ابغى اشتري سيارة Changan CS35 Plus - مشورتكم

كبداية انصحك بالأستخارة فما خاب من استخار

ان كنت رجل في بداية عمرك وبداية العمل انصحك بشراء سيارات متداولة ومجربة ومعروفة جودتها
مثل سيارات تويوتا وربما هيونداي (لإنتشارها)

صدقني راح تكره سيارتك لمى بس اماكن معينة فقط تصلحها ! وراح تكرهها اكثر لمى تبي تبيعها !
انا معاي سيارة منتشرة بالشوارع لها سنوات وقاعد اعاني ان القطع فقط عند الوكيل وان مافيه ورشة تقدر تفك مسمار فيها
فكيف بك وانت تبي تشتري سيارة جديدة على السوق ؟؟؟

لاتعتبر كلامي كتنفير لك عن شراءها ولكن بقولك بسطرين تجربتي

( أنا اشتريت سيارة متعارف عليها بسوق وتشوفها كل يوم ولكن صيانتها معقدة وقطعها بس عند الوكيل
تبهدلت فيها لو يخرب مسمار فيها احتمال توقف السيارة شهر عن الوكالة وكثير من ملاك السيارة اشوف
سياراتهم بشهور واقفة تنتظر الدور ! وصاحبها متبهدل (عسى لاتصير لافي صديق ولا عدو)
فأنا خفت منها وادور بيعتهاا باقرب وقت لان لو يتعطل شي مافي ورشة تقدر تصلحها غير الوكالة !!! ولاحظ انها منتشرة!!!!!!! )

اتمنى اكون افدتك

رأيي من رأي الاخ (انت اخر امالي)
65 الف مبلغ كويس للسيارات العائلية لكن حدد تبي صفين او 3 صفوف مراتب ؟

السياره جميله جدا ومواصفات عاليه جدا وشفت لها مقاطع وتقارير وسعرها بالمعارض زيرو من 52 وال58 وضمانها كويس لكن اللي مخوفني فعلا قطع الغيار فقط عند الوكيل انا من رأيي الشخصي لو بتستخدمها وصيانتها ملتزمه تماما في الوكاله علشان الضمان لاتخاف من اي شي لانه عالضمان راح تكون طول فتره الضمان اللي هي 5 سنين او 150 الف كيلو وطبعا الاستخاره قبل كل شيء

cs35 plus قيرها دبل كلتش ومشهور هالنوع من القيور بكثرة اعطالة وقلة اعتماديته والشي الثاني المكينة فيها تيربو في اجاوئنا يحتاج عناية خاصة واعتماديته اقل اذا مره ناوي على نفس الشركة اشور
والشور لك بال CS35 العادي بحكم القير تقليدي واسهل للصيانة ولايوجد فيه تيربو وفي خيارات اخرى بمواصفات سلامة اعلى في نفس الفئة تويوتا رش ستاندر ب 62 الف بست ايرباقات
او هونداي كونا فئة السمارت فيها نقاط عمياء و4 ايرباقات على حد ما اذكر

مبلغك جدا طيب للبحث عن بديلة ..

يعني انا حاس فيك انك تبي وكالة وتبي تريح راسك ..
لكن!! انا بقولك عن تجربتي باختصار

رحت بسوي مثلك وبشتري سيارة وكالة للعائلة عشان السواق .. يوم شفت السواق هاه وهاه بسواقته وغشيم خصوصا ان له تجربة بسيارة سابقة وما غير يصدم بها
رحت وشريت مستعملة ( تويوتا بريفيا ) مستعملة ونظيفة وممشاها معقول .. وخله يستخدمها وتصليحها قليلة ومكيف ثلج وواسعة
لأن تبي الصراحة قهر أشتري وكالة وبالأخير يصدم بها ( حتى لو هو ماهو غلطان ) لكن فيه حركة عند السواقين انه يصدمه بزر ويقوله بعطيك 500 قيمة التصليح بس لا تدق على المرور .. ويحطها السواق بجيبته ويجي لكفيله ويقوله هازا نفر سوي صدم بعدين اهرب وما يعرف رقم لوحة

ريح راسك وطق مستعمل للسواق ..
اما اذا لك شخصيا توكل على الله الصيني بدا يثبت قوته بالسوق .. وقطع غيارها شف متى بتطلبك وقتها يكون الوكيل تحسن أكثر وأكثر

اذا تقدر على التوسان محرك 2.0
او كونا استاندر على فلوسك بنفس المحرك
و اذا سيارة سيدان بالمعارض اوبتيما ممكن التيما ٢٠١٨
او كورولا جديدة لكن اصغر مكينه و خالية من المواصفات
الصيني وضعه غير مضمون واردات الصين ممكن يمنعونها و الله اعلم
و سيارة جديدة من قبل و مواصفاتها غير عن الشانجان اللي قبل

افضل لك تاخذ سياره كوريه
او امريكي اذا انت راعي خطوط
السيارات الصينيه غريبه وجديده
ويمكن تظهر عيوب
ولن تظهر الا بعد سنتين ثلاث

( وجه تعرفه ازين من وجه تجهله )