ابي اشتري سيارة من الشارقة الامارات

وعليكم السلام ورحمة الله وبركاته .. بنسخ لك رد من ردود العضو/ ابو فرح
والله يسهل امورنا وياك .

المدة تقريبي من يومين الي 3 أيام واذا بتشحن ممكن تخلصها في يوم واحد لان راعي السطحة يكفيك اجراءات الحدود وياخذ عليك مبلغ تتفقون عليه .
ورقة المقاصة تطلعها من ادارة الجمرك للمدينة اللي السيارة سجلت فيها مثلا سيارتك دخلت من دبي تروح جمارك دبي عند شارع الكويت الصباح تاخذ رقم وتنتظر دورك وتعطيهم المعاملة ويسلمونها لك خلال ساعة او اكثر لكن لازم تعرف هل سيارتك لها ورقة مقاصة او لا ؟ السيارات اللي لم يمضي على وجودها في الامارات اكثر من سنتين تقدر تطلع لها ورقة مقاصة مثلا السيارة دخلت الامارات في 1-1-2017 معناها تقدر تطلع لها ورقة
اذا بتشتري من فرد روح فحص المرور عندهم فحص شامل يشيكون البودي والشاص وكل شي واذا نجح الموتر تسجله عندهم ياخذون عليك حوالي 350 درهم .

نقطه مهمة / لاتشتري وارد امريكي الا ومعاه شهادة clean title
لاتشتري الا وانت فاحص الموتر بدقة ويفضل تتأكد من ممشى السيارة عن طريق الوكالة بالاتصال او تروح لهم
لاتاخذ معك كاش بالعكس خذ شيك مصدق بأسمك من البنك اللي فيه فلوسك اذا عجبك شي تروح البنك المراسل في دبي وتصرفه ولاتحمل نفسك مسئولية حمل اموال معك
ضروري يكون معك شخص ثاني
ضروري تنتبه للبائع وكم له يملك السيارة - اذا من زمان فهذه علامة طيبة -
ضروري تساوم - اغلب الناس هناك محتاجة الكاش عادي اخصم عشرة الاف من سعره وبيوافق -
ضروري تعرف كم تسوى السيارة عندنا وهل يسوا الفرق لاتنسى تحسب - السفر - فرق العملة - الاجراءات - جمرك 5% - قيمة مضافة 5% - مصاريف متنوعة .

انا اسف لك وللجميع لعلي نسخت اشياء ممكن تشتتك ، لكن اكيد بيمر هنا هو ويضيف بعض النقاط المهمه .

Alsamer3600 ماقصرت يا الغالي كفيت ووفيت واذا باقي استفسار آخر انا بالخدمة

الله يجزاكم خير ، ابي استفسر عن موضوع الشيك كيف طريقة دفع قيمة السيارة هناك ، انا حسابي وفلوسي في بنك الانماء 

المعذرة والله يابو فرح جيت بعطيك لايك ورفض قلت بجرب ديسلايك عشان يشتغل اللايك وللأسف رفض :(

نظام التقييمات في المنتدى غريب ومحزن .

ارجو اللي عنده أي معلومة أو نصيحة يعطينا والله يعطيكم العافيه ، وبالنسبه للشيك كيف اصرفه هناك عشان المبلغ اذا لقيت موتر اعجبني ؟ 

هلا محمد هذا اقتباس من ابو فرح ..

" لاتاخذ معك كاش بالعكس خذ شيك مصدق بأسمك من البنك اللي فيه فلوسك اذا عجبك شي تروح البنك المراسل في دبي وتصرفه ولاتحمل نفسك مسئولية حمل اموال معك"

اما بالنسبة لنا فأحنا مانعرف القيمة التقريبية للسيارة اللي تبيها عشان كذا ما نقدر نحدد ققيمة الشيك المصدق اللي
بتاخذه من الانماء وتصرفه هناك بناءً على قيمة السيارة .. وان شاء الله يجيك مين يفيدك اكثر لاني في الحقيقة
مالي تجارب في هذا الموضوع .

الله يجزاك خير يالسامر ، وش هو البنك المراسل ؟ وين اصرف الشيك هناك ؟

ما ادري والله اخوي محمد ، بإمكانك سؤال احد فروع بنك الانماء عن البنوك المراسلة في دبي وهم يفيدونك .

كل بنك في العالم له بنك مراسل في دولة ثانية فانت حسابك في الانماء اذا جيت تصدر الشيك المصرفي بيعلمونك اسم البنك اللي يتعاملون معه هناك وتحصل اسمه مكتوب على نفس الشيك . ترى الإجراءات اللازمة كثيرة وطويلة والاسعار ماعاد تشجع مثل اول بحكم المصاريف والأمر لك

عطني جوالك على الخاص واكلمك اذا تبي اي خدمة انا حاضر

تمشى وغير جو ومالك ومال وجع الراس يا كثر السيارات الى عندنا بالسعودية واسعار مقبوله
فكرت مثلك قبل سنتين وجلست مع واحد عاش في ابو ظبي واقنعني اصرف النظر لان الغش هناك كثير
ولو انغشيت تكون غبنه كبيره لان الاجراءات طويلة عندهم اما لو بالسعودية تاخذ حقك من عيونهم لانها ببلدك وتعرف
الى لك والى عليك

السلام عليكم يا شباب لاهنتم اللي شاف كلامي ذا يطيني لايك لاهنتم بكتب موضوع خاص بستفسر فيه عن شي يقلي لازم يكون عندي 40 لايك لاهنتم تكفون لايك عشان اكتب موضوعي وشكراا لكم انا جديد عالموقع صراحه .