صدمني فجرا وهرب واللوحات غير واضحة

المرور لو رحت لهم ومعك رقم لوحه ناقص بس رقم او حرف يدخلون في السستم ويقولون الرقم غلط و مع السلامة يعني ما راح يتساعدون
ما لك الا الموقع في كمرات شرط تطلع ارقام اللوح لان اغلب الكمرات ما تجيب رقم اللوح واضح
واذا ضاع حقك في الدنيا ما راح يضيع في الأخرة اشوف شغله اصدم و امش كثرانه الناس ذمتها صارت وسيعه

دامه مامعي رقم الوحه الله يعوضك مثل ماقال الاخ الي فوق لورقم واحد ناقص اطلب الله 
شف الحواري الي حولك ممكن تحصل السياره الي صدمتك 
مره الوالد صدم سيارته واحد وهرب مثل ماصار معك وجارنا الله يجزاه خير شاف السياره 
قال السياره الفلانيه الون الفلاني صدفه واناوالوالد راجعين من مشوار صار واحد فى الحاره صادمها نفس مواصفات السياره بضبط وفيها اثار صدمه 
رحنا للقسم واعطيناهم رقم الوحه وسحبوه وصلح السياره على حسابه 
شف خذلك دوره فى الحاره ان شاءالله تحصله 

صحيح ع كلام اخوي اللي فوق
المرور غير متعاون خاصة قسم الكمبيوتر
حاطين ورع عمره لا يتجاوز 19
توه طالع من الدوره و متحمس
حتى شنبه باقي ما طلع يصرفك
ع أتفه سبب انا مبلغ ع لوحة ناقص حرف
مارضي يسوي بحث قلي جيب الأرقام
و الحروف كاملة
ابحث لك قهرني الله يقهره
صاحب كامري شطفني مرايتي جديدة
كسر ها وهرب توي مركبها ب600رجعني
الفحص عليها باقي ماتهنيت فيها
فوق الكوبري لاحقته بس هرب كان ملصق
على آخر رقم و صوره ساهر وهو هارب مني

حسبنا الله عليهم مادري وش يستفيدون إذا هربوا من موقع الحادث.

(( وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ))

اخوي منيف ناس مهملة وبعضهم وجهه قوي
مسموح ب مرقة انا دقني شايب قبل أكثر من 10سنوات
المهم كانت السيارة موديل سنتها ماكملت معاي شهرين
عدم لي خلفية السيارة والشنطة وكسر الصدام والاسطبات
الخلفية كلها وكسر الحساسات الخلفية وعفط اللوحة
المهم اتصلت ب نجم ماكمل 10دقايق إلا نجم حاضر
طلب رخصنا وخطط الحادث طلع الشايب غلطان
100،%المهم بعدها طلبنا التأمين الشايب تأمينه منتهي
رفض يكمل الإجراءات يقول نجم ما يكمل الإجراءات
إلا إذا الطرفين عندهم تأمين المهم اتصلنا ب المرورتأخر أكثر من نص ساعة
رغم انه كان يلفلف بعد الحادث أنشر له يقول اتصلوا ب نجم
ماتعب نفسه ينزل ويسألنا عن الحادث أو التأمين...الخ حط الخطأ
على الشايب بنفس النسبة100 %
اعطاني رخصة الشايب وأعطى الشايب رحتي
رحنا مرور الشاطيء دخلنا ع مقدم وشاف تخطيط
الحادث اعطوني أوراق اروح اقدر الحادث ل3ورش ويأخذ
المرور المتوسط يعوضني المهم طلع المتوسط ٢١رالف ريال
قطع غيار وشغل يد الخ... وسأل الشايب عندك تعوض الرجال
وشرحنا لهم طريقة الحادث يتأسف سألته عندك تأمين قال لاء
قله تعال معي انت وهو دخلنا التوقيف ع قولة اخواننا المواضيع
النظارة، بعدها ناداني قلي هات رقم جوالك واذا الشايب جاب
الفلوس اتصلنا عليك تجي استلمتها و بعدها توقع ورقة
ب التنازل عن المطالبات بعد كم شهر يدق عليه واحد1
من عيال الشايب و يطلبني اتنازل بدون مقابل رفضت قلت
ماعندي فلوس اصلح سياراتي ولو عندي كان تنازلت وسامحت
أبوك من يوم الحادث،قال الحل قلت اعطيني دراهمي اللي
أمر فيها المقدم،قال نصيحة ياخوك العوض ما منه فايدة
تاخذ الفلوس اليوم بكرة تقلب فيها لأن قلب الشايب
ماهو راضي ب الحكم وحاس انه انظلم طولت المعاملة في
المرور لعدم وجود أي مبلغ نقدي عند الشايب المهم جلست امشي
بالسيارة مصدومة أكثر من 5شهور لاني اقدر اسويها
ولا نا قادر اوقفها ولا استغني عنها في أمور حياتي
المهم النهاية تنازلت عن ثلثين المبلغ أكثر من14الف
ورضيت اخذ الفلوس ناقصة 7الف من21 الف
الله يعوضني خير ومن قرأ كلامي

وبعضهم يستخسر
يسوي تأمين بمبلغ قد لا يتجاوز ال500 ريال
وان ولد السعر ل بغض الماركات لا يتجاوز 1000 ريال
بعضهم يقولك انا ماسوي حوادث
هل فيه عاقل يضمن نفسه ان الله ما يكتب
عليه حادث،ولا حكة،ولا دقة بسيطة
ولو مسامحك اللي مادقيته يمكن هذي
الدقة البسيطة تكلف مبلغ وقدره
و عشان بعضهم مايخافون الله

اليوم السبت ١ رجب في الرياض الفجر صدمني راعي جيب ابيض فورتشنر في حي النسيم طريق عبد الرحمن بن عوف تقاطع الزبير بن العوام قريب تحديدا الساعة ٥ واثنين وخمسين دقيقة صباحا ،، صدمني وانا كامري ومباشرة هرب من الموقع ولا لحقت القط رقم لوحة ولا شي ،، هرب بعد ماكسر الصدام والجنب الايسر كله تقريبا انعدم وهو تضرر كمان لانه حاول يفرمل لكنه قاطع اشارة وكمان يهرب ،، اللمبات الامامية يكين طلعت من مكانها من قوة الصدمة ،، الكامري الزرقاء حقتي تضررت ،، اسال الله العظيم رب العرش الكريم ان ينتقم منه زيحصل له نفس الحادث عاجلا غير اجل ،،كلمت المرور وحضر وسجل بلاغ الواقعة ورحت تقديرات ثم احد الورش ،، وحسبي الله ونعم الوكيل وان شاء الله ينكشف ويطيح لان طريق عبد الرحمن بن عوف متروس كاميرات مراقبة قبل الاشارات الضوئية وبعدها ،، راح اسعى في الموضوع وباذن الله اجيب راسه ونتواجه