أضف سؤال أو موضوع جديد          

تجربتي مع الأزيرا 5 سنوات.. وكلمه حق يجب أن تقال

up 22 down 8
ابو هيثم 7 2249
قبل 4 شهر و أسبوع



السلام عليكم ورحمه الله وبركاته .. 

اليوم بكتب لكم خلاصه تجربتي في الازيرا لخمس سنوات وممشى 230 الف كيلو متر وبحاول اذكر جميع السلبيات والايجابيات والقطع الاستهلاكيه وشبه الاستهلاكية اللي غيرتها طوال هالمدة مع الاسعار طبعا الموتر موديله 2014 :

1/ الراحة.. تستاهل 8 من 10 افضل مايميزها مقاعدها مريحه ولينه ولاتتعبك بخطوط السفر

2/ العزل : الثانية بفئتها بعد التوريس عيبها الوحيد العزل الجانبي ( عزل الدرايش والابواب) وهذي مشكله السيدان عموما اما عزل الارضي ( صوت احتكاك الكفرات بالاسفلت ) فهو ممتاز الى حد ما وعزل السقف البانورامي متوسط الى ممتاز برضه لاتسمع اصوات ولاتنسيم في السرعات المعقولة تحت 170

3/ الرحابه الداخليه والوسع : ماشاء الله تبارك الرحمن هي والامبالا افضل موترين بذي الفئة حتى انها اكبر داخلية من شقيقتها الكادينزا وتلاحظ هالميزة بالمساحة خلف المراتب الامامية

4/ جودة الديكورات : هنا وقفه احترام للصانع الكوري ولله الحمد والمنه اشوفها الافضل بفئتها لاعمري سمعت اصوات ديكورات ولا اشتكيت منها باسثناء مرتبه الراكب كانت تهتز على سرعه 120 اذا كان المقعد فاضي وحلها سهل كانت الصواميل مرتخيه شديتها واختفت ( للعلم زملائي معهم سيارات منافسه افالون وتوريس وامبالا وكلهم يشتكون من قربعه الديكورات خصوصا الاخيرة )

5/ العزم : تعتبر الاضعف في فئة 6 سلندر لان اللي معي مكينه 3.0 لكن طلع بعدها مكاين 3.3 GDI وبرضه الجديدة 3.5= 290 حصان

وبالنسبه للعزم الموتر فيه حقه يعني اذا دعست يستجيب وعزمه يبتل ماسك وشاد معك ( عطه يعطيك) عكس 4 سلندر يفقع كبدك بكثرة تبديل التعشيقات وعزمه يطيح مع اللفات والمنعطفات هذا غير صوت حنه المكينه .. عندي الحين ضغط RPM يكون على 2000 دورة بالدقيقه على سرعه 115 تقريبا ويوصل 2.5 على سرعه 145 ولايوصل 3 الاف الا على سرعه 170 والموتر 6 تعشيقات كما هو معروف

بالنسبة للقطع يابلاااااش اسعار القطع الاصليه بلا مبالغه بنفس سعر قطع الكورلا الاصلي واقل سعر من الكامري الدرجه الثانيه .. عندك فلتر الهواء اصلي ب 40 وفلتر المكيف ب 60 وفلتر الزيت ( السيفون) ب 25 وسير المكينه ب 80 والبواجي 6 حبات ب 180 وصفايه البنزين ب 50 وشريحه الدركسون ب 120 وزيت القير 4 علب ب 180

القطع الشبه استهلاكيه يعني اغيرها مرة وحده كل 5 سنوات كانت جلد عمود التوازن الامامي سعر الطقم 50 وعددها 2 وتركيبها بنفس السعر ،  مسمار التوازن الامامي سعر الواحد 65 ريال وتركيب الاثنين ب 40 ريال اسهل من تغيير الفحمات

الكفرات الخلفيه غيرت مسمار التوازن الخلفي سعر الواحد 55 وكان فيه نص عمر والتركيب للاثنين ب 40 والثاني الذراع الخلفي القصير كان يطلع صوت مع المطبات اشبه بصوت نقنقه الضفادع سعر الاثنين 150 وتركيبها ب 40 برضه

(( للتذكير جميع القطع اصلي والا الكوري تحصله بنص السعر تقريبا واثنينهم نفس الجودة الفرق ان الاصلي يجيك من الشركة الأم بكرتون هونداي الازرق او كيا الاحمر ومكتوب عليه Genuine parts اما الكوري يجيك بشعار الشركات المصنعة المعروفة للقطع مثل اتش سي سي وداون وهانون وموبيس وبرضه وافضل مافي الازيرا لايوجد قطع تجاري مقلد باستثناء الفحمات والفلاتر والسبب لان قطعها الاصلي والكوري رخيييص وفي متناول الجميع فما يستاهل يتقلد بنظرهم لان مافيه مكسب ))

....................................................................

