كم مدة بقاء السيارة عند المستخدم قبل البيع ؟؟؟

فيه اختلاف بين الناس كل شخص على حسب وضعه المادي
البعض يحتفظ بسيارته اكثر من عشر سنوات دام وضعه ما يسمح له بسيارة جديدة
وبعض الناس تحب المظاهر والفشخرة كلما نزل موديل جديد يحب يملكه
انا عن رأيي الشخصى اقول احتفظ بسيارتك على حسب وضعك المادي

دامها من فئة السيارات الشعبية واللي تشوفها بالشوارع بشكل يومي
مافيه خوف من انك تخليها معك اطول فترة ممكنة 
لان محلات قطع الغيار بتكون بكثرة وفوق ذا كله سيارة شعبية 
اي عطل فيها بيكون معروف وسهل كشفه واصلاحه لكثرة العمل على هذا النوع من السيارات من قبل الورش

واللهي على حسب استخدامك لها في هذيك الفتره
لو كنت مهمل وما أنت تحافظ وانتهت فترة الضمان راح تدفع فيها مبالغ صيانات وتمشي فيها
والبعض ماشاء الله ينتهي الضمان وماقد اشتكى منها. ويكمل بها ٥ إلى ٧ سنوات.
بدون أعطال قويه. وخرابات والبعض توصل ١٥٠ الف والسيارة متهالكه يبغالها حول ال١٠ تصليح وصيانات وممكن أكثر.
هي عليك انت ي المستخدم لو انت ماتبغا تبدلها بعد اربع سنوات راح تهتم في موترك في أبسط الأمور من زيت وقماشات وقياده هادئيه ومحافظ
والبعض يرحل الزيت مايقلبه والاقمشه منتهيه ويمشي عليها هذا من غير المطبات والارصفه والحفر والسرعه الزياده والاستخدام الثقيل من يد بيد شخص آخر

مشكورين على المشاركه والمرور

تعتمد على طريقة استخدامك للسيارة و طبيعة السيارة نفسها من صيانة و قطع غيار.
فيه ناس مثل حالتي احب استخدم ما ودي ابيع بسرعة يعني اقل شي 10 سنين تقعد و في هالسنين هذا ان حافظت عليها تطلب
قطع استهلاكية مثل سيور و فحمات و قطع ثانية مثل مقصات و مساعدات وات خابر شوارعنا كيف يعني هذه اشياء غصب عننا
تصير انك تطيح بحفرة و مطب قوي ما تدري عنهم.

مشكور اخي بدر على المشاركه

فيه سيارات
مع الاهتمام... ما راح تطلب
يعني مو شرط ٥ سنوات وغيرها
العبره بالاهتمام والبعد عن الدفاشه
لانها افضل طريقه تعيش مع
السياره ٢٠ سنه

مشكور اخي على المشاركه

اكيد معظم انواع السيارات في هذه الايام تحتاج عنايه وصيانه دوريه

فيه ناس تحب تغير كل سنتين او خمس وفيه ناس لا اذكر ابوي كان عند فكسار ٩٧ قعد معه ٧ سنين وخبط ووظبه واستخدمه سنتين وبعدها باعه وهي على حسب الموتر اذا اخذت لك واحد نظيف وحافظت عليه بيكد معك سنين لان والله وضع المستخدم الحين مايطمن والجديد ضرايب وغلاء وبيصير الوضع كلن يزبط موتره ويرجعه زي ماكان ازين من انه يروح ويطيح له بواحد مغشوش وملعوب فيه  

والله لو القروض والتاجير المنتهي بالتمليك نص الشعب سياراتهم موديلات التسيعانات وبداية الالفيه

مشكورين على المرور والرد

بالنسبه لوجهة نظري الشخصيه يعتمد على الشخص نفسه وعلى السيارة
اذا حوان عليها من صيانات دوريه وهدوء بالقيادة ممكن تجلس السيارة
٧ سنوات إلى ١٠ سنوات ثم بعدها يفكر بالتغير اذا بدات تتعطل.

بدون شك هو حسب الإستخدام لأنه احيانا تلقى سيارة موديل 2012 انظف من سيارة 2019 ملعون جدها
عشان كذا السيارة عمرها ما يقاس بالزمن لكن يقاس بالإستخدام و الممشى و النظافة

رأيي الشخصي أن الاستخدام أهم من المدة الزمنية

أنا عندي كامري 2013 ماشية معي 130 ألف أخذتها من الوكالة ولها معي 7 سنوات وتلاقي بعض الشباب يمشي هذا الممشى في سنة ونصف

طالما السيارة نظيفة وما تطلب صيانة فلا تبيعها

مشكورين على الردود والتفاعل