ابي سيارة عائلية

عليكم السلام وصباح الورد

والله يا عزيزي بقولك وجهة نظري وانت حر في مالك وفي وجهة نظرك

اذا وصلت 100 الف لا والله خذ وكالة أريح لك .. واتمنى بقدر امكانك انك تبعد عن الكوري لأن برأيي لا يستحق 100 ألف

المازدا خيار ممتاز جدا .. ولو اخذت قرض 100 ألف تقدر تاخذ يوكن او تاهو جديد أصفار إل تي ( نص فل مطور )

لكن 100 ألف وما تضغط حالك أفضل من انك تاخذ قرض وتضغط نفسك

خلك بالمضمون ... 100 ألف مبلغ ممتاز يحصل لك مازدا وكالة .. أو أنك تزوده شوي وتاخذ تاهو نص فل نظيف جدا ممشاه دون 20 ألف ..

وابتعد قدر الإمكان عن التأجير منتهي بالتملك لأنهم بيمصون دمك

ولو كنت املك 100 ألف صراحة ببتعد عن الوكالة لأنه بتكلفك الضريبة .. خذ مستعمل ماشي دون 10 آلاف كنك ماخذه وكالة .. بعض الشعب فسقان يشتري موتر ومما يعجب المدام او واحد من عياله ويبيعه

والله يسخر لك الشروه الطيبة واستخير قبل كل شي وانا اخوك

واعتذر عن الاطالة

بما ان عدد العائلة ماهو كثير الله يحفظهم لك رايي تحط الراف فور الجديد ف الحسبان وخذه كاش او مستعمل يكون ممشاه 5 الاف تلاقيه ارخص بشوية من الزيرو والتأمين لو في مقدرة تأمن شامل اول سنة افضل والسيارة الثانية جيب المازدا cx5 نفس حجم الراف فور تقريبا،،،  
ودمتم

الافضل قرض وليس تاجير تمليك وتاخذ كاش 

ومن وجهة نظري دامكم ٤ انفار فقط 
خذ المازدا cx5 اخف لك واجمل شكلاً واوفر بنزين 
وقيمتها ٨٥ الف بالوكاله الستاندر والفل حول ١٠٠ 
خذها جديد وبتخدمك ١٠ سنين بالراحه ان شاء الله 

بالتوفيق

ولا ازيد على كلام الاخوان اللي ردوا شي

المازدا خيار ممتاز

طلع القرض ب100 الف واشتري الاستاندر85 الف
ولاتنسى تامين وعندك القيمة المضافة بتكلف حول 5000 الاف
والباقي اطلع تمشى فيها انت وصغارك والحافظ الله

ليه تطلع قرض ب 100 الف

طلع قرض ب 50والف كافي خذلك برادو 2012

يعيش معاك 5 سنين وبيعه بعدين ب 30 الف

الجديد ما في مثله بس اذا منت راعي خط دايم
و لك خبرة بالمستعمل هو اوفر لك من قرض تسدد الفين خمس سنوات

المازدا ممتاز بس دفع امامي اللي بميه
الراف فور ٢٠١٨ بالمعارض دفع رباعي من اقل فئة و سعره معقول
اما ٢٠١٩ غالي و بدون مثبت و نفس قير نيسان اكستريل اللي ارخص منه
اما الكوري ما تغير لا قير و لا مكينه و لا جربته لكن معروف تكييفه اللي متعود على الياباني مهو عاجبه

القرض السيارة باسمك ممكن تبيعها اذا احتجت
الاقساط دور من يقبل يكمل اذا ما بغيت السيارة و غثى شروطهم
ممكن القسط اقل بس في دفعه اخيرة اذا ما في دفعة اولى
بنوك الراجحي و البلاد و الاهلي اذا راتبك ينزل عند واحد منهم
و التامين الشامل ينفع بس الله لا يحدك عليه
و انت فكر زين باحتياجاتك و مصاريفك قبل ما تلتزم بقرض او تأجير

لو أنا مكانك يا اخذ هوندا بايلوت أو CRV أو تويوتا RAV4 أو ميتسوبيشي اوتلاندر

طبعاً الأولوية للسلامة ثم الراحة ثم الجودة ثم وسائل الترفيه
الهوندا بايلوت اريح جيب SUV ركبته والوسائد الهوائية فيه تتوفر كاملة (6 ايرباقات) من موديل 2009 بشكل قياسي