بالنسبة للتبريد .. احب اوجه لك سؤال عزيزي القارئ عن وضعك مع مكيفات السبيلت بالبيت ؟ هل تكتفي بضبط الريموت على درجه 23 & 24 ؟ او انك من النوع اللي يزر المكيف على 16... اذا انت من النوع الثاني انحشش من مكيف الكوري ومن مكيفات الكمبروسر الكهربائي عموما

المكيف عندي والحمد لله على شد البلد ( واعرف ناس كملو 7 سنوات معه وبعضهم غيره من السنه الاولى ) نعم احياننا يفصل ويرفع الضغط لكن هذا نظام الكمبروسر الكهربائي مبرمج على كذا اذا وقفت يخف التبريد علشان يقلل استهلاك البنزين وهذا مناسب لدولهم وليس عندنا .. عندهم متوسط درجه الحراره 30 وبذا الدرجه عندنا عادي تفتح الدرايش بدون مكيف اساسا والبنزين رغم انه ارتفع سعره عندنا لكن يظل اقل من اسعارهم بكثيرررر

الزبده (( وبدون لف ودوران )) الكمبروسر الكهربائي ماينفع لاجوائنا وانا شخصيا مااقتنعت فيه واقولها بالفم المليان لو خرب كمبروسر موتري بروح ارهم كمبروسر كلتش وللعلم الفورد يشتكون والامريكي يشتكون والتويوتا يشتكون يعني واضح ان العله بنظام الكمبروسر نفسه ماله شغل لا كوري ولاياباني ولاهندي ( والدليل رح لموقع حراج واكتب كلمه *كمبروسر* وشوف اول 10 اعلانات مافيها عن الكوري الا اعلان واحد .. تبي تعرف باقي الاعلانات التسعه عن اي شركه بإمكانك تروح تشيك ) كل سيارات الدفع الامامي للاسف صارت تجي بنظام كمبروسر كهربائي عدا المازدا والاكورد وبعض سيارات النيسان

آخر حاجه بالنسبه للمستخدمين .. الصراحه ماقد شفت مستخدم يسبها (( لاحظ مستخدم للسيارة فقط )) الا نوع واحد وهو اللي كانت الازيرا اول موتر له بحياته وداج هاج ما يعرف شي بالخرابات .. غالبا يكونون صغار بالعمر او طلاب ومن في حكمهم وهنا لاتلومهم >>> ترى الازيرا للامانه تبي واحد يفهم بالمشاكل الميكانيكيه والكهربائيه ولو فهم بسيط مايتجاوز 25٪

انا عن نفسي سيارتي السابقة كورلا واول مااخذت الازيرا ماكنت افهم ولا 10٪ لكن قريت الكتلوج وطبقت معلوماته (( حرفيا )) على موتري وافتكيت من خرابيط البناشر والوكالات .. حاليا بلا مبالغه مااقول اني افهم كل شي لكن اقدر اقول اي خراب بموتري احدده بنسبه 90٪ بدون مااروح لسباكين الصناعية والعالم السفلي

الموقع فيه حوسة احياننا يضيف صور واحياننا لا.. اتوقع المشكله بحجم الصورة لكن بضيف روابط لين تنحل المشكلة

رابط الفاتورة والاسعار مع الأرقام التسلسلية : https://i.postimg.cc/mgwpts59/IMG.jpg

الفاتورة الثانية : https://i.postimg.cc/P5mh7BcF/IMG-20190309-110758.jpg

الصورة بالاسفل اليمين كمبروسر كلتش موديل 2009 واليسار حساس حق 2012 وفوق ( يحتاج تعديل بماصورة الحار + كتاوت لانه يشتغل على 12 فولت وحق المصنع 6 فولت ) >>> وهو نفس الكمبروسر اللي على باقي سيارات هونداي وكيا فئة السوناتا وفوق .. وشكرا لكم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


الكوري من عام ٢٠١٢ وهو يشتكي من التكييف
معقولة ٧ سنوات مو قادرين يحلون الموضوع

كل سنة يقولون حدثنا وما حدثنا وكلها خرطي

انا اتوقع بسبب ان اغلب السيارات الكورية
تجي مروحة وحدة كبيرة

عكس الياباني مروحة للمحرك
ومروحة للمكيف

فمع حرارة الجو
يقل. التبريد
و يبدأ يقل جودة الكومبرسر لين يضرب


up 0 down 0
غريب آلرؤؤؤح
قبل 2 شهر و 2 أسبوع



السلام عليكم ابو هيثم تواصل معي خاص لضروره


up 0 down 0
nnn9999
قبل 2 شهر و 2 أسبوع