تكييف السيارة والمراوح خصوصا الكورية والأمريكية الجزء الأول

3 0

لايمكنك التصويت حتى الحصول على 20 نقطة على الأقل
إضغط هنا للإخفاء

جبال معانيق 277
قبل 4 سنه و 7 شهر

يالربع  بنزل موضوع على عدة مرات عن التكييف وبعدل كل ماحصلت فرصة واضيف معلومات وهي بعضها من تجربة فعلية لي شخصيا في سيارات امريكية وكورية وايضا يابانية لكن هنا بخصص للامريكي والكوري
،،،،،هالأسبوعين بالرياض جانا حر قوي وكل الناس صارت تشتكي سواء من مكيفات البيوت أو السيارات  وهنا في المنتدى كثرت المواضيع والشكاوي من ضعف التبريد  وكل يبدي رأيه وتجربته وأيضا أغلب الورش يقولك غير كومبرسور واللي يقولك نظف دورة تبريد كاملة واللي يقولك عبي فريون واللي يقولك رهم كومبرسور واللي رهم مراوح اضافية واللي يقول حساس واللي يقول غير ثلاجة وأشياء كثيرة بنتطرق لها 
١- تعبية الفريون : الفريون بالعادة ماينقص لان دورة التكييف مغلقة يعني يقعد سنين اذا مافيه تهريب  لكن مع السنين والاهتزازات والاستهلاك ممكن ينقص ولو بشكل بسيط لكن اذا فحصت ولقيته ناقص  وصلحت مكان التهريب عبي  فريون اصلي  وزيت اصلي  لان الكومبرسور فيه بساتم  مثل المكينة وتحتاج زيت يمنع الاحتكاك ويقلل الحرارة وبعض الانواع  تكون  روتاري دوار او حلزوني وتوجد انواع كثيرة وعندنا يوجد امريكي وصيني وهندي  ، الامريكي منه Honywell 134a  وهو ممتاز بس من تالي بدو يتركونه لانه ضار بالبيئة وغيرو لنوع اقل برودة شوي اسمه R22 وغيره انواع وانا عن تجربة في سيارتي النترا قل مرة تبريدها واحيانا يتوجه اسفل ورحت لورشة وقال عبي فريون وبالفعل عبيته  وضبط لمدة سنة ونصف ومعروف غير الموزع اذا خرب ايضا الهواء البارد كثافته عالية فينزل اسفل .
٢-المراوح : المراوح مهمة جدا لتبريد السيارة ، المكينة والكومبرسور وغيرها ، واغلب الامريكي والكوري تكون مروحة واحدة فقط  وهنا بعضهم يشتكي يقول المكيف مايبرد في الحر القوي او الظهر وفي الزحمة  وهذي من اسبابها ضعف المروحة او خرابها والضعف موشرط تطفي لاتشتغل لكن بصورة ضعيفة وماتلحق تبرد المكينة  والكومبرسور وطريقة معرفة خرابها تفحصها عند فني شاطر أمين  يعني فاهم وصادق لان بعضهم فاهم  بس نصاب  وبعضهم وأمين موفاهم  وعلامتها تكون سريعة مايمديك تميز ريش المروحة  هنا تكون تمام  وبالطبع اتجاه الهواء للداخل موعكس  عشان انت تبي تبرد المكينة مو برى السيارة لان معروف اي مروحة اذا عكست اسلاك الكهرباء تعكس اتجاه المروحة  ، ايضا المراوح خطيرة على اليدين اذا كانت شغالة  وموجود التحذير مرسوم على الغطاء وايضا وهي طافية بعضها ريشها حادة تجرح الاصابع   والاسعار عادة ماهي غالية ، وبعضهم يغير دينمو  وانا اشوفها ماتستاهل افضل تغييرها الا اذا كانت غالية لاغير قطعة قطعة ، ايضا الترانزستور او الريلاي حق المقاومة تشيك عليه وبعضهم يعدل عليه وانا شخصيا مااحب اعدل في السيارة عموما، الا مضطر ،وايضا فيش المروحة احيانا بسبب الحرارة ومع السنين  والمطبات يانه يرتخي او يذوب والافضل غير كامل افضل واريح واوفر وقت .، فيه ناس يرهمون مراوح وانا شخصيا ما أؤيد ذلك خصوصا بالسيارات الجديدة  لكن ان كنت معزم فاشتغلها صح او رح لورشة تشتغل صح عشان التركيب والكهرباء وايضا تحمل النتائج ، ولعلمك المروحة في الامريكي والكوري تكون بعد المكثف Condenser والبعض يسميه راديتر المكيف وبعد المشعاع اللي هو راديتر السيارة Engine Rdiator  وبعضها  ايضا بعد مبرد القير وقبل المكينة  المحرك  يعني في الوسط ،،ووظيفتها وهي واحدة فقط تكفي عن المراوح الاضافية تبع المكيف وفي أثناء سحبها للهواء البارد من الخارج  تشتغل شغلتين في وقت واحد تبريد راديتر المكيف المكثف والمبرد عبر شرائحها ويواصل الهواء نفسه ويبرد راديتر المكينة عبر شرائحه اللي بدوره يبرد الماء عبر طرمبة الماء Engine water pump ويدفعه للمكينة ويبردها وتستمر هالعملية يعني في الكوري المراوح تكفي لكن اذا حصل زود أكيد أفضل  ، في الكوري  المراوح ماتشتغل الا اذا احتر الموتر المكينة او اشتغل المكيف وتشتغل على حساس  لانها كهربائية وهذا غير المراوح القديمة الميكانيكية اللي تشتغل على طول وتطلع صوت مزعج وحنة  مثل الددسن وغيره، طيب فيه ناس تقول اذا مشيت يبرد المكيف واذا وقفت او في زحمة يفصل او يضعف  نقول طبيعي  لاسباب منها ( زيادة حرارة السيارة كاملة مكينتها وكومبرسورها وراديتراتها لان  الهواء البارد مع المشي يبرد المكثف  والمبرد والراديتر والمكينة والكومبرسور وبكذا تشتغل وتبرد وايضا الكومبرسور فيه حساس واذا احتر سواء من وقوف ولاخراب مروحة يفصل اتوماتيكيا عشان يحمي نفسه ، وعند الوقوف حرارة السيارات اللي جنبك وعوادمها تزيد حرارة الجو حول سيارتك وتسخن سيارتك . وان شاء الله لاحقا بكمل واعدل وازيد هالنقاط  لأني على عجل والوقت ضيق وهي قابلة للتصحيح والزيادة والتعديل بدون تعصب لكوري او ياباني او امريكي او غيره .

إبلاغ

الردود