرمين وفقكم الله وعذرا على الاطاله

إبلاغ

الردود