أضف سؤال أو موضوع جديد          

نصيحة بخصوص التأجير المنتهي بالتمليك

up 4 down 3
تركي818 134
قبل سنه و 10 شهر



أولاً حاب أوضح بعض النقاط مهمة حول التأجير المنتهي بالتمليك للي يجهلها وما يعرفها

١. لسيارة ليست ملك لك ، وانما أنت مستأجر فقط مثلها مثل السيارة اللي تستاجرها من مكتب التاجير لكن الفرق انك تتملكها بعد انتهاء فترة التأجير
 
٢.  في حال إنك ما عاد تبغى السيارة لا تعتقد إنك تسلمها وتمشي، لا ، راح يحسبون عليك رسوم للارجاع ويحسبون عليك الكيلوات الزايدة عن المسموح لك سنوياً (غالباً ٢٠ الف سنوياً) وحتى لو فكرت تقبلها راح تخسر

٣. في حالة حدوث حادث لا سمح الله التعويض يروح للبنك او الشركة المالكة للسيارة وانت راح تدفع رسوم تحمل لو جا عليك نسبة خطأ وفيه بعض البنوك تدفعك تحمل على اي حادث سواء انت مخطي او مخطى عليه

٤. في حال تأخرك عن الاقساط راح تدخل في داومة سحب السيارة ودفع المتاخرات وفي حالات يجبرونك تدفع قسط او قسطين مقدم

٥. ربح البنك او الشركة مع التأمين قد تصل الى ٥٠ وحتى ٦٠ ٪؜ خلال خمس سنوات يعني السيارة اللي ب١٠٠ الف بتطلع عليك ب١٦٠ ألف 


لذلك نصيحتي ان الواحد يسحبها صح ويشوف هل يقدر يستمر في دفع الاقساط والا، اشوف كثير من الشباب الصغار اللي توهم متوظفين برواتب بسيطة على طول يطلع سيارة فوق طاقته بقسط عالي ويقعد شهرين او ثلاثة ويكتشف ان راتبه كله راح في القسط 


والبعض يشوف عرض بدون دفعة اولى ويتحمس ويوقع العقد وياخذ السيارة ولا يدري كم الفائدة اللي بيدفعها ولا الدفعة الاخير وهي المصيبة لسببين : الاول ان مبلغها كبير وقصة ظهر والثاني قد تكون قيمة السيارة وقتها اقل من قيمة الدفعة وتصير خسران

يعني مثلا شريت سوناتا وفيه دفعة اخيرة ٢٠ الف بتتفاجأ بعد ٥ سنوات اذا خلصت الاقساط وحلت الدفعة الاخيرة ان السيارة ما تسوى ٢٠ ألف وبتضطر تدفعها وانت كذا خسران



فالمقصد يا اخوان ان الواحد يحسبها صح ويشوف ظروفه ويحسب حساب ان ظروفه خلال ٥ سنوات راح تتغير اما بزواج او بمولود وراح تزيد المصاريف ويتوهق الواحد بعمره







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


الحمد لله راتبي فوق ال 10 آلاف وسيارتي النترا 2015 ، قمت بشرائها كاش عبر دخولي في جمعية عائلية ، ولم ولن أغيرها حتى تكون فيها مشاكل كبيرة ، لن يضحك علي الوكلاء بإعلاناتهم ، ولن يضحك علي الشباب بتعليقاتهم ، ولله الحمد ملكت أرض وتزوجت ولدي بيت صغير جدا ، وبدأت في عمل مخطط لبناء بيت العمر
والسيارة حتى لو تعطلت أو حصل حادث لا قدر الله لا مشكلة لدي أشتري مستعملة ونظيفة بحدود 25000 أو جديدة بحدود 55000 ولا أرتبط بعقد لسنوات طويلة في سيارة ليست ملكي

السيارة يجب أن نفهم أنها ليست رفاهية وليست شيء تتفاخر به أمام أصدقائك فلست أنت من صنعها ولن تطير بك فلا تضيع عمرك وأنت مديون لشركات تضحك عليك من أجل حديدة


up 10 down 0
anosi 1428
قبل سنه و 10 شهر



دايم انصح بعد التجربة الي ذقتها وخرو عن الاقصاد خذلك قرض صغير ودورلك سيارة اقل من موديل السنه بسنتين ثلاث اخت الجديدة ولا تربط نفسك باقصاد وتاجير واغلب البنود ضدك 
الكلام ذا مايحس الي الا الي صدم على السيارة ودخل فداومة البنوك والتامين وتامين الطرف الثاني ولا الي تعسرت الاقصاد معاه وفوق ماانت ماعندك استطاعة يسحبون سيارتك ويدفعونك سطحة وغرامة ومتاخرات ومراجعات انت في غنى عنها 


