اللي له خبره بالباجيرو

وش رايكم بالباجيرو الربع بشكل عام ؟
سيارة قوية ونعم فيها ربع ولا صالون
١ . قطع غياره بالنسبه للتوفر والاسعار؟
متوفرة ومتفاوت في رخيص ومتوسط وغالي
٢. له موزعين مثل تويوتا ولا قطعه بس بالوكاله؟
له موزعين وفي اصلي وتجاري
٣. العزم والعزل .
العزم حسب قوة المكينة
٣.٥ عزمه متوسط ٣.٨ عزمه قوي
العزل سيء سيء سيء جدا جدا جدا
٤. الراحه .
مريح وراسي وثابت لكن بعض ناس
ماترتاح للكرسي تبعه
٥. صرف البنزين كم فله وكم كيلو يمشيك برا المدينه ؟
بنزين ٩١ حول ١٢٠ ريال يمشي من ٤٠٠ الى ٥٠٠ كم
٦. سمعت ان الدركسون ثقيل ذا الشي صح ولا غلط؟
غلط دركسون ولا أحلى
٧. الديكورات متماسكه ولاتتفكك وتتشقق مع الوقت ؟
. ديكوراته متماسكة
اسعاره بحدود كم ؟؟ ٢٠١٥ - ٢٠١٦ النظيف؟.
. في الاربعينات للنظيف جدا

ووش عيوبه اللي لاحظتوها فيها وتنصحون فيه ولالا؟
العيوب .. العزل + بلاعة بنزين

النصيحة .. كان عندي وبعته بسبب البنزين

ماشاء الله ربيع الأول عطاك اياها من الآخر..
وبالنسبة لي أنا من الناس اللي مارتحت لكرسيه اتكلم عن الجلد مادري عن المخمل
بالنسبة للدركسون اذا كان هواء الكفرات الامامية نازل كنت احس بثقل نوعا ما و يعتبر اثقل من اللاند
وبعته بعد ما بدأ تسعير البنزين و التانكي ما يغلق معي 4الى 5 ايام فصرفيته عالية و تانكي الباب واحد صغير

ماشاء الله على الشباب افادوك بكل شي ومجربين واحب انقل لك ايضاً تجربتي له وسط بلد وخط 1000 وشوي رايح جاي


العيوب اللي لاحظتها فيه صرفية البنزين شوي عالية يعني تتكلم فل في خط ممشى 140 الى 160 في 400 كيلو ينبطح تحت الربع طبعاً الصرفية مهب كل شي احياناً اذا الواحد عاجبه الموتر مرة يضحي بالصرفية مثل أصحاب الفتك الخ .....

المراتب شوي مع الخط الطويل تتعب منها مهيب ذيك الراحة الزايدة ولكن ايضاً فيه جيوب مثله واغلى منه مهيب مريحة مثل اللاند

وفي النهاية شف خذها قاعدة منتاب لاقي موتر كامل ولو لقيت بتلقاه غالي ويوصل مواصيل سيارات اعلى منه فئة فهمت ف انت دائماً قيم العيوب اذا تشوفها ما تفرق معك مرة توكل على الله

من العيوب اللي واجهتني ايضاً شوي فيه انه ثقيل طينة شوي في القومة وايضاً اذا دبلت له تبيه يرد لازم تدوسه واجد مع ان اللي اسوقه 3800 فما بالك 3500 ومشكلته ايضاً ان مروحته ميكانيكية ومع تشغيل المكيف هذا اللي يهد حيل مكينته شوي ويخليه اثقل ومهب حق سرعة ترى ابد يعني اذا انت متهور بتمشي به سرعات عالية ولا متوقع طول الخط 180 تراه مع التحميل يثقل وتحس انك دايس عشان يمشي هالممشى انا صراحة كنت محمل حمل مهب بسيط ومثقل علي عشان كذا احسن اني فاغص له عشان يمشي

المميزات صراحة اشوف سعره في متناول اليد + تكييفه ممتاز انه ثلاث صفوف مع انه اذا حطيت المرتبة الثالثة ما صفطتها انس انك بتحمل شي كايد خلاص يقفل ورا وهذي معروفة في اغلب الجيوب يا المرتبة الثالثة يا العفش

ايضاً واجهتني مشكلة فيه الا وهي فرامله ترج تحسها اذا هديت وقويت تحس برجه شوي مدري البلا من موتر قريبي ولا هو كذا مع انه فاكه وكالة وموديل جديد وما ممشى 100 الف والعزل للامانة ناسي عزله بس اذكره مهب كويس مرة عزله

غير كذا الموتر كويس صراحة وعمالنيته كويسة

ماقصرتو ياشباب يعطيكم العافيه .

صرفيتها مقاربه للاف جي التانكي الصغير ولا اكثر ؟؟ وعالخطوط بسرعه ١٢٠ ممكن تمشيني اكثر من ٤٥٠ ولالا

وبالنسبه للقطع اسعارها مقاربه للهوندا او اغلى ؟

450 بيمشيك على الخط بالراحة انا مشاني 400 على خط الرين من اخر محطة بردانه لين قلت سلام يا بيشة حوالي 400 وكان فيه تحت شرطة الربع بشوي يعني يمشي 450 اكيد وانا كنت محمل شوي وشاد 160


بالنسبة للقطع انصحك تروح تسال عنها بنفسك وتقيم انت احسن

صرفيته تقريباً حول الاف جي أتوقع


بالتوفيق

اسعار قطع الغيار باجيرو بعد الخصم




فلتر زيت ٤٦ريال
فلتر هواء ١١٤ريال
سير ماكينة ٣٨٠ ريال
٦ حبات بواجي ١٦٣ ريال
قماشات امامية ٣٢٢ ريال
فلتر مكيف ٢٥٦ ريال
مساعد امامي ٥٢٠ ريال
٥ علب زيت ١٠ الالاف ( ١١٦ ريال )

اسعار قطع الغيار باجيرو بعد الخصم




فلتر زيت ٤٦ريال
فلتر هواء ١١٤ريال
سير ماكينة ٣٨٠ ريال
٦ حبات بواجي ١٦٣ ريال
قماشات امامية ٣٢٢ ريال
فلتر مكيف ٢٥٦ ريال
مساعد امامي ٥٢٠ ريال
٥ علب زيت ١٠ الالاف ( ١١٦ ريال )