كيف اعرف ممشى السياره الحقيقي ؟

نعم الغش مصيبه
لكن بعض العلامات البسيطه
دواسة البنزين تحصلها ممسوحه
الدركسون.. القير تحصله ممسوح
مع ان إذا ركب ع الدركسون والقير لباسه مايوضح
أيضا المكينه إذا فيها زيوت

انا اعرف طريقه وحده وفعلاً لاحظت غش ف بعض السيارات 
الي هي تقرير الفحص الدوري موجود فيه ممشى السياره. 

برقم هيكل السيارة عن طريق خدمة موجز او سجل الصيانة فالوكالة او بترومين إن كانت السيارة جميع صياناتها باحدهم

اهم من الممشي شكل السياره وطريقه الاستخدام - شوفت كامري موديل ٢٠٠٨ ممشي ٨٠ الف
بس للاسف كانت في مدرسه دله وحاله للسياره يرثي لها

لا تهتم للممشى نهائيا

خذ سنوات الموديل واضربها في 50

مثلا سيارة موديل 2015 واحنا 2019 يعني مشت 4 سنوات

الممشى الطبيعي لها هو 4×50=200 الممشى الحقيقي لها حول 200 ألف


سيارة 2018 ممشاها حول 50

وهكذا كل سنة ب 50 ولا تصدق أحد ، ولا يغشك أحد

مو شرط انا معي كامري ٢٠١٥ ماشيه ٥٥ الف وكالة .. ممكن يكون في علامات كما قال الاخ امير الاصيل ، وللاسف انعدام الخوف من الله

للاسف اكتشافها صعب وغالبا الغش يصير من الشريطي اللي يشتريها من صاحبها ويشوف السيارة نظيفه ويرجع العداد

لكن شيك اخر صيانة في الوكالة كم المممشى وكذلك في بترومين وون ستوب وغيرها من شركات تغيير الزيوت ممكن مالكها كان يغير عندهم واذا حصلت لها سجل عندهم تشوف العداد في الشركة هل هو اكثر من قراءة العداد حاليا ؟
وشيك بالفحص الدوري ايضا

اذا مالها سجلات تقيس نظافة السيارة من الداخل ومن تحت المساعدات والمقصات والجلد ومسامير التوازن هل هي مستهلكة والا حالتها مناسبة مع ممشى السيارة 

طيب وإن طحت في سيارة ماشية 60 ألف فعلياً , لكنها كانت مع مراهق يفحط عليها ومجرم فيها إجرام !!!!!!!!!!!

هذه لا تقل غش عن سيارة متلاعب راعيها بالعداد . . . .

سوق المستعمل صعب صعب صعب جداً , وهي ( حظ ) بالدرجة الأولى . . . .

لكن حاول إنك تشتري من اللي حولك من الجيران والمعارف والأصدقاء اللي تعرفهم وتثق فيهم . . . .

وعارضين سياراتهم للبيع . . . .

أو وصي لك واحد فاهم وبخيص بالسيارات ( تثق فيه ويخاف الله ) مايغشك ولا يدنفس من وراك . . . .

وله علاقات مع راعين المعارض والشريطية ويعرفهم . . .

ينقي لك موتر طيب أول ماتطيح عينه على وحدة منهن . .كأنها له شخصياً . . . .

والله يبعد عنا الغشاشين والنصابين . . . .