up 3 down 0
راقي m 135
قبل سنه و 10 شهر



كلامك ممتاز في ظروف مثالية لكن المجبر وش يسوي
كنت ابغى اشتري كاش عن طريق قرض بنكي سيارة للعائلة
لكن حسبت اقساطها ثلث الراتب بيروح علي لمدة ٥ سنوات
وحسبتها بايجار منتهي بتملك مع دفعة أولى بتطلع اقل من ربع الراتب
صحيح الفايدة اعلى لكن راتبي اهم لي كموظف اني اقدر اوفر منه اعلى
من اني اخذ قرض شخصي وصحيح الدفعة الاخيرة بعد ٥ سنوات تتعب التفكير لكن وقتها
يقدر يقسطها الواحد خصوصا انه فيه بنوك تقسط على سنتين
وكل واحد وظروفه في هالزمن اهم شي الواحد يبعد عن المشبوه او الحرام


up 1 down 0
ابو عبدالله احمد 3510
قبل سنه و 10 شهر



الحصول على تمويل شخصي وشراء سيارة جديدة بأسمك أفضل بكثير من المنتهي بالتمليك


up 2 down 0
AbuOsama36 340
قبل سنه و 10 شهر



جزاك الله خير، طيب انا الحين ببتعد عن الاقساط وعقود البنوك الجائرة ماهو البديل؟؟؟؟؟؟
اذا ان راتبي ٥ الاف واقل السيارات المستعملة ممكن تقعد بالشهور تدور شي نظيف ماتلقى هذا بالنسبة للموديلات الجديدة(اقل من ٤او ٥ سنوات) في ظل الشوارع المكسرة والمطبات العشوائية وانعدام اهتمام بعض ملاك السيارات بالصيانة تغير زيت الى اخره ليش اتعب نفسي بسيارة اساء استخدامها غيري واشتريها واحط فيها الي وراي وقدامي يارجال لو وقعت عقد مع واحد من البنوك واخذت راحة بالي ابركلي من سيارة مستهلكة او متعرضة لحادث قوي لو اخذ اكسنت وكاله ولا اخذ سنتافي معدوووم
طبعا بكلامي ماايد الاجار المنتهي بالتمليك، عن نفسي انا اشوف الواحد لو دخل جمعية ودور ازخصص معرض بيحصل سيارات تحت ال٤٠ الف ممكن تزيد شوي ضريبة وتامبن واصدار لوحات
واذا لقيت مستعمل نظيف والسعر جيد افضل


up 1 down 0
عامر 1412 279
قبل سنه و 10 شهر



فعلاً أستغرب من بعض الناس اول مايتوظف مثلا ب راتب 3 الآف على طول يطلع تقسيط ويبلش بالاقساط ولايستانس بالراتب ولاحتى يقدر يدخر منه او يجمع لان نصه قسط ونصه مصروف ، الحل انك تجمع من راتبك ع الاقل 10 الاف كسيارة تمشي حالك ب بداية حياتك العمليه وجمع لك كم قرش مدة سنه او سنتين طبعا ماراح تجلس ع نفس الراتب بيزيد حسب شغلك وانضباطك بالعمل جمع لك مبلغ محترم وخذ لك سيارة محترمه ومو لازم موديل السنه المهم انها نظيفه وتخدمك وماتكون قديمه اولاً وأخيراً هي وسيلة وليست غايه توصلك وتشيل رجلك عن الناس


up 1 down 0
abdulaziz bin ateeq 316
قبل سنه و 10 شهر



حياك
نصيحة طيبه من ناس جربت 
واللي يقول راتبي خمسة الاف  ولاعنده حل مجبور بسيارة سيارة
اقساط اقوله خذ ع قدك مثال تاخذ قرض مايتجاوز 30الف وبتحصل
سيارة اخت الجديدة من فئة الصني واكسنت تمشي امورك 
وكان الله في عون كل محتاج


