تركيب مرايات طي الي كامري 2007 الى 2011 - الجزء الثالث

8 6

لايمكنك التصويت حتى الحصول على 20 نقطة على الأقل
إضغط هنا للإخفاء

benwaleed 47
قبل 4 سنه و 5 شهر

تركيب الوصلات الكهربائية
أي تعديل كهربا تسويه في سيارتك لازم يكون بشكل احترافي. يعني ما تروح تكشف الاسلاك و تربطها مع بعض و السلام. في هذه الحالة ممكن يعمل شورت بسبب تلامس سلكين و بالتالي يعمل لك خرابات كهربا الله لا يبلانا بها لا لها بداية و لا نهاية. في أسوء الأحوال تولع السيارة لا سمح الله.
و كمان لا تخلي سلك طويل و التاني قصير، أوتستخدم سلك عريض و التاني نحيف، أو تخلي الأسلاك في الهوا من غير تثبيت و بعدها تسمع صوت طقطقة في البودي حق السيارة بسبب انه السلك يضرب يمين و شمال. كل دي الأشياء بندرسها و نتفاداها إن شاء الله و نطبقها في مشروعنا حق المرايات.
إعذروني على التأخير فأنا رب عيلة و الدنيا أحيانا تاخدني منكم. فالعذر و السموحة.
في الموضوع دا باوضح لكم كيف تركب أفياش الكهربا للمرايات (خارج السيارة) بشكل احترافي. كل اللي تحتاجه من الأدوات هي:
الأفياش الكهربائية و الموصلات الكهربائية (اضفتها لكم في موضوعي الأول)
زرادية قطع الأسلاك و كشفها (لون مقبضها أصفر في الصورة)
أسلاك للتجربة (أي حجم من 18، 20، 22)
أداة تركيب الموصلات بالأسلاك (بنسميها زرادية الكهربا المقبض لونه أحمر و أزرق)
الأدوات السابقة موضحة في الصورة الأولى
الملتيمتر Multimeter (نسيت أصوره لحين كتابة الموضوع)
في هذي التجربة بناخد فيش و موصل أنثى و نطبقه على باقي الموصلات:
1- أكشف السلك:
في مثالنا: اختر السلك بحجم 20 و أدخله في الحجم 20 كذلك في زرادية قطع و كشف الأسلاك (الصورة الثانية). إقفل الزرادية تمام و اسحب السلك (الصورة الثالثة)
اكشف من 1 إلى 2 ملم من السلك. بعض الموصلات تكون أكبر و البعض تكون أصغر. أنا عن نفسي أحط السلك على الموصل عشان أعرف طول السلك المطلوب كشفه -تقريبا- زي الموضح في الصورة (الرابعة).
2- ثبت الموصل في زرادية الكهربا:
في مثالنا: اختر الحجم في زرادية الكهربا (1.5-1). اضغط ضغط بسيط على الزرادية إلى ما تحس أنه الموصل ثبت في مكانه. انتبه! لا تضغط الزرادية للنهاية (الصورة الخامسة و السادسة)، و اتاكد أنه طرف الموصل من المدخل عند طرف الزرادية تماما.
3- أدخل طرف السلك المكشوف بالموصل:
هنا لازم تعرف إنه الموصل يتكون من ثلاثة أجزاء (الصورة السابعة). انتبه! السلك بغلافه ما يدخل الأجنحة الخاصة بالسلك المكشوف. السلك المكشوف كذلك لا يدخل بالجزء الخاص براس الموصل.
4- إضغط زرادية الكهربا الى ما تقفل معاك و تفتح اوتوماتيكيا.
5- شيل السلك من زرادية الكهربا (الصورة الثامنة). المفروض انه العملية تمت بنجاح. لكن انتبه! جرب تشد السلك من الطرفين و تتأكد إنه مربوطين مزبوط. اذا لاحظت طرف زايد أو ناقص، أو لقيت سلك راخي، أو سلك فك معاك، عيد العملية.
انتبه! جرب "استمرارية" السلك عن طريق الملتيمتر -اي مدى توصيله للكهربا-. اختر علامة "الاستمرارية" في الملتيمتر (الصورة التاسعة)، و لامس طرف السلك الأول بسلك الملتيمتر الاحمر و الطرف الثاني (راس الموصل الكهربائي) بسلك الملتيمتر الاسود.
إذا سمعت صوت طنين من الملتيمتر، معناها العملية ناجحة. اذا ما سمعت، عيد العملية.
6- ادخل راس الموصل في الفيش الكهربائي المناسب (الصورة العاشرة و الحادية عشر و الثانية عشر).
هنا لازم تعرف انه رؤوس الموصلات الكهربائية اما ذكر أو انثى. و كذلك الحال للافياش الكهربائية. و في مثالنا بتاخد الموصل اللي ركبته و تشبكه في الفيش الانثى.
7- نطبق الموضوع في مراياتنا و النتيجة زي ما تشوفوا (الصورة 13 و 14).
اختر فيش 7 أسلاك، أو فيشين واحد 3 اسلاك للقزازة و الثاني 4 اسلاك منهم 2 للفلشر و 2 للطي الآلي و طبق ما سبق من الخطوات فيهم.
نصيحة لوجه الله! جرب تمارس الخطوات بأسلاك تانية الى ما تتأكد انك اتمكنت و الشغلة صارت بسيطة و صار عند طريقتك الخاصة.

مبروك! تم تركيب الافياش بنجاح. كدا تركب المرايات و انت مطمئن.

أخوكم صاحب الموضوع انتقائي و يحب الأصلي، لذلك اشتريت موصلات و أفياش تويوتا الأصلية للمشروع دا و غيره من المشاريع في السيارة و افكر اغير الأفياش للمرايات مرة ثانية لسبب واحد:
- انها مصنوعة من مادة بجودة مش و لا بد!
لكن بصراحة مميزات الافياش في موضوعنا انها:
- عملية جدا و سهلة التركيب و الفك للاسلاك نفسها بعكس الأصلية
- رخيصة جدا جدا جدا
- تؤدي عملها بالشكل المطلوب
- يعتمد عليها (مركبها لي ست شهور في مشروع سابق في سيارتي من غير مشاكل ابدا)
- شكلها بشع (دي ميزة ترا عشان تبعد الحسد :) )

مو قلت لكم اخوكم انتقائي جدا.
الموضوع الجاي تقرير مفصل عن كيفية تمديد الأسلاك في السيارة. بس هنا باتكلم عن الكامري الامريكية فقط موديل 2007-2011. اما الخليجية فممكن يفيدنا فيه احد الاخوة.
باوضح فيه الطريقة الاحترافية في تمديد الأسلاك في السيارة لغرض المشروع.

اراكم في الموضوع القادم "تركيب مرايات طي الي كامري 2007 الى 2011 - الجزء الرابع"

دعواتكم

إبلاغ

الردود