حل مشكلة بطئ استجابة الدعسه في اليارس
10
2
إضغط هنا للإخفاء
السلام عليكم ورحمة الله وبركاته
حيا الله الشباب كلهم ..
فيه مشكلة أو عيب مصنعي في بعض سيارات اليارس الي هي بطء استجابة الدعسة مع ضعف العزم
والشباب الي معهم تماتيك يصير القير يحن ولا يغير الا بعد وقت
طبعا الي اقصد بالبطء ماهو البطء العادي الي موجود في كل السيارات الي دعستها الكترونية
وانما البطء يكون لمدة ثواني ما تدعس
المهم صارت لي المشكلة فاليارس وعجزت ادري وشي
ومن ورشة لورشة ومن تشليح لمحل قطع غيار لفحص كمبيوتر وبرمجة
وكل واحد جايب لي شي من راسه
قالو لي غير الثروتل رحت غيرته وما ضبط معي
غيرت البواجي وفلتر الهواء وصفاية البنزين وجربت حساس هواء من يارس ثانية وما ضبطت
قالي كهربائي انها مشكلة في ظفيرة الكهرب ويلعب في أووم الظفيرة
وبدون أي نتيجة
بحثت في الانترنت .. لقيت المشكلة منتشرة فاليارس لكن للأسف مالقيت حل
حتى أن الوكالة ما يدرون وش المشكلة !!!
المهم رحت مرة مع واحد لمحل قطع غيار تويوتا وسأله عن قطعه يبيها
قمت سألته عن المشكلة قال ما ادري لكن تراي ابيع 3 قطع يوميا )بنص) يارس وقالي انه فيه حساس
انا كرهت نفسي وجربت كل شي وركبت في راسي فكرة أني أشتري بنص بكل مجازفة
رحت وشريت بنص ب 600 ريال من عند النهدي ورحت لخوينا الكهربائي قلت له ركبه
قال المشكلة ميب منه قلت ركبه ما عليك المهم ركبه وجربت السيارة آووووووه رجعت وكاله
أخيرا صارت المشكلة من البنص نفسه .. وانا قريت واحد من الشباب يقول انه من القير !!!
ملاحظة : عند تغيير البنص بتشتغل لمبة المكينة وهذا شي طبيعي عند تغيير أي حساس تحتاج السيارة لبرمجة من 50 ريال الى 80
إبلاغ
الردود
2
0
قبل 9 سنه و 8 شهر