up 1 down 0
باترول 2020 2624
قبل سنه و 10 شهر



التاجير المنتهي بالتمليك حلو للي ياخذه بدون دفعه 

لانه جدا جدا جدا امان لك من الحوادث

والنقطه رقم ٣ غير صحيحه جملة وتفصيلا

انا شويت اوبتيما ٢٠١٨ سددتها ٩ شهور ١٠ الاف فقط وصار لي حادث وراحت تالف 

خلال ١٥ يوم التامين عوض البنك ٥٥ الف وانا عوضوني قيمة السطحه ٥٥٠ ريال + قسط شهر 

لو انا شاريها ملك ؟؟؟ وراحت تالف ؟ والله اكلها صح 


up 2 down 1
مشاااووير 6
قبل سنه و 10 شهر



الوالد طلع شفرولية ترافيرس في رمضان وقال ما أبغى السيارة أجار منتهي بالتمليك أبغاها أقساط بحيث إنها تتسجل بإسمه واذا بغى يبيعها بعد فترة يقدر، المهم رفع له طلب الموظف وجات الموافقة، قيمة السيارة تقريبا ١١٩ ألف وطلعت أقصاد ب ١٣٥ ألف، أنا أشوف إنه أفضل من الاجار المنتهى بالتمليك


up 1 down 0
mohammed shareef 1075
قبل سنه و 10 شهر



^^^^ وبدون دفعة أولى وقصد حوالي ٢١٠٠


up 1 down 0
mohammed shareef 1075
قبل سنه و 10 شهر



معلومه هامه ......
اي سياره مستاجره سواء من شركه تاجير او منتهي بالتمليك لايحق للشركه مطالبتك بريال واحد
لان من شروط وزاره النقل لاصدار رخصه لمزاوله هذا النشاط هو تامين المركبات شامل
فاذا اعطاك مركبه منتهيه التامين او لايوجد تامين عليها غرامه 20 الف
واذا طالبتك المنشئه باصلاح المركبه او بدفع تعويض لها من حقك تقديم بلاغ عبر الرقم 938 وزاره النقل
فيه انظمه يجهلها الكثيرون


up 1 down 0
asd01 92
قبل سنه و 10 شهر



جزاك الله الجنة
هذا بيع الغبن .. ربا
اكفانا الله شره


up 1 down 0
طالب الله1 88
قبل سنه و 10 شهر



انشهد التقسيط ما فيه خير انا الحمد لله موظف وراتبي طيب 
وسيارتي نفسها ماغيرتها موديلها بالتسعينات ياكثرهم اللى قالو لي اشتري سياره جديده تقسيط شي لكن ماعلى فيهم اهم شي انا مرتاح 

المشكله يحسبوني بخيل لكن اللى يعرفني يعرف انه مو بخل واصرف ولا ابخل على نفسي لكن كذا مابي اغير 


up 0 down 0
mission 849
قبل سنه و 10 شهر



وش حادك عالمر ،،،،،،،، 
واللي راتبه اربعة او حولها يطلع سيارة اقساط مجبور عشان يداوم بيها ولكن الحمدلله وهو مقسم الارزاق ،،،،، 
ونصيحتي او للتذكير افضل من عبارة ( نصيحة ) عليكم برضى الوالدين يبارك فالرزق وحياتك كلها تسير صح بإذن الله 
ودمممتممممم


up 0 down 0
zax_makkah 247
قبل سنه و 10 شهر



اشكر الجنيع على ردودهم الطيبة .. المقصد من مووضعي هو التنبيه على امور يغفلها الكثير وليس المقصد ان اقولكم لا تاخذون سيارات ايجار منتهي بالتمليك


حالياً ومع الاوضاع اللي صايره الواحد ما عنده الا هذا الحل لكن المقصد من الموضوع ان الشخص يحسب اموره صح ولا يحمل نفسه فوق طاقتها ويعرف كذلك عواقب الامور 


up 0 down 1
تركي818 134
قبل سنه و 10 شهر



الله يجزاك بالجنه

ولكن في نقطة مهمه

الا وهي بعض الشباب في قطاع خاص وشركاتهم غير معتمدة لدى البنوك
لإستخراج قرض شخصي

فيظطر انه يشتري اجار منتهي بالتمليك

والبعض ماعنده ربع يسوي معاهم جمعية وحتى لو سوا جمعية ماتوصل لعشر الاف ريال

وهنا انصحهم يشترون اقل فئة واصغر ويكون القسط مايزيد عن 1000 ريال شهرياً ولو اقل خير وبركة



وتكون بدون دفعة اولى

ويبتعدون عن السياراات التي تزيد عن 60 الف كاش
لان بيكون القسط اعلى

وأبعدوا كل البعد عن السيارات المستخدمة مشاكل حراره قير مكينة

الواحد يبي يشتري سيارة تريحه ولا يبي سيارة تشغله بالورش


up 1 down 0
aboahmed2014 1161
قبل سنه و 10 شهر