ماهي أفضل سيارة بـ حدود 140 ألف ريال؟

نصيحة خذها مني خذلك فكتوريا ٢٠١١ او ٢٠١٢
يكون ممشاه حول ١٠٠ موتر لك ولعيالك
مكده ومكيف ثلج وقطعه بالبقاله وببلاش
وألأفضل من هذا كله مايطلب صيانة ولايخرب
عز الله موتر ماعقبه شي ماشاءلله تبارك الله
خذ بنصيحتي كانك تبي النصيحه وسلامتك

وحط لك حول ١٠٠ الف في جيبك واترك الاشياء اللي ماتنفعك والمواصفات الزائفه

الله يعطيك العافية أخوي ما قصرت على النصيحة، لكن وضعي يسمح لي اشتري سيارة جديدة حدود ١٤٠ ألف.

انصح المتزوجين و من تجربة شخصية
اجل مشروع السيارة الجديدة الى بعد الزواج
بتطلع لك مصاريف و حتى لو ضمنت السكن ببيت ابوك
او وضعك طيب مادي
تحط ١٤٠ الف في سيارة سيدان فل كامل !
اتوقع اقساط اما كانك بتحطها كاش فكر بعد عشر سنوات
اشتري ارض و قدم قرض بناء ذاتي يعطونك قرض ٥٠٠ تبني بيت مستقل
ما ودنا تندم حنا سابقينك بالحياة و الله جا الحظر السيارة موقفه اطلع عليها ١٠ كيلو بالكثير
اتحسف على قسطها و هو مقدور عليه اقل من ١٤٠٠ اقول لو اشتريت مستعمل اي شي تنفع اي سيارة
و باقي علي تسديد قرض الزواج و التأثيث يعني مهو كل شي بالحياة سيارة اكشخ فيها

شكراً لك أخوي ما قصرت، بالنسبة لوضعي ما عندي قروض ولله الحمد وتكلفة الزواج ٢٠٠ الف كاملة وجاهزة وأدخرتها من راتبي الحمدلله.
والان احتاج سيارة وأفكر أطلع قرض وأخذ سيارة ممتازة ومواصفات حلوه وكحد أقصى بطلع فقط ١٤٠ ألف، وافكر جدياً في توروس ٢٠٢٠ فل.

بالنسبة للأرض في البال لكن غالباً بأدخر من بعد الزواج واكمل عليها قرض بسيط واشتريها، الارض بتكون في الديرة واسعار طيبة.

فكر بالافالون بس انتظر ٢٠٢١
ضعها من ضمن الخيارات المطروحة لديك
إذا مستعجل خذ ٢٠٢٠

معلومة بسيطة ممكن تفيدك تورس 2020 الله اعلم انه صيني على حسب ما سمعت 140 الف مبلغ طيب فكر في سيارات كروس اوفر مثل مازدا 9

بالنسبة للأفالون ٢٠٢٠ فل ومقارنة ب توروس ٢٠٢٠ فل
سعر الافالون مبالغ فيه حدود ١٥٧ والتوروس ١٤٠ ومواصفات اعلى بشوي مثل سقف بانورما وغيره

بالنسبة مازدا ٩ ما تناسبني لان لسا بدري على سيارة كبيرة بداية الحياة الزوجية

مبروك مقدما للزواج والله يجمع بينكم في خير ونصيحتي خذ لك تاهو جديد بقراطيسه ls صرفيته مثل الكامري وأقل فيه نظام ٤ سلندر و٨ سلندر خط و مدينه يعجبك معي مثله يارب لك الحمد له ٤ سنوات مايشتكي من شي

الف مبروك مقدما
يعجبني بعض الشباب نصايح واهتمام تحس لك اخوان في كل مكان جزاكم الله خير على نصح اخوكم
رأيي ان الكروس اوفر افضل بكثير سياره مرتفعه وعائليه ومساحه اكبر (مازدا cx9 روعه وكشخه وعندك دوج دورانجو وغيرهم كثير)
بس اذا ماسكه معك التورس بنسبه فوق ٨٠ بالميه توكل عل الله بالتوفيق للجميع

الله يعطيكم العافية وما قصرتوا، بالنسبة للكروس اوفر أفكر فيها بعدين لكن كبداية زواج ما اشوفها مناسبة لي،
ابغى رأيكم بالسيدان توروس تيتانيوم ٢٠٢٠ السيارة عاجبتني ولكن قلة خبرتي بالسيارات أخاف أحط مبلغ ١٤٠ ألف وقد توجد سيارة أفضل منها سيدان بنفس السعر

بارك الله فيكم جميعاً

المازدا CX9 بحجم التورس بالاطوال وممكن أقصر
لكن يفرق انه مرتفع شوي
بجيث لو بتدخل فيه رمله خفيفه يمشي معاك وفيه دبل مستمر
وحتى مع الحفر والمطبات مايحك وجهه.. التورس نازله من الامام.. حتى بالمواقف احتمال تحك اللحيه بالرصيف حق المواقف
المازدا عن تجربه يستاهل قيمته وسياره جميله وصغيره وملمومه
وفيها فخامه لا تنوصف
مثلا القيادة الذاتية لو تركت الدركسون.. تنبيه الخروج عن المسار.. الرادار.. مثبت السرعة الذكي.. النقاط العمياء.. البروجكتر.. فل LED داخلي وخارجي
وسعره مع الضريبه حوالي 131 الف
وصيانته بالوكاله رخيصه جدا مقارنه بباقي السيارات
صيانته كل ١٠ الاف كيلو

أضف مازدا 6
أو أكورد

مبروك مقدما للزواج والله يجمع بينكم على خير فيه سيارة مناسبة لك وتكشخ فيها وعليها عرض حاليا بس يبيلك تزيد المبلغ شويه شوف رقم هذا الاعلان في حراج 56939289

السلام عليكم
عندك مازدا 6 ياباني وجودة عاليه او هوندا اكورد ايضا جودة عاليه ومواصفات امان بالسيارتين وبالتوفيق

لو سمعت آراء الشباب ما طلعت بفايدة،، أنت اللي تحدد استخدامك ورغبتك والسيارة اللي تناسبك ووضعك المادي وأمورك وكل شيء
بالنسبة لي أنا شخصيا لو أملك مبلغ ١٤٠ ألف وأرغب في سيارة كان أخذت مازدا CX9
فالشاهد في الكلام خذ اللي يناسبك وترتاح له

نصيحه اذا بالامكان تشوف لك موتر بدون قرض احسن واحسن
لكن اذا ولا بد اشوف انك تاخذ كامري هايبرد او افالون مدري عنها اذا فيها هايبرد ولالا
وتخدمك سنوات قدام باذن الله
التورس والله العالم انه الفيوجن وعليه بعض اللمسات
واصبح فيه تقنيات محد يفهمها

خذ الي تبي لاكن حرام تحط 140 فى توروس صينيه شفلك ياباني لاتبعد عنه جوده فى الصناعه عكس الصيني وش فلحو فيه شف المواتر الصينيه مثل جيلي وطقتها اول مانزلت امتلت الشوارع منها الحين وينهم اختفو

خذ لك تاهو ياغالي موتر كد ومد ومواصفات حلوة وموتر قوي بحق وعزم وقيمته مقبولة جداً وعليه عرض حاليًا استخر ثم توكل على الله

لو تقدر تزيد خذ لكزس es ٤ سرندل لو ستاندر شكل
جديد و موفرة للبنزين و تمسك سعرها وياباني افضلك من الصينية