الهوندا بايلوت الفل كامل تورنق أعلى فئة تتوفر فيه الأولويات ال4 لكن عيبه السعر عالي 190 الف ريال جديد
وأقل فئة EX سعره 150 الف ولاتتوفر فيه شاشة ترفيهية للأطفال في الخلف
ووكيل هوندا مسوي عرض رمضاني على البايلوت والاوديسي تدفع نص القيمة والنص الثاني بعد سنتين
ينتهي العرض بعد يومين بتاريخ 30 يونيو شوف الرابط هذا لصفحة العروض من موقع الشركة :

https://www.honda-mideast.com/ar-sa/offer-promo

نجي للCRV ميزته انه من اكثر سيارات الجيب الكروس اوفر مبيعاً في العالم عموماً وفي أمريكا خصوصاً
واكثر توفير بنزين من البايلوت لأنه 4 سلندر
لكن عيوبه انه مافيه ايرباقات كاملة إلا على الفئة العليا (التورنق) وسعره بالفئة هذي حوالي 130 الف ريال
والCRV الشكل الجديد ماركبته لكن ركبت الشكل السابق أقل راحة من البايلوت وفيه قساوة شوي
لكن شفت الشكل الجديد بمعرض الوكالة كراسيه الين من الجيل السابق

وسيارات هوندا عموماً الأفضل بفئتها من ناحية الوسع والرحابة الداخلية

نجي على التويوتا راف فور نفس عيب الهوندا CRV مافيه ايرباقات كاملة إلا على أعلى فئة وسعرها 130 الف ريال
وثباته على الطريق سيء شوف المقطع هذا عطوه POOR يعني سيء في الرساوة والثبات على المنعطفات الحادة

https://www.youtube.com/watch?v=j3qrCNR4U9A&t=25s

نجي على الاوتلاندر فيه منه 4 سلندر وفيه 6 سلندر يبدأ سعره من 77 الف ريال
وماانصح بال4 سلندر عزمه ضعيف لأن حجم الجيب ووزنه اكبر من مكينته اللي هي فقط 167 حصان
وعزم 222 نيوتن متر فقط ، ال6 سلندر 230 حصان وعزم 292 نيوتن متر
وقير ال4 سلندر CVT وقير ال6 سلندر اوتوماتيك ب6 تعشيقات

وفيه عيب ثاني وهو عدم توفر الايرباقات الكاملة بشكل قياسي إلا بشكل اختياري
يعني حدد الفئة اللي تبيها ثم اشرط على وكيلها يوفرها لك بإيرباقات كاملة
يعني إذا مااشترطت هذا الشرط ممكن تاخذ الفل كامل ال6 سلندر وهي مافيها إلا ايرباقين فقط
وممكن يختلف السعر بينهم شي بسيط وسعر ال6 سلندر حول ال100 الف ريال

إذا تبي نصيحتي النهائية لك دور لك هوندا بايلوت تورنق 2016 أو 2017 ممشاه قليل مايتعدى ال40 الف كم
وسعره حول ال100 الف وافحصه بالوكالة لكن نسيت اذكر انه بعض قطعه أغلى من الCRV لأنه 6 سلندر
لكن سيارة لك وللزمن تبيه للبرالخفيف قوة وعزم مايحتاج تبيه خطوط تبيه استخدام يومي مايقصر
وقطعه ركبها وانساها

واترك عنك اللي يبالغ في سعره مثل واحد هنا عارض تورنق 2016 ماشي 18 الف ومسيوم 120 الف ويبي زود
كان معروض هنا في الموقع تورنق ماشي 33 الف وطالب 120 الف وانباع يعني المفروض خارج المعرض
سعره مايزيد عن 100 الف إذا بنفس الممشى أو قريب منه

هذا اللي كان معروض ب120 الف ريال :

https://haraj.com.sa/1144645182/

أو تاخذ ميتسوبيشي اوتلاندر جديد وتريح راسك
والخيار النهائي لك جرب كل السيارات اللي في بالك سواء في معارض الوكالة أو استأجرها
وخذ كتالوج المواصفات من معرض الوكالة أو حمله من موقع الشركة وركز بكل التفاصيل
يمكن التفاصيل الصغيرة تفرق معك قبل ماتندم على اختيارك

وبالنسبة لسيارات مازدا ماانصحك فيها صح أنه أغلب طرازاتها مصنوعة في اليابان لكن جودتها موب مثل الهوندا
والتويوتا والميتسوبيشي عموماً دام إنك تبي سيارة تريحك من غثا الصناعية والعيوب المصنعية الكثيرة
وتعيش معك 5 سنوات على الأقل بدون مشاكل

شوف المقطع هذا لمهندس أمريكي وخبرة 50 سنة وفعل ترجمة قوقل إذا كنت ضعيف بالإنجليزي :

https://www.youtube.com/watch?v=FTxZWYouCMc

وشوف هالموضوع بنفس المنتدى هذا لعيب خطير في المازدا CX9 :

https://mazda.montada.haraj.com.sa/83189/

ومبروك مقدماً والله يعطيك خيرها ويكفيك شرها

نسيت اذكر انك تشيل الكوري من بالك لأنه مكيفه موب مثل الياباني وانت عندك عايلة
لو كنت لحالك ممكن تتحمل مكيف الكوري