افضل فحص قبل شراء اي سياره

5 36

لايمكنك التصويت حتى الحصول على 20 نقطة على الأقل
إضغط هنا للإخفاء

abdulaziz 11 -36
قبل 10 سنه و 11 شهر

السلام عليكم ورحمة الله وبركاته

قبل كل شي بكل صراحه انا ضد الفحص خصوصا لو السياره ما تلاحظ عليها شي سليمه
يعني تشوف سياره بمعرض او صاله تناسبك والسياره ما شفت شي عليها سليمه
كهرباء وميكانيكا وصوتها مافيه شي ولا تفتفه ولا شي تاخذها تفحصها ليش
بالنهايه الفحص شامل بحدود 400 ريال ويقولك تصفية ماكينه
حتى لو تطلع السياره من الوكاله يقولك تصفية ماكينه
وراحت 400 ريال بالفاضي 
انا مع الفحص بحاله وحده
لو السياره فيها شي بالقير او لمبات مولعه بالطبلون او فيها ملاحظات
تفحصها تتأكد وش الخلل وتحسب حسابك قطع الغيار وشغل اليد كم يكلفك
لكن انا اشوف عامة الناس ياخذ سياره نظيفه مافيها اي ملاحظات وعلى الفحص 
ما ادري هو ادمان او يريح ضميره او فلوسه زايده 
سياره سليمه جربها بنفسك امحطها كم مره بالقومات تشوف كيف تبديل النمر وصوتها وعزمها
تشوف مع المطبات والحفر فيها اصوات او لا
امسك خط لو 5 دقايق تكفي على سرعة 160  توضح لك ترتفع الحراره او لا
لانه الفحص لو الرديتر فيه مشكله والحراره ترتفع والله لو تفحصها بالوكاله ما طلعوه لك
تجيب لهم السياره بارده عادي ما دعست فيها ولا شي وحرارتها طبيعيه وش عرفهم الرديتر
يحتاج تسييخ او فيها مشكله السياره
جرب السياره 
ودها عند اي ميزان يفحصها لك مجانا لا تروح محلات عند المعارض يعرف انك جاي تفحص
ودها اي محل بالشارع يشوف السياره من تحت تحتاج وزن او فيها شي
انزل بنفسك تحت السياره شوف فيها تهريبات زيوت او لا
يوضح معك لو السياره جاها حادث الشاص تشوفه سليم او لا 
لانه مستحيل لو فيه حتى لو تعديل بسيط لازم يكون واضح ماهو مثل الاجزاء الخارجيه
لابد تدقق بشكل كبير
الفحص الخارجي
تفتح شبابيك السياره الاربعه كامله
تشوف بين الجلدتين مكان الزجاج تحط نور الجوال او كشاف قوي تشوف الرفرف من الداخل
اقصد بمكان الزجاجه نفسها وهي نازله تنور بالجوال وتشوف الرفرف فيه اثار سمكره او لا
لانه بيكون واضح من الداخل بطريقه اسهل من الخارج
تفتح الكبوت تشوف الجسر الامامي اللي يمسك الرديتر والشمعات فيه اثر تعديل او لا
لو الصدام الامامي مغير او فيه رش مو مشكله هذا شي خارجي
لكن الجسر سليم هذا يدل انه ما جاها حادث
تفتح الشنطه تشيل الفرش الجوانب والارضيه تشوف مكانها فيه اثار سمكره او لا
وبالكبوت تشوف فيه اثار تلاعب بالكهرباء فيه اسلاك مجروحه او شي تعرف انه كان مركب
مثلا زينون او خرابيط بالسياره وشالها واحتمال يكون فيه مشاكل بالكهرباء
اما سياره سليمه ما فيها ملاحظات على الفحص كمبيوتر وشامل وكلام فاضي ما ينفع
ما يضرك لو تعرف احد عنده خبره بالسيارات تاخذه معك يجرب السياره لو ما تفهم شي فيها
احد فاهم بالسياره والله انه افضل من الفحص بوجهة نظري
انتهى موضوعي 
لا عاد اشوف ناس صافه طوابير على محلات الفحص هههههههههههه 

إبلاغ

الردود