محتار بين الافالون وبين الكادينزا الجديدة مشورتكم

والله لو محتار بين الافالون والازيرا بقول معك حق بس الكادينزا يارجل كل تفتيش يوقفك وينفضك وتجيب لنفسك الشبهة والغثاء، صح مواصفات ودلع بس لو تطلع لمطعم ورا بيتكم بتتوقف وتتفتش والكلام عن تجربة، استخر وقرر

اذا بتاخذ الكادي خذ لونها ابيض ولاتظلل وخلك عاقل. شخصيا فرق السعر هو اللي يحكم اذا الكادي ستاندر 90/95 الف والافالون فوق 130 الف باخذ الكادي الفرق اكثر من 30 الف موب بسيط عموما الكادي شكل جديد والافالون نفس الشي 6 سلندر كلها الجوده اتوقع كيا ممتازه جدا قطع الغيار الكيا ارخص

اذا بتستخدم سنتين او ثلاث سنوات وتبيع فخذ الكادينزا
لكن انا لو مكانك وابي سياره 6 سلندر فاخذ كامري قراندي فيها ستاره خلفيه شد بلد وشاشة تدعم الخرائط والاندوريد
ومكيف ممتاز وجوده
ومميزه عن باقي الكوامري بالشكل الخارجي مختلف من جنوط وشمعات اماميه وخلفيه مختلفه عن باقي فئات الكوامري ال 4 سلندر

والسعر اقل من الافالون تورنق بفارق 15 الف
وماوضعو سعرها قريب من الافالون نسبيا من فراغ

انا ضد اي سيارة سيدان ٦ او ٨ سلندر
الاربع سلندر تكفي لا هي جيب تبي زود عزم للبر
و لا جمس او حوض عشان تحمل ركاب و اغراض
كامري اوبتيما التيما مازدا و غيرها و عليك بالاستاندر المهم مثبت سرعة
بتمل بعد فترة مهما طالت و تتحسف على كثر المواصفات
و تعرضه للبيع او البدل بسيارة تعطيك امكانيات اكثر فكر زين
و على الخط اشوف اكسنت و دداسن و مسرعين بعد اي سيارة تنفع للسفر

عن تجربه وكاله كيا سيئه جدا في خدمات بعد البيع
فوضى بكل ماتعني الكلمه
وكذلك هيونداي
ميزتهم فرق السعر فقط ولكن هل فرق السعر يخليك تجازف
عموما وكيل تويوتا هو الافضل في خدمات بعد البيع حتى لو كانت سياراته بمواصفات منخفضة او سعر مرتفع ولكن الجودة مقبوله

كيا كادينزا 2020 فل كامل ====== السعر حوالي 136000
كيا كادينزا 2020 ستاندر ====== السعر حوالي 85000

تويوتا افالون 2020 PREMIUM فل كامل ====== السعر حوالي 157000
تويوتا افالون 2020 ستاندر ====== السعر حوالي 130000


هذا الفرق تقريبا بالسعر
لو كنت مكانك بآخذ
1- تويوتا افالون 2020 PREMIUM فل كامل
ثم
2- كيا كادينزا 2020 فل كامل

فقط

وفي الاخير هي اختيارات شخصية

افلون ال

والله يالكوريين عندهم مصممين لسياراتهم أطلق من اليابانيين بمراحل , أنا ماني عارف ليه اليابانيين تصاميمهم سيئة جداً الخارجية والداخلية . . .

وبأعطيكم دليلين فقط على فشلهم بهالناحية :

الأولى : بالله شوفوا جنوط الأفالون وجنوط الكادينزا , واللهِ ماعمري شفت جنوط حلوة من اليابانيين حتى باللكزس اللي يقالها أفخم صناعتهم . . فاشلين بقوة من هالناحية . .

الثانية : اللون الخارجي ,, اللون الأبيض بس اللي يصلح لسياراتهم , يعني مافيه أي خيارات أخرى تضبط مع سياراتهم لا أسود لا سماوي لا فضي لا عودي ولا شيء .

وأبد ومضحوك علينا ( اللون الأبيض أزين لك بالصيف ) وهو كذب صيفنا أقسم بالله مايعرف لا سيارة لون أبيض ولا لون أسود سسسسسسسسسلخ لظهرك . . . .

وإلا ليه كل واحد إذا طق سيارة جديدة يروح ويركب عازل حراري وتظليل ؟؟؟؟؟؟ مع إن سيارته لون أبيض ؟؟؟؟؟؟؟ زيادة رفاهية ؟؟؟؟؟ إيه هين . . . .

أعيد وأقول أنا أتكلم من ناحية التصميم فقط وهذا شيء مهم مع المواصفات والجودة . . . . لكن جد بجد اليابانيين فاشلين من هالناحية بإمتيااااااااز . . . .

يعطيكم العافية انا ليش اخترت الكادي لان شكل الوجهية تغير والداخلية اما الازيرا شكل الجديد للوجهية ما اعجبني مره

اذا تبي حل لموضوعك بكل اختصار انت تبغا سيارة تعيش معك فترة طويلة بدون مشاكل ووكيل ممتاز خذ افالون 
اذا تبغا سيارة دلع ومواصفات وتفكر تبيع بعد خمس سنوات خذ كادينزا

لاكن انا لو مكانك باخذ الافالون بدون تردد تهمني الاعتماديه اكثر من المواصفات 

توي شفت شكلها والله ماش مافيها فخامة وما تنفع بريال على وش 90 الف والفل فوق 136 الف

وبالنهاية لا جودة وموتر مشبوه

الكادينزا موتر لحوووج وشبهه في كل نقطه لابد يفتشونك ويمرمطونك.
خلك على الافالون .. ياباني اعتمادي ووكيل فوق الممتاز.

اذا منحد على السيارتين ، اقولك خذ لك افالون نصيحة لك مني ..
واذا تبي سيارة جمعت كل صفات هالسيارتين وزود ، فخذ لك هوندا اكورد ٢.٠ تيربو ، عزم وجودة الخام اعلئ ورساوة وثبات على المنعطفات ، وايضا عملانية المحركات والقيور المشهورة فيها هوندا.
والله يرزقك بما فيه الخير..

اذا بتاخذ6 سلندرانصحك بالافجي او البرادو او الفورتشنر سيارات رفيعه ودفع رباعي