نقاط حول الطلعات البرية القريبة -1-

10 1

لايمكنك التصويت حتى الحصول على 20 نقطة على الأقل
إضغط هنا للإخفاء

جبال معانيق 277
قبل 5 سنه

يطلع الناس في العصريات ونهاية الاسبوع وأيام الأمطار أو الاجواء الباردة للأماكن البرية القريبة مثل مدينة الرياض الثمامة او نفود الزويليات او نفود نساح او نفود المزاحمية وايضا في جدة ومكة يطلعون لبحرة او خط مكة جدة السريع.للتمشية والاستمتاع بالبر والاجواء الزينة وكثير من الشباب له هواية التطعيس وايضا بعضهم للكشتات وتغيير الجو ويكون  معهم عوائل وأطفال وكبار سن فحبيت أذكر بعض النقاط للتذكير والفائدة
١-  السواقة بهدوء عشان الواحد طالع بيستانس  ويتمشى وتحافظ على سلامتك انت ومن معك وسلامة الاخرين .
٢-حاول قد ماتقدر ماتضايق الاخرين مثل الي يغبر على الجالسين  ماتبي احد يتأذى أو يدعي عليك يعني يمديك تبعد شوي وخذ راحتك اذا مصر على ذلك والافضل تراقب اتجاه الهواء عشان ماتغبر على الناس وهذي سهلة ومفيدة .
٣- اللي مركب اصوات مزعجة مثل الكنداسة المشقوقة او دبة او ماادري اسمها هدرز او غيرها ماعرفها لكن صوتها تسمعه من بعد كيلو ويقطع بالدواسة لان فيه أطفال وعوائل وكبار سن وبعضهم يخاف او يتأذى فحاول قد ماتقدر تجنبهم وتداري احوالهم  وبعدها اذا ابعدت  انت وماتبي .
٤- اللي يطلع للنفود بعائلة ينتبه لايجي تحت طعس او خلفه مباشرة لان اللي يطعسون مايشوفونه وينتبه للصغار لايروحون بعيد تحت النفود عشان السيارات مسرعة وتنزل فجأة  والافضل الواحد اذا مضطر يحط السيارة أعلى الطعس عشان تنشاف من بعيد وعادي لو جلس تحت النفود وبالليل لابد من الانوار او يكون قريب من السيارة وخاصة الاطفال والي يطعس لازم يتنبه من النزلات المفاجأة والطلعات لان احيانا قدامك اطفال او احد خلف نزلة مباشرة.
٥-  اللي يطعس ينتبه للطلعات والنزلات بالنفود ويضرببوري خاصة وقت الامطار والزحمة لان كل يطعس وبكل اتجاه وهذا للاماكن الي تنحجب فيها الرؤية ولا الاماكن الوسيعة ماهنا خلاف . 
٦- اللي يغرزون او يسحبون المغرزين  يستخدمون الادوات المناسبة والآمنة والجيدة  مثل حبال السحب المرنة ويتخذون اجراءات السلامة والمظطر مثلا لاستخدام الواير الحديد ينتبه لانه بعض انواعه خطيرة  فيبتعد اي شخص عنها وقت السحب وينتبه منها لانها احيانا تنقطع وتنطلق زي الطلقة وممكن تسبب اصابات شديدة  ويوجد طرق للتعامل معها وموجودة بالنت واليوتيوب  .
وإن شاء الله فيه نقاط ومعلومات وبعض التفاصيل لأدوات وأغراض بحاول اذكرها لاحقا وأغلبها معروفة وغيري أعرف وأخبر ولكن للتذكير والفائدة. وسلامتكم .

إبلاغ

الردود