الموضوع صعب نوعا ما.
لكن قيس ممشى السيارة مع باقي امور السيارة.
يعني مثلا سيارة ماشيه الى 100 الف. و عمرها 4 او 5 سنين فقط.
شوف الامور التاليه:
1- كرسي السواق و نظافته و هل هو مقطع او ضعيف لمن تظغط على الاسفنج او مازال بقوته.
و كذلك باقي الكراسي.
2- دواسة الفرامل و البنزين هل مازلوا فيهم عمق او ممسوحين.
3- حزام الامان . هل هو نظيف. و هل هو يرجع لمكانه و لا تحسه بطيء من كثر الاستخدام. او فيه شقوق.
4- هل المسجل متغير ؟ الكمبروسر ؟ السلف ؟ الرديتر ؟ الاصطبات الامامية و الخلفيه هل اصليه او تجاريه؟
لانه التغيير في الامور هذي يدل انه قد تعطل بسبب كثرة الاستخدام . و اذا تغيرت بتجاري فصاحبها غالبا غير مهتم
بسبب انه قطع فيها مسافة كبيره جدا و ليس مثلا 100 الف او اقل.
5- هل السيارة صاحبها مركب فيها اكسسوارات او اية اضافات ؟ اذا نعم . فهو شيء سلبي.
6- صوت المكينة. و استجابتها مع الدعسة البسيطه و الدعسة القوية و هي واقفه. هل الدعسه فيها مثل التاخير ؟ اذا نعم فهو شيء سلبي.
7- الفرامل هل هو ممتاز و يستجيب بشكل طبيعي. او تحس انه السيارة ماتستجيب الا بعد الظغط لاكثر من النص ؟
8- المساعدات و الاذرعة اذا هم مغيريين و خصوصا اذا تجاري فالسيارة غالبا ماشيه كثير.
9- تقفيله الابواب خصوصا باب السواق. لانه اذا فيه صعوبه في التقفيل بسبب ميلان الباب فمعناته السياره مستهلكه جدا.
لازم تقارن صوت قفل الابواب الاربعه. اذا فيه اختلاف في الاصوات او ثقل بين الابواب الاربعه ففيه اما استهلاك كبير او حادث.
10- المكينة هل انفكت او لا. الجربكس ايضا. المكينة اذا انفكت و هي ماشيه قليل فمعناته اما الممشى غير حقيقي او استخدام غير نظيف.
11- نزول مستوى السيارة اكثر من اللازم مقارنة باخواتها من نفس الموديل. يدلك انه السيارة ماشية كثير او استخدام غير نظيف.
12- شيك على العداد هل مفكوك صواميله او فيه اثر في البلاستيك انه تم فكه. المفروض على ممشى قليل انه العداد مايكون انفك ابدا.
13- فرشات الشنطه و ايضا فرشات الارجل داخل السيارة. هل هي اصليه ام متغيره.
14- يفضل انك تشتري السياره من صاحبها مباشرة بدون تدخل اي وسيط. سواء كان معرض او شريطي او حتى صديق. لانه الكل سيجزم انه
السيارة من افضل مايكون و ليس بها ملاحظات بالرغم من انهم و لا واحد منهم يعرف تاريخ السياره غير صاحبها فقط. غير انهم سيحاولون تغيير
معالم السيارة لتبدوا بشكل افضل و بالتالي زياده في سعرها من غير ماتستفيد ياليتهم حتى عملوا لها صيانه دوريه شامله. و هذي الفرقيه في السعر انت اولى
بها لانه اي سياره بتشتريها قد تحتاج الى بعض الصيانات الاساسيه الدوريه.
15- شيك على المكيف و مستوى التبريد . و ايضا مستوى دفع الهواء على اضعف درجه. اذا فيهم خلل او ضعف. فغالبا من الممشى المرتفع.
16- شيك على الكتابات في عمود الاشارات و المساحات. وايضا الراديو . اذا الكتابات ممسوحه فهو من الممشى العالي غالبا.
17- محلات فحص السيارة لاتظهر لك كم ممشى السيارة الحقيق. و لا تستطيع ان تعرف اذا الجربكس به خلل في كثير من الاحيان.
18- افحص تبديلات الجربكس الاوتوماتيك و السيارة باردة و ليست ساخنه. لانه كثير من مشاكل الجربكس تختفي بعد ان تسخن السيارة.

هذي بعض الامور اللي تشيكها. و فيه امور كثير و اهم شيء الاستخارة و التوكل على الله بعد فعل الاسباب.

كلام اخوي عامر سليم هناك نقاط كثيرة تعرف حقيقة السيارة .
طبعا بعض اللي مايخافون الله يبحث عن السيارة اللي قاطعة مسافة كبيرة والبودي سليم .. ياخذها بسعر بلاش ويغير العداد .

للاسف اغلب اللي في السوق مغشوش الا من رحم ربي طبعا بعد رحلة بحث طويلة شفت بعيني وماهو فلان قال او علان ماقال
للاسف ان الفحص مايطلع المشمشى الحقيقي مثلا واحد طلع سيارة موديلها 2015 وصلها 300 الف قبل مايبيعها يروح ينزلها مثلا الى 80 الف ويروح يفحصها ولا كنه صار شئ
لكن المفترض عدة نقاط لابد منها للتضيق على الغشاشين
اولا جدول الصيانة الدورية الزاما يضاف لسجل السيارة بدون تلاعب حتى يبين كل شي مشمى السياراة والمشاكل الفنية
ثانيا الحوادث المروريه سواء اللي باشرها نجم او المرورو لابد ان تضاف لسجل المركبة
ثالثا الورش ماتصلح ورشه اي سيارة الابوصل مرتبط بنظام المرور يعني نظام ورقة الاصلاح التقليدي ماينفع لانه ممكن اضف رصيف جدار شي واروح اصلحها في ورشه ابو كلب بدون ورقة اصلاح ولا تسجل على السيارة انها حادث يعني مفروض تشديد على الورش
رابعا الفحص الدوري لابد ان يكون سجل للسيارة لان اللي فهمته انه مايطلع لك الفحص الا اخر مره فحصت يعني المره اللي قبل ماعاد تطلع وهذا يعطي فرصه للي مايخافون الله يلعبون لعبتهم
اتوقع لو تم تطبيق هاذي الامور سيضيق الخناق على الغشاشين